Mahsen Pwukat . . . En Uhdahn Mihla nan Mohngiongomw
Pahpa oh nohno kan duwehte sounsilepen sihpw kan. Re anahne apwalih mwahu neirail seri kan pwehki re mengei en salongala oh re luwet. (Lep. Pad. 27:23) Ia duwen pahpa oh nohno kan ar kak kapwaiada pwukoa wet? Re anahne kihong ahnsou en koasoiong neirail seri kan rahn koaros pwe ren esehda dahme mi nan mohngiong oh madamadau en neirail seri kan. (Lep. Pad. 20:5) Oh pahpa oh nohno kan pil anahne doadoahngki mehn kasukuhl kan pwehn kakairada pwoson en neirail seri kan. (1 Kor. 3:10-15) Kasdou “These Words . . . Must Be on Your Heart” (lokaiahn wai) kin kasalehda kesempwalpen kaukaule wia kaudok en peneinei. Kilangpene kasdo wet nin duwen peneinei ehu oh koasoiapene peidek pwukat.
(1) Dahme kahrehiong peneinei en Roman en sohla nsenohki arail nanpwungmwahu rehn Siohwa? (2) Dahme kahrehda e sohte pweida ahn Brother Roman eh tepin song wia kaudok en peneinei? (3) Iren kaweid en Paipel dah me keieu mwahu ong pahpa oh nohno kan en kak pweida ni arail kakairada neirail seri? (Deud. 6:6, 7) (4) Dahme kak sewese kamwahwihala koasoakoasoipene nan peneinei? (5) Soangen tounmetei dah me seri kan anahne arail pahpa oh nohno kan en wiahda? (6) Ia duwen Brother oh Sister Barrow ara wia mehn kahlemeng mwahu ong peneinei en Roman? (Lep. Pad. 27:17) (7) Dahme tapwin peneinei men anahne kaunopada mahs pwe kaudok en peneinei en kak pweida? (8) Ia duwen Brother Roman eh tepida wiahda wekidekla kan ong eh peneinei? (9) Dahme kahrehda kaukaule wia kaudok en peneinei kesempwal? (Ep. 6:4) (10) Ia ekei soangen mehn sawas kan me kak kadoadoahk ong kaudok en peneinei? (11) Ia duwen Brother Roman eh ni meleilei koasoi inen ong Marcus pwehn sewese ih en perenki kesempwalpen en wia dahme pwung? (Ser. 17:9) (12) Ia duwen Brother oh Sister Roman ara kawehwehiong Rebecca ni ara sewese ih en wiahda pilipil kan me pid nanpwungen ih oh Justin? (Mark 12:30; 2 Tim. 2:22) (13) Ia duwen Brother oh Sister Roman ara kasalehda pwoson ni ahnsou me ira wiahda wekidekla kan nan arail mour? (Mad. 6:33) (14) Ia duwen kasdo wet eh kasansalehda kesempwalpen tapwin peneinei kan en kin apwalih ahn arail peneinei nanpwungmwahu rehn Siohwa? (1 Tim. 5:8) (15) Nin duwen tapwin peneinei men dahme ke koasoanehdi en wia?
ONG TAPWIN PENEINEI KAN: Kasdo wet kohda ni mihting tohrohr kan en pahr 2011. Ni ahnsowo, ke tehkada ma mie anahnepen en kamwahwihala amwail kaudok en peneinei? Ah ia duwen ahnsou wet? Ma miehte anahn en kamwahwihala wekidekla kan, menlau ni kapakap wiahda wekidekla pwukat ong kamwahupen omw peneinei.—Ep. 5:15-17.