Sapwellimen Koht Kadeik​—E Kin Ahnsou Koaros Ketikihda Mehn Kataman kan me Itar?

SOUNKASAWIH mesenleng men kilikilang kilel en melimel ehu nan nah computero. E kilang me melimelo keper oh e kerendohngehr wasa ehu me aramas tohto kousoan ie. Pwehki e nsenohki me aramas ako en dehr lelohng apwal, e kin wia soahng koaros pwehn pakairkihong irail mwohn eh pahn pwandala.

Pil duwehte met, ahnsou wet Siohwa kin ketin pakairkihong tohnsampah duwen “melimel” ehu me uhdahn keper sang pakair koaros en mesenleng me aramas kin rong. Ia duwen eh kin ketin wia met? Oh ia duwen atail kak kamehlele me e kin ketikihong aramas akan ahnsou pwe ren kaunopada? Pwehn sapengala met, keieu kitail en tehkpene ekei mehn kataman kan me Siohwa ketikihda mahso.

NI KOHT EH KETIKIHDA MEHN KATAMAN KAN

Nan Paipel, Siohwa ketikihda mehn kataman kan duwen soangsoangen “melimel,” de kadeik, me e pahn ketin wiahiong irail ko me kin pein sapeikiong sapwellime kehkehlik kan. (Lep. Pad. 10:25; Ser. 30:23) Nan ehuehu ahnsou, e ketin katamankihong aramas sapeik ko mwowe oh ketin padahkihong irail en wiahda wekidekla kan me pwungiong kupwure. (2 Nan. 17:12-15; Neh. 9:29, 30) Pwehn sewese aramas akan en wiahda wekidekla kan me anahn, e kin ketin kalapw doadoahngki sapwellime ladu loalopwoat kan nin sampah en pakairki sapwellime kadeik oh en sewese aramas akan en wehwehki me irail anahne karuwaru.​—Eimw. 3:7.

Noha wia karasepen emen me Koht ketin doadoahngki pwehn pakairki sapwellime kadeik. Erein sounpar tohto, e kin ni eimah katamankihong aramas tiahk samin oh lemei kan nan eh ahnsowo duwen Nohlik ehu me pahn wiawi nan sampah pwon. (Sen. 6:9-13, 17) E pil ndaiong irail dahme re anahne wia pwehn pitsang Nohliko. Met kahrehda aramas kin kahdaneki ih “sounkalohki pwung.”​—2 Pit. 2:5.

Mendahki dahme Noha nannanti en wia, aramas ako mwohn Nohliko pohnsehsehla rohng en kadeiko me kohsang Koht. Irail kasalehda me irail sohte ahneki pwoson. Imwilahn met, irail mehla ni ahnsou me Nohliko “kohdo oh kamwomwirailla koaruhsie.” (Mad. 24:39; Ipru 11:7) Irail sohte kak nda me Koht sohte ketin pakairkihong irail.

Ni ahnsou teikan, Siohwa kin ketin katamankihong aramas akan mwohnte “melimel” en sapwellime kadeik pahn tepida. Mendahki met, e kin ketin tehk mwahu me e ketikihong ahnsou me konehng ong irail kan me rong pwe ren kaunopada. Karasepe, e ketikihda mehn kataman kan mwohn Kalokolok Eiseko eh pahn wiawihong mehn Isip ko. Ehu karasepen met iei ni Siohwa eh ketin poaronehla Moses oh Aaron pwehn pakairkihong Parao oh nah ladu kan duwen kalokolok keisuho, me iei keteu ais takai. Pwehki keteu ais takaio pahn wiawi rahno mwuri, ia duwe, Koht ketikihong irail ahnsou en rapahkihda wasahn ruk oh tangasang melimelo? Paipel mahsanih: “Ekei sapwellimen Parao lapalap ako ahpw masakada mahsenen KAUN-O, iei me re kihlong nan ihmw neirail lidu kan oh mahn akan. A ekei sohte nsenohki mahseno, re ahpw sohte karukihala neirail lidu kan oh mahn akan.” (Eks. 9:18-21) E sansal me Siohwa ketikihda ahnsou laud, pwe irail ko me mwadang kaunopada en dehr lellong nan keper duwehte meteiko.

Pil duwehte, pakairpen kalokolok kaeiseko kohwongehr Parao oh nah ladu ko mwohn kalokoloko eh pahn wiawi. Ahpw, irail pweipwei oh soikala pakairo. (Eks. 4:22, 23) Imwilahn met, irail kilang neirail pwutak mesenih kan mehla. Ia uwen eh kansensuwed! (Eks. 11:4-10; 12:29) Ia duwe, irail kak kaunopada mwohn kalokoloko eh pahn wiawi? Ei! Moses mwadangete pakairkihong mehn Israel ko duwen kalokolok kaeiseko me pahn wiawi oh e padahkihong irail ia duwen arail kak doarehla arail peneinei kan. (Eks. 12:21-28) Aramas depe me peikiong pakairo? Nin duwen me ekei kasalehda, aramas silirar, iangahki mehn Israel kan oh “pokon en ekei aramas,” me iei mehn Isip kan oh pil irail kan me kaidehn mehn Israel. Iei irail me pitsang sapwellimen Koht kadeiko oh kohkohsang Isip.​—Eks. 12:38.

Nin duwen me karasaras pwukat kasalehda, Siohwa kin ahnsou koaros ketin tehk mwahu me aramas akan en ahneki ahnsou laud pwehn peikiong sapwellime katamano. (Deud. 32:4) Dahme kamwakid Koht en ketin wia met? Wahnpoaron Piter kawehwehda me Siohwa “sohte kin ketin kupwurki emen en sohrala ahpw e ketin kupwurki aramas koaros en koluhla.” (2 Pit. 3:9) Ei, Koht ketin nsenohki aramas akan. E kupwurki irail en koluhla oh wiahda wekidekla kan mwohn sapwellime kadeik eh pahn leledo.​—Ais. 48:17, 18; Rom 2:4.

PEIKIONG SAPWELLIMEN KOHT MEHN KATAMAN RAHNWET

Pil rahnwet, aramas koaros anahne peikiong mehn kataman kesempwal wet me kin kohpeseng sampah pwon. Erein eh ketiket sampah, Sises mahsanih me koasoandi suwed en sampah wet pahn kedekedeo sohrala erein ‘kahn kamakam kowahlapo.’ (Mad. 24:21) Me pid kadeiko ni ahnsou kohkohdo, e ketikihda kokohp pisetik kan me kawehwehda duwen dahme sapwellime tohnpadahk kan en kasik en kilang oh lelohng ni ahnsowo eh pahn leledo. Sises pil ketin kawehwehda mwekid laud kesempwal kan me kitail kin kilang wiawi rahnpwukat.​—Mad. 24:3-12; Luk 21:10-13.

Pwehn pahrekiong kokohpo, ahnsou wet Siohwa kin ketin kangoange koaros en pilada Sapwellime kaunda limpoak. E ketin kupwurki me aramas peik kan en nsenamwahuki mour mwahu ahnsou wet oh pil kapai kan nan sapwellime sampah kapwo ni ahnsou kohkohdo. (2 Pit. 3:13) Siohwa kupwurki sewese aramas akan en pwoson sapwellime inou kan. E ketin sewese irail en wia met sang ni eh ketikihong irail rohng wet me pahn doarehla arail mour. Rohng wet iei “rongamwahu en Wehio” me Sises ketin kohpada pahn “lohkseli wasa koaros me aramas kin mi ie nin sampah pwe en mie kadehde ong tohnwehi koaros.” (Mad. 24:14) Koht ketin koasoanehdi sapwellime tohnkaudok mehlel kan en kasalehda mehn “kadehde” wet, de kalohki rohng wet sang rehn Koht, nan sahpw 240 samwa. Siohwa ketin kupwurki uwen aramas tohto me kak ren peikiong mehn kataman wet oh tangasang “rahnen ohla” en sapwellime kadeik me pahn kereniong leledo.​—Sep. 1:14, 15; 2:2, 3.

Eri peidek kesempwalo sohte pidada ma Siohwa ketikihong aramas akan ahnsou pwehn peikiong sapwellime mehn kataman kan de soh. Mehn kadehde kan kasalehda me e kin ahnsou koaros ketin wia met. Ahpw, peidek kesempwalo iei: Aramas akan pahn peikiong sapwellimen Koht mehn katamano ni eh miehte ahnsou? Nin duwen sapwellimen Koht sounkalohk kan, kitail en pousehlahte sewese uwen aramas tohto me kitail kak ren pitsang imwin koasoandi suwed wet.