Anehki Koahiek oh Kaunopada Mwahu Pwehn Padahk ong Mehteikan
1 Ahnsou me Moses idihdla pwehn wia wiliepen Siohwa, e pehm me e sohte koahiek en pakairki Mahsen en Koht ong Parao. (Eksodus 4:10; 6:12) Seremaia kasalehda ah pepehm me e lemeleme me e sohte koahiek en wia sapwellimen Siohwa soukohp, oh ndaiong Koht me e sohte koahiek en lokaiaiong aramas. (Seremaia 1:6) Ahpw, mendahki ara pehm me re sohte koahiek, ira koaros mwuhr wiahla sapwellimen Siohwa soukohp eimah kan. E sansal me ira koaros koahiek mwohn silangen Koht.
2 Rahnwet, kalangan ong Siohwa, kitail naineki oh anehki dahme kitail anahne pwehn wia doadoahk en kalohk oh koahiekla nan doadoahk wet. (2 Kor. 3:4, 5; 2 Tim. 3:17) Duwehte sounwiemisihn koahiek men me kin anehki mehn doadoahk koaros me anahn ong eh doadoahk, kitail anehki soahng koaros pwehn wia atail doadoahk en kalohk ni koahiek. Nan February, kitail pahn kihla sohte lipilipil pwuhk me pali 192 me mwomwohdiso kin kolokol. Mendahki pwuhk pwukat sohte kapw, ahpw tohto aramas pil kin medemedewe oaralap en pwuhk pwukat rahnwet oh pwuhk pwukat kak en sewese aramas en sukuhliki padahk mehlel. Kitail kak en doadoahngki padahk pwukat ahnsou me kitail doadoahngki sohte lipilipil pwuhk me kitail mwahuki.
3 Ke kak doadoahngki oarelap en kasukuhl (education) pwehn kahreong aramas en men rong duwen Mahsen en Koht. Ke kak tepida oh nda:
◼ “Rahnwet, aramas tohto kin kesempwaliki anahn en kasukuhl mwahu. Nin duwen pein ahmw lamalam, soangen kasukuhl dahieu emen kak en rapahki pwehn anehki peren mehlel oh pweida nan eh mour? [Mweidong en sapeng.] Kitail kak en ale kapai soutuk kan ma kitail kin sukuhliki loalokong pwung en Koht. [Wadek Lepin Padahk 9:10, 11.] Pwuhk wet [wadek daidel en pwuhk me ke men kihla] poasoanda pohn Pwuhk Sarawi. E kin kasalehda iawasa kitail kak sukuhliki loalokong pwung me pahn kak karehong kitail en ale mour soutuk.” Kasalehda irewet sang nan pwuhko. Ma tohnihmwo uhdahn men rong, ke kak kihong ih pwuhko oh koasoanehdi ahnsou ehu en pwurala reh. Ke kak nda me pwuhko sohte isepe, ahpw ke pahn perenki ale sawas ong doadoahk wet sampah pwon.
4 Ahnsou me ke pahn pwurala rehn tohnihmw me ke koasoi duwen kesempwalpen kasukuhl en Paipel, ke kak nda:
◼ “Ni ahnsou me kita tuhpene rahn teio, kita koasoipene me Paipel iei mehn kasukuhl me kak kahreong kitail en anehki koapwoaroapwoar en mour soutuk. Ahpw, ni mehlel, kitail anahne nantiong sukuhliki dahme kitail anahne wehwehki sang nan Nting Sarawi kan. [Wadek Lepin Padahk 2:1-5.] Aramas tohto kin apwalki wehwehki Pwuhk Sarawi pwon. I men en wia kamwomwada me pahn kak kasalehong uhk iaduwen kiht kin kasukuhlih aramas teikan duwen Pwuhk Sarawi.” Doadoahngki pwuhko me ke kihong ih rahn teio oh pakala ehu wasa me ke kak wia kamwomwada en onop Pwuhki Sarawi. Ma tohnihmw men onop kaukaule, kawehwe ong ih me ke pahn pwurala reh oh wahla neitail sawaspen onop Paipel Ke Kak Mour Kohkohlahte Nan Paradais Nin Sampah.
5 Aramas tohto kin pwunodki lokolok me seri en sampah rar rar kei kin lokolongki. Ke kak sewese tohnihmwo en wehwehki duwen madamadau en Koht ong irewet, oh nda:
◼ “Mwein ke kilangehr nuhs me pid seri kan en sampah pwon me duhpekla, soumwahu, oh sohte itar epwelparail. Dahme kahrehda pwihn kan me dene irail kin nsenohki soahng pwukat sohte kak kamwahuiala ire pwukat? [Mweidong en sapeng.] Koht kin nsenohki dahme me keieu mwahu ong aramas. Tehk dahme E inoukihong seri oh aramas laud kan koaros, me ntingihdi nan Pwuhk Sarawi. [Wadek Kaudiahl 21:4.] Pwuhk wet [nda daidel en pwuhko] pahn oaretikiehla duwen sampah kapw me Koht inoukihda me pahn kasohrala kalokolok douluhl.” Ma kak, pakala ni kilel en paradais oh koasoi. Idek rehn tohnihmwo ma e men naineki pwuhko oh koasoanehdi ahnsou en pwurala. Mweidong tohnihmwo en kihda eh sawas ong doadoahk wet.
6 Ahnsou me ke pwurala rehn tohnihmwo me ke koasoia lokolok en seri kan, ke kak pousehla oh nda:
◼ “Ahnsou me kita tuhpene rahn teio, ke ndaiong ngehi me ke kin pwunodki duwen lokolok me seri kan kin lokolongki pwehki ohlahn peneinei, lehk laud, soumwahu, oh tiahk lemei. Ahpw, Pwuhk Sarawi kin kihda mehn kamweit pwehki e kin kasalehda me, ni ahnsou kohkohdo, Koht pahn kasohrala soahng kan me kin kaloke seri oh aramas laud duwehte soumwahu, medek oh mehla. Kokohp ehu me pwarada nan pwuhken Aiseia kin kawehwehda me atail mour en sampah pahn mwahula.” Wadek oh koasoiada Aiseia 65:20-25. Wia ahmw koasoi pwehn imwikihla onop en Paipel me pahn doadoahngki pwuhken Mour Kohkohlahte.
7 Pwehki aramas tohto kin kalap kapakap, ke kak tepida koasoi duwen ire wet oh nda:
◼ “Erein atail mour, kitail kin lelong kahpwal de mehkot me kin kamwekid kitail en kapakap pwehn rapahki sawas sang rehn Koht. Ahpw, aramas tohto pehm me Koht sohte sapengki arail kapakap. E kin pil duwehte kaun en sampah kan ahnsou me re kin kapakap me sampah pahn meleilei ehu rahn, likamwete Koht sohte rong arail kapakap. Kitail nda met pwehki soahng suwed kan, mahwin oh tiahk lemei, kin susuwedla oh kaloke aramas kan. Mehlel—Koht kin karonge atail kapakap kan? [Mweidong en sapeng.] Melkahka 145:18 kawehwe dahme kitail anahne wia pwe Koht en karonge atail kapakap akan. [Wadek Melkahka 145:18.] Ehu me kesempwal iei me atail kapakap ong Koht en mehlel oh pahrekiong padahk mehlel me diarada nan sapwellime Mahsen, Pwuhk Sarawi.” Kasalehda pwuhko me ke mwahuki tohnihmwo en wadek oh kasalehda sang nan pwuhko ireo me pid duwen kesempwalpen kapakap.
8 Ahnsou me ke pwurala rehn tohnihmwo me ke koasoi duwen kapakap, ke kak nda:
◼ “I perenki ata koasoipene rahn teio duwen kapakap. Ke uhdahn pahn perenki wadek duwen dahme Sises kaweidkihong kitail me konehng en kapakapki.” Wadek Madiu 6:9, 10, oh kasalehda oarelap kan me Sises keieu nsenohki nan kapakapo. Kasalehda irelaud 27, “Duwen Ale Sawas Ki Kapakap,” nan pwuhken Mour Kohkohlahte, oh idek rehn tohnihmwo ma ke kak wia kamwomwada en onopki pwuhko.
9 Ni ahnsou me kitail kin kasukuhlih mehteikan loalokong pwung en Koht, kitail anahne idek pein kitail, “Ihs me koahiek en wia soangen kasukuhl wet?” Nting Sarawi kin kihda pasepeng: “Kitail me koahiek oh konehng en wia doadoahk wet.”—2 Kor. 2:16, 17.