Kapakap oh Doudouloale—Kesempwal ong Sounkalohk Ngoang kan
1. Dahme sewese Sises en dehr manokehla sapwellime doadoahk me keieu kesempwal?
1 Nin soutiko, Sises ketin kamwakamwawihala aramas soumwahu kan oh kausasang irail ngehn saut kan. Ni ahnsou me sapwellime tohnpadahk ko diar ih rahn mwurio, re patohwan: “Maing, aramas koaros patohwan raparapahkin komwi,” pwe en wia manaman akan. Ahpw Sises, sohte ketin manokehla sapwellime doadoahk me keieu kesempwal iei en kalohki rongamwahwo. E mahsanih: “Kitail douluhlwohng nan kousapw teikan oh kahnimw keren kan, pwe I en pil lohkiseli wasa ko Rongamwahu, pwe ihme I kohkihdo.” Dahme sewese Sises en ketin kolokolete madamadau pwung? E kin ketin kipada nin sohrahn pwehn kapakap oh doudouloale. (Mark 1:32-39) Ia duwen kapakap oh doudouloale eh kak pil sewese kitail en wia sounkalohk ngoang kei?
2. Dahme kitail kak doudouloale duwe me pahn sewese kitail en kolokolete atail ngoang nan kalohk?
2 Doudouloale Duwen Dah? Sises mwahngih duwen aramas akan “ar pwunod akan oh sohte epwelparail, pwe re rasehng sihpw kei me sohte silepahr.” (Mad. 9:36) Duwehte Sises, kitail kak doudouloale ia uwen laud aramas akan ar anahne rongamwahwo. Ele kitail kak medemedewe uwen eh mwotomwotalahr ahnsou. (1 Kor. 7:29) Kitail kak doudouloale sapwellimen Siohwa doadoahk oh irair akan, atail pwais mwahu en wia emen Sounkadehdehn Siohwa. Oh pil atail pai kesempwal kan me kitail ahneki sang mehkan me kitail sukuhlki sang Mahsen en Koht me aramas tohto nan atail wasahn kalohk sohte kin ese duwe.—Mel. 77:11-13; Ais. 43:10-12; Mad. 13:52.
3. Ahnsou dah kan me ele mwahuwong doudouloale?
3 Iahd me Kitail en Doudouloale? Duwehte Sises, ekei kin pwourda nin sohrahn ni ahnsou me meleilei. Ekei kin diar me e mwahu ong irail en doudouloale ni soutik kan mwohn ar meirla. (Sen. 24:63) Mehnda ma atail koasoandi kin kedirepw, kitail kak diar ahnsou ong doudouloale. Ekei kin wia met ni arail kin iang mehn peidaid ong wehipokon me duwehte daksi ape. Ekei kin doadoahngki ekis ar ahnsoun kommoal en souwas pwehn wia met. Me tohto kin pil diar me doadoahngki ekis ahnsou pwehn doudouloale mwohn ar kohla kalohk kin sewese irail en kalohk ni ngoang oh eimah.
4. Dahme kahrehda kitail anahne doudouloale?
4 Kapakap oh doudouloale pahn kalaudehla atail ineng en papah Siohwa, sewese kitail en kilangwohng atail kaudok nin duwen me keieu kesempwal nan atail mour oh kakehlaka kitail en koasoanehdi teng en pousehla wia doadoahk en kalohk. Sapwellimen Koht Sounkalohk me keieu ngoang Sises, ketin paiekihda eh kin doudouloale oh pahn pil duwehte ih.