Kalaudehla Atail Koahiek nan Doadoahk en Kalohk​—Kangoange me Perenki Rong kan en Iang Towehda Mihting kan

DAHME KAHREHDA E KESEMPWAL: Mihting kan kin kihda ahnsou en kaukaule “koulki koul” ong Siohwa oh “kapinga ih.” (Mel. 149:1) Nan mihting kan kitail kin sukuhlki en wia kupwuren Koht. (Mel. 143:10) Irail me perenki rong kan oh tohnsukuhl en Paipel kan kin kalapw kekeirda mwahu ni ahnsou me re kin tepida iang towehda mihting kan.

IA DUWEN OMW PAHN WIA MET:

• Mwadang luke. Ke sohte anahne awih lao onop en Paipel koasoandier.​—Kaud. 22:17

• Kawehwehiong aramaso me perenki rong dahme e kak kasik oh dahme kitail pahn sukuhlki nan mihting en mwuhr. Soahng pwukat kak sawas: doaropwehn luhk ong mihting en mwomwohdiso, kisin kasdo, Dahme Kin Wiawi nan Atail Wasahn Kaudok?, oh iren mehn kasukuhl 5 oh 7 en kisin pwuhken Kupwuren Siohwa

• Kihda sawas. Ia duwe, me perenki rongo anahne mehn peidaid de sawas ong pilada likou me konehng? Mwohndi limwah erein mihtingo, oh ehukihong ih noumw pwuhk kan. Kahrehla pwehn tuhwong meteikan