Kesempwalki Omw Pwukoahn Kalohk
1. Ia madamadau en me tohto ong atail doadoahk en kalohk?
1 Me tohto nan ahn Sehdan sampah kin medewe me atail doadoahk en kalohk “mehkot mwahl ehu.” (1 Kor. 1:18-21) Ma kitail sohte pahn kanahieng, madamadau sapwung wet kak kahrehda kitail en nsensuwedla oh kak katikala atail ngoang. (Lep. Pad. 24:10; Ais. 5:20) Ia kahrepe kan me pahn sewese kitail en kesempwalki atail kin wia Sounkadehdehn Siohwa kan?—Ais. 43:10.
2. Dahme kahrehda doadoahk en kalohk kin wia doadoahk sarawi ehu?
2 Doadoahk Sarawi: Wahnpoaron Pohl kawehwehda me doadoahk en kalohk iei doadoahk en samworo ehu. Met kasalehda me doadoahk en kalohk me kitail kin wiewia ong Koht iei doadoahk sarawi ehu. (Rom 15:15, 16) Dahme kahrehda doadoahk en kalohk wia doadoahk sarawi ehu? Pwehki atail kin iang kalohkseli kahrehiong kitail en wiahla “tohndoadoahk kei” en Siohwa, me “ketin sarawi,” oh kin sewese kasarawihala mware. (1 Kor. 3:9; 1 Pit. 1:15) Atail kalohk kin wia “meirong en kaping” ehu mwohn silangin Siohwa, ihme kahrehda doadoahk en kalohk kin wia mehkot kesempwal nan atail kaudok.—Ipru 13:15.
3. Dahme kahrehda kalohki rongamwahwo wia pwukoa inenen kaselel ehu?
3 Me malaulaute me ahneki pwukoa kaselel wet en kalohki rongamwahwo. Tohnleng kan pahn uhdahn perenki pwukoa wet oh re pahn inenen koahiek ong met. (1 Pit. 1:12) Ahpw Siohwa ketin pilada kitail aramas soh unsek kei, me “rasehng sah pwehl kan,” pwehn wia pwukoa inenen kaselel wet.—2 Kor. 4:7.
4. Ia duwen atail kak kasalehda me kitail kesempwalki doadoahk en kalohk?
4 Pwukoa Keieu Kesempwal: Kitail kin wiahki doadoahk en kalohk mehkot me “keieu kesempwal” nan atail mour. (Pil. 1:10, NW) Ihme kahrehda kitail kin koasoanehdi en iang doadoahk wet ehuehu wihk. Sounkeseng men me kin kesempwalki eh pwukoa en iang pwihnen keseng ndand ehu kin kaunopada mwahu ong ehuehu ahnsoun keseng oh kin nantihong kamwahwihala eh koahiek. Kitail pil pahn kaunopada mwahu mwohn atail pahn wia doadoahk en kalohk pwe kitail en kak “padahkihong aramas akan mahsen en Koht ni mehlel” oh nantihong kamwahwihala atail koahiek en padahk.—2 Tim. 2:15; 4:2.
5. Ihs me kin kalahnganki atail doadoahk en kalohk?
5 Ke dehr mworuskihla en aramas madamadau en uhwong kan. Tamataman me mihete aramas tohto nan atail wasahn kalohk me kin kalahnganki atail pwarek irail. Ahpw kaidehn pwungen aramas me kitail kin rapahki. Dahme keieu kesempwal iei dahme Siohwa kin kupwurki, oh e kin uhdahn ketin kalahnganki atail kin pwerisekiong doadoahk wet.—Ais. 52:7.