“Kumwail en Kin Kasapahlkalahngan ong Koht”
1 Ni ahnsou me Sises kamwahwihala ohl tokutok ehko, emente sang nan pwungarail me pwurodohng reh pwehn kasapahlkalahngan ong ih. Sises eri mahsanih: “Kaidehk me ehk me mwakelekellahro? A ia me duwemeno?” (Luk 17:11-19) Ia uwen kesempwal ong kitail en kasapahlkalahngan oh kasalehda me kitail kalahnganki kisakis mwahu koaros oh kisakis unsek me Siohwa Koht, Samatail nanleng me sapan oh limpoak ketikihong kitail!—Kol. 3:15; Seims 1:17.
2 Ia ekei sang nanpwungen soahng kan me Siohwa ketin wiadahr me kitail anahne kalahnganki? Kitail kalahnganki tomwo, Sapwellime kisakis me keieu laud ong tohnsampah. (Sohn 3:16) Kitail pil kalahnganki me Siohwa ketin kainangihkitaildohng reh. (Sohn 6:44) Atail miniminpene me wiawi nan mwomwohdiso en Kristian nan sampah pwon iei ehu kahrepe me kitail en kalahnganki. (Mel. 133:1-3) Mehlel, ke kak tamanda soangen kisakis tohto teikan sang Siohwa. Kitail en dehr men duwehla mehn Israel kan me sohte kin kasapahlkalahngan ahpw manokehla dahme Siohwa ketin wiadahr ong irail!—Mel. 106:12, 13.
3 Kasalehda Kasapahlkalahngan: Mendahki irail me tokutok ehk ele kalahnganki dahme Sises ketin wia ong irail, meh tehmen me kasalehda kasapahlkalahngan. (Luk 17:15) Kitail en pil kasalehda atail kalahngan sang ni atail kin ngoangki iang doadoahk en kalohk. Ma kitail uhdahn kalahnganki soahng koaros me Samatail limpoak nanleng ketin wiahda, mohngiongitail pahn kamwakid kitail en alasang sapwellime limpoak oh sapan sang ni atail pahn koasoiong meteikan duwen ih. (Luk 6:45) Atail koasoiong meteikan duwen ‘soahng kapwuriamwei kan me Siohwa ketin wiahiong kitail oh kupwure ong kitail,’ kin kalaudehla atail limpoak oh kalahngan ong Siohwa.—Mel. 40:5.
4 Kamwakid Meteikan en Kasalehda Kalahngan: Kitail anahne rapahkihda ahl en sewese neitail seri kan oh irail kan me kitail kin onop Paipel rehrail en kalaudehla arail kalahngan. Pahpa oh nohno kan ele ahneki ahnsou mwahu en wia met, duwehte ni ahnsou me ira iang neira seri kan en kilikilang sapwellimen Siohwa kapikipikda kan. (Rom 1:20) Ni ahnsou en wia onop Paipel, kitail mwein kak idek rehn atail tohnsukuhl kan, “Dahme ire wet padahkihong kitail duwen soangen Koht dah Siohwa?” Ahnsou me ahn tohnsukuhlo kalahngan lalaudla, eh limpoak ong Koht oh eh ineng en kaperenda ih pil lalaudla.
5 Erein imwi rahn akan, tohto sohte pahn kasapahlkalahnganki mehkot. (2 Tim. 3:1, 2) Ia uwen kaperen ong Siohwa en ketin mahsanih sapwellime ladu me poadidi kan kin kasalehda arail kalahngan sang ni arail ngoangki iang doadoahk en kalohk!—Seims 1:22-25.