Alasang Soukohp akan—Nahum
1. Dahme kitail sukuhlkihsang pwuhken Nahum?
1 Mohn kahnimw en Ninipe kin kihda mehn kadehde me nin duwen me Nahum kohpada, Siohwa kin ketin kadeikada Sapwellime imwintihti kan oh pil imwintihti kan me keieu lemei sohte pahn kak pelianda Ih. (Nah. 1:2, 6) Ni atail kin tehk mwahu kokohp en Nahum, e kin kihda mehn kasukuhl ong kitail nan atail doadoahk en kalohk.
2. Ia duwen atail kak kolokol rohng me kitail kin weuwa en kin kansenamwahu?
2 Kihda Kamweit oh Koapworopwor: Ni omw tepin wadek pwuhk en Nahum e kin mwomwen ihte kawehwehda duwen kamwomwala ong wehin Ninipe, poasen kaun en wehin Asiria en mahs. (Nah. 1:1; 3:7) Ahpw pakairpen kamwomwala wet wia rohng mwahu ehu ong sapwellimen Siohwa aramas akan. Nahum me mware wehwehki “Kaloalamwahwihala” kin kamehlelehiong ienge mehn Suhs kan me ni ahnsou keren arail imwintihti kan pahn sohrala! Nahum pil doula kamehlelehong irail me Siohwa “ketin doandoare sapwellime aramas akan ni ahnsou apwal.” (Nah. 1:7) Ni atail kin kalohk, kitail pil kin ehukihong meteikan rohng me mwahu oh kangoange ren ale doareparail rehn Siohwa.—Nah. 1:15.
3. Ia duwen atail kak alasang Nahum ni atail doadoahngki mehn kahlemeng kan oh karasaras kan?
3 Doadoahngki Mehn Kahlemeng kan oh Karasaras kan: Siohwa ketin kamwakid Nahum en kapahrekiong kasohrlahn Ninipe ong kasohrlahn kahnimw en Isip me adaneki Dihpes me mehn Asiria kan kasohrala mwowe. (Nah. 3:8-10) Ni atail koasoiaiong emen duwen imwin koasoandi suwed en sampah wet, kitail kak kasansalehda kokohp en Paipel kan me kadehdehda me Siohwa kin ketin kapwaiada sapwellime mahsen kan koaros pil lella oaritik kan. Karasepe, ni mehn Papilon kan oh mehn Media kan ar kohdohng kalowehdi kahnimw en Ninipe nan pahr 632 mwohn Krais, keteu mosul kahrehiong Pillap en Daikris en dirda oh wudekla liki, kamwerehdi wasakis ni en kahnimw wet dihd kehlail kan. Irail eri mwadang kalowehdi Ninipe nin duwen me Siohwa ketin kohpada.—Nah. 1:8; 2:6.
4. Ia duwen atail pahn kak sansal oh wehwe mwahu nan atail doadoahk en kalohk?
4 En Sansal oh Wehwe Mwahu: En Nahum wiepen nting kin kawehwe ni sansal me kahrehiong aramas en mwomwen kak kilang dahme wiawi. Ire kesempwal me e men kasalehda kin sansal. (Nah. 1:14; 3:1) Duwehte met, kitail pil men doadoahngki soangen lokaia me mengei en wehwehki. (1 Kor. 14:9) Ni atail pahn tepin tuhwong tohnihmwo, kawehwehiong ni sansal kahrepen omw pwarala reh. Ni omw onop Paipel rehn emen, sewese en kakairada eh likih Siohwa oh sapwellime Mahsen, oh en wehwehki ia duwen ire kan eh kin pid duwen pein ih.—Rom 10:14.
5. Dahme kokohp en Nahum kamehlelehiong kitail?
5 En Nahum likih me sapwellimen Siohwa mahsen uhdahn pahn kin pweida kin uhdahn sansalda mwahu nan pwuhken Paipel wet pwon me weuwa edeo. Ni kaimwiseklahn en Sehdan eh koasoandi suwed wet eh kerkerendohr, kitail kin nsenamwahuki mahsen pwukat sang powe: “Kahpwal sohte pahn pwarada keriapak.”—Nah. 1:9, NW.