Doadoahk en Kalohk Kin Kakehlailih Kitail
1. Ia kamwahu kan en wia doadoahk en kalohk?
1 En kin pwerisek nan doadoahk en kalohk kak kakehlailihala atail nanpwungmwahu rehn Siohwa oh kalaudehla atail peren. Mehlel me kitail kin kalohk pwehn kaperenda Siohwa. Ahpw atail kin peikiong kehkehlik en “kalohkiseli mahseno” kin wahdo sapwellimen Siohwa kapai kan oh pil wia kamwahupatail ni ahl teikan. (2 Tim. 4:2; Ais. 48:17, 18) Eri, ia duwen kalohk kak kakehlailih kitail oh kihong kitail peren?
2. Ia duwen kalohk kin kakehlailih kitail?
2 Kitail Kin Kehlailla oh Paiekihda: Atail kin kalohk kin kangoange kitail en medemedewehte kapai kan en Wehio ahpw kaidehn atail kahpwal kan en ahnsou pwukat. (2 Kor. 4:18) Atail kin kawehwe padahk kan en Paipel kin kakehlailihala atail pwoson sapwellimen Siohwa inou kan oh kalaudehla atail kalahnganki padahk mehlel. (Ais. 65:13, 14) Ni atail kin sewese meteikan en kompoakepahnki Siohwa oh wiahla aramas akan me “kaidehn kisehn sampah,” met pahn kakehlailih kitail en tohrohreweisang sampah wet.—Sohn 17:14, 16; Rom 12:2.
3. Ia duwen atail kalohk kin sewese kitail en kakairada irair en Kristian akan?
3 En kin iang kalohk kin sewese kitail en kakairada irair en Kristian akan. Karasepe, atail kin nantihong en ‘wiahla soahng koaros rehn aramas koaros’ kin sewese kitail en kakairada irair en aktikitik. (1 Kor. 9:19-23) Atail kin koasoiong irail kan me kin “rasehng sihpw kei me sohte silepahr” kin kamwakid kitail en poakehla irail oh song en wehwehki arail pepehm kan. (Mad. 9:36) Kitail kin sukuhlki ia duwen kitail kak dadaur ni atail kin nantihong kalohk mendahki aramas tohto sohte perenki rong de uhwong. Atail kin tounmeteikihla pein kitail pwehn sewese meteikan kin kalaudehla atail peren.—Wiewia 20:35.
4. Ia omw pepehm ong doadoahk en kalohk?
4 E kin wia kapai laud en kalohk oh kapinga Koht me ketin warohng atail kaudok! Doadoahk en kalohk kin kakehlailihala kitail. E kin wahdo kapai tohto ong irail kan me kin wia uwen arail kak koaros en “kalohkiseli Rongamwahu.”—Wiewia 20:24.