Sewese me Maskun kan Sukuhlki Duwen Siohwa
1. Ia duwen Sises eh kin ketin kasalehda poakehla me maskun kan?
1 Rahn keite mwohn Sises eh pahn ketin pwoula. Ni eh kohkohlahsang kahnimw en Seriko, ohl maskun riemen ngihl laudida patohwanohng: “Maing, . . . komw ketin kupwurei kiht!” Mendahki Sises ketin medemedewe kahpwal kan me e pahn ketin lelohng, e ketin uhdi oh malipeiradohng reh oh kamwahwihirala. (Madiu 20:29-34) Ia duwen atail kak kahlemengih sapwellimen Sises poakehla me maskun kan?
2. Ia duwen atail pahn kak kalohk ong me maskun men me kitail tuhwong nan wehipokon?
2 En Sawas: Ma ke tuhwong emen me maskun, ele nan wehipokon, kawehwehiong ih ihs kowe oh me ke pahn sewese ih. Pwehki aramas kin kalapw mwamwahliki me maskun kan, re kin kalapw perki mehkot. Ahpw ahmw kadekohng oh nsenoh mehlel pahn kameleileidi. Oh pil tamataman me irair en maskun kin wekpeseng oh met kak seweseiuk en ese uwen sawas me ke pahn kihda. Mwurin omw sewesehda me maskuno ele ke kak nda me ke kin iang kisehn doadoahk en kasukuhl en Paipel. Peki ma ke kak wadekohng ih ehu iren Paipel me duwehte Melkahka 146:8 de Aiseia 35:5, 6. Ma e kak wadek pwuhk me maskun kan kin doadoahngki (Braille), idek ma e pahn perenki ale nah soangen pwuhk wet me pahn sewese ih kalaudehla eh sukuhlki duwen Paipel. Ke pil kak sewese ih en alehdi soahng kan me e kak rongorong sang nan jw.org. Ma nah computero mie soahng kan me kin wadawad ong ih, e kak perenki ale ekei iren onop kan nan jw.org iangahki pwuhk kan me kak download nan RTF (Rich Text Format).—Menlau kilang kakon “Ni Omw Pahn Sewese me Maskun Men . . . ”
3. Ia duwen atail pahn kak rapahki me maskun kan nan atail wasahn kalohk?
3 Rapahki me Maskun kan: Kitail sohte kin kalapw tuhwong me maskun kan nan kalohk en ihmw lel ihmw pwehki me tohto irail kin perki koasoiong aramas men me re sehse me pwarala ni imwarail. Ihme kahrehda, kitail anahne doadoahk laud en “rapahki” me maskun kan pwe kitail en kak kalohk ong irail. (Madiu 10:11) Mie iengomw tohndoadoahk de tohnsukuhl me maskun? Tiengla mwowe oh koasoiong ih. Ma mie wasahn sukuhl ong me maskun kan nan atail wasahn kalohk, kihla ekei pwuhk me maskun kan kin doadoahngki (Braille) nan arail library. Ke ese emen me tohn eh peneinei maskun? Nan omw wasahn kalohk, mie pwihn kan me kin kihda soangen sawas kan ong me maskun kan de soangen wasa kan me kin sewese me maskun kan? Kawehwehiong tohn peneinei, tohndoadoahk me ke anahne tepin tuhwong nan wasa pwuko, de kaunen doadoahk en wasa pwukat, duwen Sounkadehdehn Siohwa kan ar nsenohki sewese me maskun kan oh kasalehda soangen pwuhk me maskun kan kak wadek de soahng kan me re kak rongorong. Kasalehiong ih inou en Paipel me Koht pahn kereniong ketikihsang maskun kohkohlahte. Ele ke pahn men kasalehiong ih kasdo sang jw.org me oaralape “Without It, I Would Feel Lost,” me kasalehda koasoipen ohl maskun men me paiekihda eh naineki Paipel me wiawihda ni soangen pwuhk me maskun kan kak wadek. Sang ni omw kawehwehiong ih kahrepen omw pwarala wasao, ele met pahn kamengeila omw pahn kak tuhwong me maskun kan wasao.
4. Iren mehn kasukuhl dah kan me kitail kak sukuhlkihsang dahme wiawiong Janet?
4 Emen sister maskun me adaneki Janet mwemweitla nan wasa ehu me mie ekei me maskun kan kin kousoan ie. E tepihada koasokosoi rehn emen peinakapw wasao. Janet padahkihong ih, “Sises ketin kamwahwihala aramas maskun pwehn kasalehda dahme e pahn ketin wiahiong me maskun kan koaros.” Ira koasoiapene Kaudiahl 21:3, 4, eri Janet kawehwehda ia duwen Wehin Koht eh pahn kapwaiada inou wet. Liho apw nennenla oh eri nda: “Saikinte pak ehu i rong ahn aramas maskun men madamadau ong ire wet. Pali moron en aramas me kak kilang wasa kin kamehlele me aramas maskun kan maskunla pwehki mie mehkot me irail de ar pahpa kahlap en mahs ako wia.” Janet kadaralahng liho email me mie link pwe en kak kohlahng nan pwuhken Paipel Padahngki, oh met ira kin onopki Paipel pak riau nan ehu wihk.
5. Mendahki atail sohte kak kamwahwihala me maskun kan duwehte me Sises ketin wia, atail kin kasalehda nsenohki me maskun kan pahn wahdo soangen kapai dah kan?
5 Mehlel, kitail sohte kak kamwahwihala aramas maskun kan duwehte me Sises ketin wia, ahpw kitail kak sewese irail kan koaros me koht suwed en sampah wet karotongehla ar lamalam, pil irail akan me sohte kak kilang wasa pwe re maskun, pwe ren wehwehkihda padahk mehlel kan sang Mahsen en Koht. (2 Kor. 4:4) Sises ketin kamwahwihala ohl riemeno me mi limwahn Seriko pwehki e ketin “kupwureirahla.” (Mad. 20:34) Ma kitail kasalehda soangen poakehla oh nsenohohte ong me maskun kan, kitail pahn perenkihda soangen kapai en sewese ekei en sukuhlki duwen Siohwa, meno me pahn ketikihsang douluhl maskun.