Pwaisanki Pai Kesempwal Ehu
1 Wahnpoaron Pohl kin kesempwalki ah pwais en kalohk me Koht ketikihong ih oh kin kilangwohng met duwehte “pai kesempwal” ehu. (2 Korint 4:7) E kin dadaurete pahn kahpwal kan oh kalokolok kan ni ah wia pwais wet. E sohte kin pwangahkihda ah kalohk ong aramas sohte lipilipil me e tuhwong. Pak tohto e kin wia seiloak apwal oh keper kan nan sahpw oh nan sehd. Iaduwen kitail kak alasang Pohl oh kasalehda me kitail kin kesempwalki atail doadoahk en kalohk? (Rom 11:13) Dahme kahrehiong atail doadoahk en kalohk eh wia pai kesempwal tohrohr ehu?
2 Pai Kesempwal Ehu me Ileile Sang Pai Koaros: Pai kesempwal kan en sampah wet kin kalap kahrehdo kansensuwed oh kin ihte kihda kamwahu kan me itait de ongete ahnsou mwotomwot. Ni pali teio, atail doadoahk en kalohk kin wahdo soangen kamwahu kan me kin imwila werei ong kitail oh pil meteikan. (1 Timoty 4:16) E kin sewese aramas mehlel kan en esehla Siohwa, wiahda wekidekla kan me anahn nan arail mour, oh alehdi koapworopwor mehlel en mour soutuk. (Rom 10:13-15) Sang atail kin uhdahn kesempwalki atail doadoahk en kalohk, atail mour kin miehla katepe, kin mie pepehm en pweida mwahu me sohte imwi, oh kin kihong kitail koapworopwor kehlail ong ahnsou kohkohdo.—1 Korint 15:58.
3 Kasalehda me Ke Kin Kesempwalki Ahmw Pai Kesempwal: Atail kin kesempwalki mehkot kin kalapw sansalda sang dahme atail men tounmetei ong. Ia uwen kapai en kin tounmeteikihla atail ahnsou oh kehl en kapinga Siohwa! (Episos 5:16, 17) Mwomwen atail doadoahngki atail ahnsou anahne kasalehda me kitail kin kesempwalki soahng ngenin kan laud sang kepwe kan en sampah. Pwehki kitail ahneki mehkot me inenen kesempwal en ehukihong meteikan, kitail pahn men kalohk ki ngoang oh kin tetehk mwasamwasahn soangen ahnsou mwahu kan koaros en koasoia rongamwahuo.
4 Pai kesempwal kan me mwohni sohte kak pwainda sohte kin nekinekla ahpw kin anahne kasansalda ong koaros pwe ren perenki. Ma kitail kin kilangwohng atail doadoahk en kalohk nin duwen pai kesempwal ehu, e pahn wia kisehn mehkot kesempwal nan atail mour. (Madiu 5:14-16) Ki mohngiong me diren kalahngan, mweidong kitail en kin ahnsou koaros alasang wahnpoaron Pohl oh isaneki ahnsou mwahu koaros en kasalehda me kitail ni mehlel kesempwalki atail doadoahk en kalohk, oh kin wiahki pai kesempwal.