MOMOUR NIN DUWEN KRISTIAN KEI
Diar Peren nan Kalohki Rongamwahu
Mie pak ke diar me e apwal en kalohk? Tohto rehtail pahn sapengki ‘ei’ ong peidek wet. Dahme kahrehda? Mwein pwehki kitail kin kalapw tuhwong aramas me sohte perenki rong de kitail kin lelohng uhwong kan nan atail wasahn kalohk, de kitail kin masak koasoiong aramas me kitail sehse. Mehlel soahng pwukat kak katikala atail peren. Ahpw kitail kin kaudokiong Koht en peren me kin ketin kupwurki kitail en papah ih ni peren. (Mel. 100:2; 1 Tim. 1:11, NW) Ia kahrepe mwahu siluh ong en perenki kalohk?
Keieu, kitail kin lohkihda rohng en koapworopwor ehu. Mendahki koapworopwor kin wie tikitikla rahnwet, kitail kak audehkihda mohngiong en aramas akan “rongamwahu en popohl.” (Ais. 52:7) Ahpw rongamwahu en Wehin Koht pil kak audehkinkitailda peren. Mwohn omw pahn kohla kalohk, medemedewe duwen kapai kan me Wehin Koht pahn wahdo nin sampah.
Keriau, rongamwahu me kitail kin kalohki kin wia kamwahu ong en aramas akan arail roson oh arail nanpwungmwahu rehn Koht. Re kin sukuhlki en kesehla soahng kan me kin kauweirailla oh alehdi koapworopwor en mour soutuk. (Ais. 48:17, 18; Rom 1:16) Kitail kak medewe me kitail kin iang doadoahk en rapahki oh kapitala aramas akan. Mendahki ekei aramas sohte men pitila, kitail kin pousehlahte raparapahki irail kan me men pitila.—Mad. 10:11-14.
Kesiluh oh me keieu kesempwal, atail kalohk kin kawauwih Siohwa. E kin ketin uhdahn kesempwalki atail doadoahk en kalohk. (Ais. 43:10; Ipru 6:10) Patehng met, e kin ketikihong kitail ni kadek sapwellime manaman pwe kitail en kapwaiada doadoahk wet. Ihme kahrehda peki rehn Siohwa peren, me sapwellime manaman kin kapwarehda. (Kal. 5:22) Sang ni sapwellime sawas, kitail kak powehdi atail pwunod kan oh kalohk ni eimah. (Wiewia 4:31) Eri, mehnda ma aramas akan nan atail wasahn kalohk kin perenki rong de soh, kitail pahn diar peren nan atail pwukoa en kalohk.—Esek. 3:3.
KILANG KASDO REGAIN JOY THROUGH STUDY AND MEDITATION, OH SAPENGALA PEIDEK PWUKAT:
Dahme kahrehda kitail anahne mwohneki atail koasoandi en onop mehnda ma kitail kin doadoahngki awa tohto nan kalohk ehuehu sounpwong?
Ni soangen ahl dah kan me kitail en alasang Mary?
Ni ahnsou dah me ke kin koasoanehdi en doudouloale Mahsen en Koht?
Dahme kin wahdohng uhk peren ni omw kin kalohki rongamwahu?