Branch Letter

Dear Sounkalohk kan en Wehio:

Se men kasalehda aht kalahnganki utuht limpoak me kohwong brother oh sister kid kei me apwalkihda melimel me kauwehla wasa kan me mih ni Gulf Coast nan pahr 2005.—Sohn 13:35.

Emen brother me anahne kohkohlahsang eh wasa pwehki melimel Katrina koasoia: “Se kohdo wasaht oh ihte me mih reht iei aht likou me se likouki. Kompoakepaht kan me sewesehkin kiht soahng koaros me anahn. Re inenen kasamwo kiht mwahu. Re men se en mihmi.”

Brother oh sister 8,000 samwa kin iang kisehn soangsoangen Regional Building Committee 60 me kin kihda ahr ahnsou, koahiek, oh dipwisou kan pwehn iang sawas. Irail kin sewese kamwahuwihala oh onehda sapahl Kingdom Hall 86 oh ihmw 4,178. Pil miehte Kingdom Hall 5 oh ihmw 722 me irail anahne kamwahuwihala. Ekei brother oh sister kan dake werarail sidohsa tangasang wasa doh kan me duwehte Maine oh Washington pwehn kohla sawas. Ia uwen atail kin kalahnganki ahr sawas oh limpoak!—1 Deselonika 5:18.

Emen serepein me kohsang Michigan koasoia: “E kihong ie peren laud en kilang mesen peneinei kan me kin peren ni arail kin kilang oahs kapw en imwarail kan me se kin kauwada. I kin inenen kalahnganki ahi wia kisehn pwihn en pirien limpoak wet.”

Se pil peki kumwail en kin doulahte oh kapakapki riatail brother oh sister pwukat koaros—irail akan me lelohng nan apwal oh pil irail akan me kin kihda sawas.—2 Korint 1:11.

Riamwail brother kan,

United States Branch Ohpis