‘Kihong Omw Mour’ ong Noumw Tohnsukuhl en Paipel kan
1. Dahme kitail anahne wia pwehn sewese emen tohnsukuhl en Paipel?
1 Pwehn sewese emen tohnsukuhl en Paipel en inoukihda eh mour, kitail anahne wia laudsang ihte kaukaule onop Paipel reh. Wahnpoaron Pohl kin karasahiong nanpwungen ih oh irail me e kin kasukuhlih duwehte nohno men eh kin apwalih nah seri kan. Kitail pil kin perenki kihong ‘pein atail mour’ pwehn sewese neitail tohnsukuhl kan en kekeirda.—1 Des. 2:7-9.
2. Dahme kahrehda kitail en kasalehda atail nsenohki tohnsukuhl men? Ia duwen atail kak wia met?
2 Kasalehda Omw Nsenoh: Ni ahnsou me tohnsukuhl en Paipel men kin doadoahngki dahme e sukuhlki, kadeikpen loale pahn kamwakid ih en solahr patehng irail kan me sohte kin kapwaiada kaweid kan en Paipel. (1 Pit. 4:4) Eh peneinei kakete kesehla ih. (Mad. 10:34-36) Kitail kak sewese kaitarala eh pepehm kan ni atail kasalehda atail nsenohkin ih. Emen misineri nda: “Ke dehr mwadang kohkohlahsang tohnsukuhlo mwurin onop. Ma konehng, mihmi ekis oh koasoiong ih.” Tehk ma mie soahng kan me ke kak sewesehkin ih. Karasepe, ke kak telephonela reh de mwemweitla reh ma e soumwahu? Ke kak mwohndi reh nan ahnsoun mihting kan oh sewese nah seri kan ma konehng?
3. Ia duwen atail kak sewese neitail tohnsukuhl en ale kangoang sang nan mwomwohdiso?
3 Sawas Sang Mwomwohdiso: Ma wasa me ke kalohk ie karanih imwen noumw tohnsukuhlo, ke sou pahn mwemweitla reh pwe en kak tuhwong me iang uhk kalohk? Ma e konehng, ekei pak ke kak luke sounkalohk teikan iangahki elder kan en iang uhk nan amwa onop. Mwurinte ke tepida onop, kangoange noumw tohnsukuhlo en iang towehda mihting kan nan Wasahn Kaudok. Met pahn sewese ih en perenki iang tohnmwomwohdiso me kak wiahla eh peneinei en Kristian.—Mark 10:29, 30; Ipru 10:24, 25.
4. Ia duwen atail pahn paiekihda atail nannanti en sewese tohnsukuhl kan?
4 Pahpa de nohno men me kin nantihong sewese nah seri kan en kakairada arail nanpwungmwahu rehn Siohwa pahn perenki ahnsou me seri kan pahn pilada en papah Siohwa oh kekeid nan padahk mehlel. (3 Sohn 4) Kitail pil kak ahneki soangen peren wet ni atail kin kihong atail mour pwehn sewese neitail tohnsukuhl en Paipel kan.