“Meid Pai me Kin Loalopwoatete nan Apwal me Kin Kohieng”
1 Kristian kan pahn uhdahn lelohng kahpwal kan. (2 Timoty 3:12) Kahpwal kan kakete leledo ni mwomwen soh roson en paliwar, kahpwal en doadoahk en mwohni, kasongosong, kalokolok, de kak pil leledo ni soangen ahl teikan. Soangen kahpwal kan me kohsang Sehdan kin wiawihda pwehn katoutouwihala kitail pwe kitail en wawaila, kahrehiong kitail en sohla nohn nsenohki atail doadoahk en kalohk, de kakete kauhdi kitail sang papah Koht. (Sohp 1:9-11) Iaduwen en dadaurete nan kahpwal kan kak kahluwalahng peren?—2 Piter 2:9.
2 Kaunopada Pein Kowe ong Kahpwal kan: Siohwa kin ketikihong kitail sapwellime Mahsen mehlel, me pil iangahki kilelehdi en mour oh padahk kan en Sises. Ni atail kin rong oh kapwaiada sapwellimen Sises mahsen kan, kitail kin kihdi poahsoan kehlail ehu oh kaunopada kitail ong kahpwal kan. (Luk 6:47-49) Kitail pil kin ale kehl sang ekei elen sawas kan—sang riatail brother oh sister kan nan mwomwohdiso, mihding kan en mwomwohdiso, oh pil pwuhk kan me kin poahsoanda sang Paipel me irail ladu lelepek oh loalokong kin wiahda. Kitail kin pil doadoahngki ni saledek sapwellimen Koht kisakis en kapakap.—Madiu 6:13.
3 Siohwa pil ketikihongehr kitail koapworopwor ehu. Ni ahnsou me kitail kin kakehlahda atail pwoson ong sapwellimen Siohwa inou kan, atail koapworopwor kin wiahla “peipwung ehu nan kapehditail kan, me teng, kehlail.” (Ipru 6:19) Ni ahnsou kan en Paipel, sohp kan sohte kin mwesel sang ni oaroahr kan ma sohte angke, mehnda ma iren mesen lahng pahn mwahu. En koskihdi angke ahnsou me melimel pahn mwadangete wiawi pahn kak pere sang sohp-o en dehr loiong takai keper kan ni oaroahr. Pil duwehte, en kakairada pwoson ong sapwellimen Koht inou kan ahnsouwet, pahn katengehdi kitail ni ahnsou me melimel en kahpwal kan pahn leledo. Kahpwal kan kak pwarada ni soh kasikpe. Mehnda ma mehn Listra kan kin perenki en Pohl oh Parnapas ara doadoahk en kalohk, irairo kin mwadang wekila ahnsou me mehn Suhs ko me kin uhwong ira kin leledo wasao.—Wiewia 14:8-19.
4 En Dadaurete Kin Imwikihla Peren: En doulahte kalokalohk mendahki uhwong kan pahn kihong kitail irair en madamadau pwung. Kitail kin perenkihda kowahlap pwe kitail pil warohng lokolongki saroh pwehki Krais. (Wiewia 5:40, 41) En kin dadaurete pahn kahpwal akan pahn sewese kitail en kakairada laud atail irair en aktikitik, peik, oh irair en dadaurete. (Deuderonomi 8:16; Ipru 5:8; Seims 1:2, 3) E kin padahkiong kitail en koapworopworki Siohwa, en likih sapwellime inou kan, oh en wiahkin Ih atail wasahn ruk.—Lepin Padahk 18:10.
5 Kitail ese me kahpwal kan sohte pahn mihmi ahnsou werei. (2 Korint 4:17, 18) Kahpwal kan kin kihong kitail ahnsou mwahu en kasalehda uwen loal en atail limpoak ong Siohwa. Sang atail kin dadaurete pahn kahpwal pwukat, kitail kak kihda mehn pasapeng mwahu ong ahn Sehdan karaun likamw akan. Ihme kahrehda, kitail dehr pweiek! “Meid pai aramas me kin loalopwoatete nan apwal me kin kohieng, pwe mwurin eh pahn powehdi sosohng wet, e pahn ale nin duwen keting ehu, mour me Koht ketin inoukihong irail kan me kin poakohng ih.”—Seims 1:12.