“E Kin Ketin Kakehlahda me Luwet oh me Pwangadahr kan”
1 Kitail koaros kin luwetala oh pwangada ehu ehu ahnsou. Mwein met kin wiewia kaidehn ihte sang ni doadoahk me kitail kin wia de mwekimwekid teikan en paliwaratail, ahpw pil sang kahpwal akan kitail lelong pwehki kitail mih nan “ahnsou apwal ekei.” (2 Timoty 3:1) Nin duwen ladu en Siohwa kei, ia duwen kitail kak ale kehl en pali ngehn me anahn, pwe en kak sewese kitail en dehr wawaila nan atail doadoahk en kalohk? Kitail kin wia met ni atail kin kihong atail koapworopwor ong ih me “lapalap en sapwellime manaman,” Siohwa. (Aiseia 40:26) E ketin mwahngih atail anahn akan oh ketin nsenohki mehlel en apwahpwalih kitail.—1 Piter 5:7.
2 Siohwa Kin Ketikihda Koasoandi en Sawas akan: Siohwa kin kakehlahda kitail ki sapwellime ngehn sarawi, iei kehl manaman ohte me e doadoahngki pwehn kapikada nanleng. Sapwellimen Koht ngehn kin sewese kitail en “onehda sapahl [atail] kehl” ma kitail kin luwetala oh pwangada. (Aiseia 40:31) Ken kin pein idek rehmw, ‘Iahd keieu mwurihdo me I kapakap ni oaritik peki ngehn sarawi en kakehl ie pwe I en kak kapwaiada ahi pwukoah kan en emen Kristian?’—Luk 11:11-13.
3 Ni atail kin wadek oh doudouloale mahsen en Koht rahn koaros oh audaudkihda mwengehn ngehn kan sang atail kin kaukaule onopki neitail sawaspen Paipel kan, kitail pahn rasehng pweidahn en “tuhke kan limwahn pihl akan, me kin materek nan rahk koaros, oh tehrail kan sohte kin mengila.”—Melkahka 1:2, 3.
4 Siohwa kin pil doadoahngki iengetail tohn kaudok mehlel kan, irail akan me kak en wia “sawas laud” ohng kitail. (Kolose 4:10, 11) Re kin kakehlahda kitail nan mihding kan, sang ni arail kin kihda lokaiahn kangoang kan, sang arail pasapeng kan, oh pil arail padahk kan. (Wiewia 15:32) Elder kan me kin keieu kihda sawas en pali ngehn oh kangoang kan me kin kakehlahda kitail.—Aiseia 32:1, 2.
5 Doadoahk en Kalohk: Ma ke kin pehm me ke luwetala oh pwangada, dehr uhdihsang kalohk! Weksang doadoahk tohto teikan, kaukaule iang kalohk kin uhdahn wia mehn kakommoale ngenatail. (Madiu 11:28-30) En kin ehukihong mehteikan rongamwahuo pahn sewese kitail en kilikilahngwohngete Wehin Koht oh kolokol nan atail madamadau mour poatopoat oh kapai kaselel kan en Wehin Koht.
6 Mie doadoahk tohto kan kitail kak wia mwohn koasoandi suwed wet pahn kasohrala. Kitail ahneki kahrepe tohto en tengediongte nan atail doadoahk en papah “uwen kak me Koht ketikihong” kitail. (1 Piter 4:11) Ki sapwellimen Siohwa sawas, kitail pahn kanekehla atail doadoahk pwehki e “kin ketin kakehlahda me luwet oh me pwangadahr kan.”—Aiseia 40:29.