Ekei Padahk kan Ke Kak Doadoahngki Nan Kalohk
NEKIDALA MWAHU DOAROPWE WET
Paieki Mour Sampah Kohkohlahte
“Aramas tohto kin lemeleme me irail anahne kohdahla nanleng pwehn ahneki mour kohkohlahte, ahpw ia ahmw madamadau ong mour kohkohlahte pohn sampah? [Mweidohng en sapeng.] Pwuhk Sarawi kin kasalehda me aramas kak ahneki mour soutuk, oh e kin padahkiong kitail iaduwen kitail kak alehdi met.” [Wadek Sohn 17:3.] Kasalehong tohnihmwo kilel 49 oh nda, “Brochure wet pahn sewese iuk en sukuhliki iaduwen ke kak ale kapai en mour nanpwungen aramas peren kan oh paiekihda mour kohkohlahte nan sampah.” Kihong ih brochure, oh koasoanehdi ahnsou me kumwa pahn pwurehng tuhpene.
Ni ahmw pahn kasalehda kilel kan ni kilin brochure, ke ke idek reh “Ke men mour nan sampah ahnsou me e pahn direkihla aramas peren kan duwehte kilel wet kin kasalehda? [Mweidohng en sapeng.] Pwuhk Sarawi kin padahkiong kitail me Koht kin poakpoake aramas oh e kupwurki irail en ahneki peren mehlel oh mour kohkohlahte nin sampah.” Kasalehda kilel 49, oh wadek iren Paipel ehu me kileledi wasao. Mwuri, kasalehda kilel 50, oh kawehwe dahme kitail anahne wia ma kitail men mour nan Paradais. Ma tohnihmwo men ale oh wadek brochure, koasoanehdi ahnsou me kumwa pahn pwurehng tuhpene oh koasoia duwen kahrepen pwoson Sises Krais inenen kesempwal ong irail me men mour nan Paradais. (Kilel 41 oh 62.)
Keep on the Watch!
“Aramas tohto kin medemedewe laud duwen kahpwal laud oh wiewia kapwuriamwei kan me kin wiawi rahnpwukat. [Kihda karasepen met me wiawi nan pein ahmw wasa.] Ke wehwehki me soahng pwukat kin wia kisehn kilel me Wehin Koht pahn kerenieng kaunda sampah? [Mweidohng en sapeng. Mwuri, wadek iren Paipel me konehng ire me ke koasoakoasoia, duwehte Madiu 24:3, 7, 8; Luk 21:7, 10, 11; de 2 Timoty 3:1-5.] Brochure wet kin kasalehda dahme kahrehda e kesempwal oh karuwaru en kasawih wehwehn irair en sampah rahnwet.”
Loalokong Me Pahn Kahluwalahng Mour Soutuk
“Ma ke ale luhk en mour nan soangen wasa kaselel duwehte met, ke pahn perenki iang? [Kasalehda kilel ni pali 4-5, oh mweidohng en sapeng.] Menlau tehk dahme Mahsen en Koht kin kasalehda duwen dahme kitail anahne wia pwehn mour kohkohlahte nan soangen wasa duwehte met. [Wadek Sohn 17:3.] Pwuhk wet pahn sewese iuk en kak alehdi loalokong me pahn kahluwalahng mour soutuk.” Koasoanehdi rehn tohnihmwo en pwurehng pwurodo reh oh koasoia irelaud 1, parakrap 1 lel 5 ahnsowo.
Pahkalahng kilel ni pali 188-189, oh wadek nting kan me mihmi limwahn kilelo, oh idek rehn tohnihmwo: “Ke koapworopworki me ke kak kousoan nan Paradais, ahnsou me loalokong me pid duwen Koht pahn kadirehla sampah? [Mweidohng en sapeng. Mwuri, wadek Aiseia 11:9.] Pwuhk wet pahn sewese iuk en sukuhliki dahme Pwuhk Sarawi kin kasalehda duwen Paradais oh dahme kitail anahne wia pwehn iang mour nan sampah ni ahnsou me e pahn wiahla paradais.” Koasoanehdi en pwurehng pwurala rehn tohnihmwo oh koasoia irelaud 1, parakrap 11-16 ahnsowo.
“Look! I Am Making All Things New”
Kasalehong tohnihmwo kilel ni kilin brochure oh idek reh: “Dahme ke lemeleme pahn anahne wiawi pwe sampah en kak duwehte nan kilel wet? [Mweidohng en sapeng.] Koaros nan kilel wet mie imwarail oh doadoahk me re perenki wia. Mie popohl oh diren mwenge, oh sampah sohte samin. Kaundahn aramas sohte kak wiaiong sampah en duwehte met. Ahpw, Pwuhk Sarawi kasalehda me Koht inoukihda me e pahn ‘onehda sapahl mehkoaros.’ [Pahkalahng pali 30, oh wadek Kaudiahl 21:3, 4.] Brochure wet pahn sewese iuk en sukuhliki dahme ke anahne wia pwehn mour nan sampah kapwo.” Ma tohnihmwo perenki rong, pahkalahng pali 3, oh kamwomwada iaduwen kitail kin onopki brochure wet.
Wiaiong Mour En Ahmw Peneinei Nsenamwahu
“Ke pahn pwungki me peneinei kan rahnwet kin lelohng kahpwal akan me sohte kin wiawi mahs? [Mweidohng en sapeng.] Dahme kahrehda ke lemeleme met wiawi? [Mweidohng en sapeng. Mwuri, wadek 2 Timoty 3:1-3.] Lepin lokaia pwukat: ‘re sohte pahn peikiong ar pahpa oh nohno kan’ oh ‘irail pahn sempoak’ kin kawehwe mwahu duwen irair en aramas akan rahnwet. Ahpw, Kohtohte me kohpada duwen kahpwal pwukat pil kin ketikihda kaweid me kak sewese peneinei kan en diar nsenamwahu.” Wadek parakrap sang “Irail me Wiahda Pwuhk Wet” ni pali 2. Ni ahnsou me ke pahn kihla pwuhk wet, e pahn mwahu ma ke pahn kasalehda duwen koasoandi en sawas.
“Kitail koaros wehwehki me peneinei tohto sohte kin uhdahn peren. Dahme ke lemeleme pahn sewese aramas diar peren mehlel nan arail mouren peneinei? [Mweidohng en sapeng.] Ke soh pahn pwungki me e pahn konehng en rong dahme Sounkapikadahn koasoandi en peneinei mahsanih? E ketikihda kaweid kesempwal nan Paipel. [Wadek Aiseia 48:17-18.] Nan pwuhk wet, e kin kasalehda duwen kaweid sang Paipel me kak sewese kitail en diar nsenamwahu nan mour en peneinei. Menlau tehk duwen ekei oaralap kan me e kin kasalehda. [Kasalehda audepen pwuhko.] Pwehki se kin perenki koasoiong tohnpeneinei kan duwen Paipel, I men pwurodo rehmw ni ahnsou me tohn ahmw peneinei koaros mihmi nan ihmw. [Idek rehn tohnihmwo duwen soangen ahnsou dah me mwahu en pwurodo rehn ah peneinei.] Ni ahnsou me I pahn pwurodo, kita kak pousehla ata koasoipene oh kitail kak koasoia irelaud ehu me komwi oh ahmw peneinei pahn perenki.”
Nai Pwuhk en Poadoapoad kan en Paipel
“Ke kin apwaliki kawehwe ong noumw seri kan duwen Pwuhk Sarawi? Ma iei, pwuhk wet kak sewese iuk. I men kihda karasepe. [Wadek Madiu 6:9-10.] Ke wehwehki ire pwukat? [Mweidohng en sapeng.] Pwuhk wet kak sewese iuk en kawehwe duwen wehwehn Kapakap en Kauno ong noumw seri kan.” Kasalehda ire kesempwal kan sang Poadoapoad 91.
“Ke kin pepehm me e kesempwal en kihong neitail me pwulopwul kan mehn wadawad kan me mwahu? [Mweidohng en sapeng.] Pahpa/nohno tohto oh me pwulopwul tohto kin perenki wadek pwuhk wet pwehki e kin sewese irail en wehwehki duwen Paipel. [Wadek Kaudiahl 21:3-4.] Menlau tehk iaduwen pwuhk wet kin kawehwe duwen wehwehn iren Paipel pwukat.” Doadoahngki Poadoapoad 115 pwehn kawehwe ni mwotomwot duwen inou me kileledi nan Paipel me kasalehda me sampah pahn wiahla paradais ehu rahn. Mwuri, ke kak idek reh, “Ke men naineki pwuhk wet pwehn kasalehong noumw seri kan (de nein noumw seri kan)?”
Koperment Me Pahn Wahdo Paradais
“Aramas tohto rahnwet kin nda me irail men mihmi pahn koperment ehu me pahn kak kamwahuwihala kahpwal laud kan me kitail kin lelohng rahnwet. [Kasalehda ekei kahpwal kan nan pein ahmw wasa duwehte sohte itar doadoahk ong koaros, kekeiradahn kauwehla kosonned, de doadoahngki wini en kasahliel.] Kahpwal pwukat kak kahrehong kitail en sohte koapworopworki ahnsou kohkohdo. Ke lemeleme pahn mie ehu koperment me pahn kak kamwahuwihala kahpwal pwukat? [Mweidohng en sapeng.] Ele mwein ke kin kapakapki Kapakap en Kauno. Ma iei, ke wehwehki me ke kin kapakapki koperment pwung ehu? [Pahkalahng pali 3, oh wadek keieun parakrap, me kin kasalehda dahme Madiu 6:10 mahsanih.] Ma ke men mihmi nan sampah duwehte met, I men luhke iuk en wadek brochure wet.”
Padahk Mehlel me Kahluwalahng Mour Soutuk
“Kitail koaros kin lelohng kahpwal tohto rahnwet? Kahrehda se kin idek rehn aramas akan peidek wet: Ma mie ahmw manaman en kamwahuwihala sohte lipilipil kahpwal nan sampah ahnsouwet, mehnia kahpwal me ke pahn pilada en kamwahuwihala? [Mweidohng en sapeng.] Pwuhk Sarawi kin kasalehda me Koht pahn kihsang kahpwal kan me kin kahrehong kitail medek. [Wadek Kaudiahl 21:3, 4] Menlau tehk kilel me mihmi ni pali 4 en pwuhk wet. Ni pali 5, kitail sukuhliki me ‘Koht iei limpoak’ oh e pahn kereniong kihsang irair kan me kin kansensuwedihala kitail. Ke men sukuhliki iaduwen oh iahd e pahn wia met? [Mweidohng en sapeng.] Se kin wia onop en Paipel rehn aramas ni soh isepe oh koasoandi wet pahn sewese iuk en diarada pasapengpen peidek pwukat.”
“Iawasa me ke lemeleme kitail kak diar kaweid mwahu me kak doadoahk nan atail mour? [Mweidohng en sapeng.] Pwuhk Sarawi kin padahkiong kitail duwen ire kesempwal ehu me kitail koaros anahne wehwehki. [Wadek 2 Timoty 3:16. Mwuri, pahkalahng pali 8, oh wadek parakrap 7.] Pwuhk wet pahn sewese iuk en wehwehki me ahmw idawehn kaweid en Paipel me keieu mwahu ong ahmw mour. I pahn perenki pwurodo rehmw oh pousehla ata koasoiapene ire pwukat. Ma ke men kihda ahmw kisin sawas ong doadoahk en kalohk wet me kin sewese aramas wehwehki neirail Pwuhk Sarawi, I pahn perenki ale.”
Miniminpene nan Kaudok en Koht Mehlel
“Ke pwungki me aramas rahnwet kin apwaliki ehuiong meteikan? [Mweidohng en sapeng.] Tohto nan sampah diarada me sang ni arail doadoahngki kaweid en Paipel nan arail mour ehuehu rahn, irail kak powehdi kahpwal kan me pid arail ehuiong meteikan. [Wadek Melkahka 133:1, a mwuri, pahkalahng Irelaud 17 oh kasalehda sawaspen oaralap me koasoia “Dahme en Wia Ma Kahpwal Pwarada.”] Pwuhk wet kin kihda kaweid mwahu iaduwen kitail kak ale sawas laud sang atail wadek Pwuhk Sarawi. I pahn perenki pwurodo oh kita kak koasoiapene duwen met.”
Dahme Koht Kupwurki Kitail en Wia?
“Ke lemeleme Koht kupwurki kitail en lelohng kahpwal kan rahnwet? [Mweidohng en sapeng. Mwuri, wadek Madiu 6:10.] Mie pak me ke medemedewe dahkot Wehin Koht?” Pahkalahng Iren Mehn Kasukuhl 6, oh wadek peidek kan me kileledi ni tepin kasukuhlo. Tepida koasoia kasukuhlo, oh koasoanehdi ahnsou me ke pahn pwurodo.
“Mendahki soahng tohto me kekeirada ni palien sains oh palien wini nan atail ahnsou, soumwahu oh mehla wiwiawihte oh kahrehong aramas lokolok oh nsensuwed. Ke wehwehki dahme Sises pahn wia ong me soumwahu, me mah kan, oh pil me mehlahr akan?” [Mweidohng en sapeng.] Ma aramaso men wehwehki duwen pasapengpen peidek wet, pahkalahng Iren Mehn Kasukuhl 5, oh wadek peidek kan ong parakrap 5 oh 6. Koasoia parakrap 5 oh 6, de koasoanehdi ken pwurodo oh koasoia parakrap 5 oh 6.
Ke Kak Kompoakepahnki Koht!
“Aramas tohto me kin kamehlele Koht kin ahneki pepehm en men karanih Ih. Ke wehwehki me Koht kin luhke kitail en kompoakepahnki Ih? [Mweidohng en sapeng. Mwuri, wadek Seims 4:8.] Brochure wet kin sewese aramas en doadoahngki pein neirail Paipel pwehn kekeirada nanpwung mwahu rehn Koht. I kin wia onop Paipel rehn aramas ni sohte isepe. I kak wiahda kamwomwadahn onop wet ni minit limau. Ke kak mweidohng ie minit limau ien wia kamwomwada wet?” Ma aramaso perenki, ke kak koasoia Iren Mehn Kasukuhl 1, parakrap 1.
Ke Kak Mour Kohkohlahte Nan Paradais Nin Sampah
“Ni ahnsou me emen me kitail poakpoake mehla, kitail kin pahtoula oh pepehm me sohte mehkot me kitail kak wia. Oh e sohte kapwuriamwei ma kitail ahneki soangen peidek pwukat: [Wadek peidek kan ni pali 76, parakrap 1.] Ke men wehwehki duwen pasapengpen peidek pwukat? [Mweidohng en sapeng.] E pahn kangoange iuk en ese me Paipel kin ketikihda koapworopwor kaselel ong irail me mehlahr akan. [Wadek Sohn 5:28, 29.] Pwuhk wet pahn sewese iuk en wehwehki duwen irair en me mehlahr akan oh koapworopwor dahieu ong ahnsou kohkohdo.” Koasoanehdi ahnsou me ke pahn pwurodo oh kamwomwehda atail koasoandi en onop Paipel.
“Se kin koasoakoasoiong mehn mpaht kan duwen dahme kitail kak wia pwehn pere pein kitail sang keper kan. Mwersuwed tohto kin wiawi sahpw wet oh met kin kauwehla mour en aramas tohto. Ke lemeleme aramas duwehte komwi oh ngehi pahn kak ehu rahn alialuseli ni pwong oh sohte lelohng keper? [Mweidohng en sapeng, oh mwuri wadek Melkahka 37:10, 11.] Pwuhk wet kin kasalehda duwen soahng kaselel tohto me Koht inoukihda ong ahnsou kohkohdo, iangahki kasohrala mwersuwed.” Ni ahmw doadoahngki pali 156-158, ke kak kasalehda pil ekei inou kan me kileledi nan Paipel. Ma aramaso perenki, koasoanehdi en pwurodo oh onop Paipel reh.
[Kilel nan Pali 3]
Ke kak doadoahngki padahk pwukat pwehn sewese iuk en kaunopada ong brochure de pwuhk me ke pahn kihla.