Koakon En Peidek

◼ Dahme seri kan anahne sukuhlki pwehn kekeirda oh koahiekla nin duwen Kristian?

Pahpa nohno Kristian kan kin doadoahk laud pwehn kakairada neirail seri kan “ni kaiahn oh madamadau en Siohwa.” (Ep. 6:4, NW.) Karasepe, pahpa nohno kan kin diarada me e mwahu en koasoiapene iren rahn rehn neirail seri kan ni menseng koaros. Nan arail kaudok en peneinei oh ahnsou teikan, peneinei kan kak kilang oh koasoiapene kasdo ehu, koasoiapene ire kan sang Young People Ask, de kamwomwada ehu poadopoad en Paipel, de kaunopada ong kalohk. Ahpw pwe seri kan en kekeirda oh koahiekla nin duwen Kristian, irail anahne sukuhlki padahk loal kan en Paipel.​—Ipru 6:1.

Nna medewehla dahme kitail kin padahkihong irail me kitail kin tuhwong nan wasahn kalohk. Ni atail tepin tuhwong irail de ni atail pwurehng pwurala, kitail kin song en tapiada onop en Paipel ni atail kin doadoahngki pwuhken Dahme Paipel Uhdahn Padahngki? Mwurin atail kanekehla pwuhko, kitail kin doadoahngki pwuhken “Dadaurete ni Limpoak en Koht.” Dahme kahrehda? Pwuhken Paipel Padahngki kin kihong tohnsukuhl kan tepin padahk kan en Paipel. Pwuhken “Limpoak en Koht” kin padahkihong irail ia duwen arail kak doadoahngki kaweid kan en Paipel nan arail mour ehuehu rahn. Onopki pwuhk riau pwukat kin sewese me kapw kan en “kekeirkihda” Krais oh arail “pwoson en kin kehlailla mehlel.” (Kol. 2:6, 7) Ia duwe, pwuhk pwukat pil sou pahn sewese noumw seri kan? Irail pil anahne sukuhlki duwen meirong en Krais, Wehin Koht oh irair en me melahr. Seri kan pil anahne ese dahme kahrehda Koht kin ketin mweidohng lokolok en mihmihte oh ia duwen arail kak ese me kitail kin mihmi nan imwin rahn akan en koasoandi suwed wet. Irail uhdahn anahne kamehlele me Sounkadehdehn Siohwa kan ahneki padahk mehlel. Me pwulopwul kan pil anahne wehwehki ire mehlel kan sang nan Paipel oh ia duwen arail kak kaiahnehda arail koahiek en madamadau pwe ren “eselahr wekpeseng en me mwahu oh me suwed.” (Ipru 5:14) Mehlel, pahpa nohno kan anahne medemedewe arail sounpar oh ia uwen arail kak wehwehki ire kan. Ahpw, seri tohto kin koahiek en tepida sukuhlki padahk loal kan en Paipel mendahki re uhdahn pwulopwul.​—Luk 2:42, 46, 47.