Ia Duwen Atail Kak Kaunopada Tepin Koasoi Mwahu kan
1. Ia uwen kesempwal en doadoahngki tepin koasoi mwahu kan?
1 Duwehte omw songada kisin mwenge iou kin kahrehiong ken men kang mwengeo, tepin koasoi mwahu kin kahrehiong tohnihmw en men iang kitail en koasoakoasoi duwen Paipel. Uwen werei en tepin koasoi oh audepe kan kak wekpeseng. Ahpw duwehte atail kin kaunopada mwenge iou, ahnsou koaros kitail anahne kaunopada mwahu atail tepin koasoi kan. (Lep. Pad. 15:28) Dahme pahn sewese kitail en doadoahngki tepin koasoi mwahu kan?
2. Ia duwen atail kak kaunopada tepin koasoi mwahu kan?
2 Pilada Oaralap kan me Aramas Pahn Perenki: Atail tepin koasoi anahne kamwakid tohnihmw en men koasoakoasoi. Ma soh, e pahn men kauhdi amwa koasoi. Eri, ni omw pahn kaunopada omw tepin koasoi kan, medewe dahme aramas tohto nan omw wasahn kalohk kin medemedewe. Ia duwe, aramas tohto nan omw wasa kin medemedewe duwen koperment mwahu de mouren peneinei me nsenamwahu de ia duwen mahwen kan ar kak imwisekla? Pwehki aramas tohto men kasalehda arail madamadau, kaunopada mwahu peidek kan me kak kamwakid irail en koasoi. Ke kak doadoahngki ehu kisin padahk sang Atail Doadoahk ong Wehio oh wiahda ekei wekidekla kan pwe en mwahu ong omw wasahn kalohk? Ekei pak, ke sou wia kamwomwada kan ni amwail doadoahngki ekei tepin koasoi kan nan Kaudok en Peneinei?
3. Ia duwen atail kak wekidala atail tepin koasoi kan pwe en mwahu ong tiahk kan nan atail wasahn kalohk?
3 Medemedewe Duwen Tiahk: Nan ekei sahpw, aramas kin kasik me kitail pahn mwadang kasalehda kahrepen atail kin mwemweit rehrail. Ahpw nan ekei sahpw kan, aramas kin medewe me kitail sohte kasalehda wahu ma kitail sohte idek mahs ia iren tohnihmwo oh ma kitail sohte kasalehda duwen pein kitail. Nan ekei wasa kan, pwehki arail pelien lamalam, aramas tohto kin mweidohng kitail en koasoi ni saledek duwen Paipel nan atail tepin koasoi kan. (Wiewia 2:14-17) Ahpw nan wasa kan me pali laud en aramas kaidehn Kristian de sohte iang pelien lamalam, mwein e pahn mwahu en koasoia duwen Paipel ni ahnsou me kitail pahn pwurehng pwurala rehn tohnihmwo, a kaidehn ni ahnsou me kitail tepin tuhwong ih.—Wiewia 17:22-31.
4. Soahng dah kan me kitail anahne kanahieng duwen atail tepin koasoi kan?
4 Dahme Kitail Pahn Tepin Nda: Kaunopada mwahu dahme ke pahn tepin nda. E pahn keieu mwahu ken koasoi ni mwotomwot. Mwomwen atail koasoi pil kesempwal. Kasalehda omw ngoangki dahme ke koasoia. Kasalehda omw nsenohki tohnihmwo sang ni omw pohkomwokomw. Atail doadoahngki sawas pwukat pahn sewese kitail en kaunopada tepin koasoi mwahu kan me pahn kamwakid aramas tohto nan atail wasahn kalohk en tungoal ni karasaras sang ‘sapwellimen Siohwa tehpel.’—1 Kor. 10:21.