Ihs me Kin Wia Kupwuren Siohwa Rahn Pwukat?
1. Iahd me kitail pahn tepida onopki pwuhken Ihs me Kin Wia Kupwuren Siohwa Rahn Pwukat? Ia duwen atail pahn paiekihda met?
1 Tepida sang wihk en October 28, kitail pahn onopki pwuhken Ihs me Kin Wia Kupwuren Siohwa Rahn Pwukat? ni Onop en Paipel en Mwomwohdiso. Kisin pwuhk kapw wet me kohda ni Mihting Tohrohr en “Kanahieng Omw Madamadau!” kin wiawihda pwehn kahluwa tohnsukuhl en Paipel kan ong sapwellimen Siohwa pwihn. Atail onopki pwuhk wet pahn kin kalaudehla atail kalahnganki atail iang kisehn sapwellime pwihn oh e pil pahn sewese kitail en esehla doadoahngki mehn doadoahk kesempwal wet ong kalohk.—Mel. 48:13.
2. Ia duwen atail pahn onop kisin pwuhk wet nan mwomwohdiso?
2 Ia Duwen Atail Pahn Onopki Met: Me wia onop pahn anahne koasoanehdi eh ahnsou pwehn mie ahnsoun koasoiapene ehuehu mehn kasukuhl. E pahn kasalehda mehn kasukuhl 28 ko koaros sang ni eh pahn wadek oaralap me mi ni peidek. Mwuri, e pahn luke sounwadawad en wadek tepin parakrap. Mwuri, me wia onop pahn idek rehn tohnmwomwohdiso peidek ehu me e kaunopada ong tepin parakrap. Mwurin mwo, wadek oh koasoiapene ehuehu wasa me tepikihda mesen nting mosul. Mwurin wadawad en wasao, me wia onop pahn idek ia duwen wasao eh kin sapengala peidek me wiahda oaralap en mehn kasukuhlo. Kitail kak koasoia kilel tohto me pil mi nan kisin pwuhk wet. Iren Paipel kesempwal kan anahne wadawad. Me wia onop pahn wia kousapahl ni eh pahn idek peidek kan me kileldi pah mwohn eh pahn doulahng mehn kasukuhl en mwurio. Ma mie koakon en “Kalaudehla Omw Esehla Duwen Met,” sounwadawad pahn wadek, oh mwuri, me wia onop pahn luke tohnmwomwohdiso ren koasoia ia duwen tohnsukuhl en Paipel men eh pahn paiekihda eh pahn idawehn kaweido. Ma miehte ahnsou ni kaimwiseklahn onop, me wia onop pahn doadoahngki oaralap en kasukuhlo ong peidek en kousapahl. Tamataman me kitail sohte anahne idawehn koasoandi wet ni atail doadoahngki kisin pwuhk wet ni atail onop Paipel rehn aramas.
3. Ia duwen atail pahn uhdahn paiekihda atail onopki kisin pwuhk wet?
3 Pwe kitail en uhdahn paiekihda, kitail anahne kaunopada mwahu ong mihting. Nantihong iang pasapeng. Ahnsou me koasoakoasoipene wiawi, medewehla ia kahrepen ireo eh wia kamwahu ong tohnsukuhl en Paipel kan. Atail onopki kisin pwuhk kapw wet ele pahn kaunopkitailda pwehn sewese meteikan ren iang kitail wia kupwuren Koht pwe ren pil ahneki koapworopwor en momour kohkohlahte.—1 Sohn 2:17.