Ehu wasa nan pwuhken Aiseia sang nan Dead Sea Scrolls nan kilel wet iei kawehwehn Aiseia ni lokaiahn Arab rahnpwukat. Mahsen en Koht poadoandoarla oh sohte wekila
Mahsen en Koht me Ntingdi Wekilahr?
Ekei aramas kin medewe ma sapwellimen Koht Mahsen me ntingdi wekilahr. Soukohp Aiseia koasoia me mahsen en Koht “kin mour poatopoat.” (Aiseia 40:8) Ia duwen atail kak kamehlele me sapwellimen Koht inou kan nekinekla mwahu oh kolokol pwungen mahseno?
Koht sapwellimanki kehl pwehn ketin nekidala sapwellime Mahsen oh ketin perehsang en dehr mwamwahlla. Mahso, ni ahnsou me doaropwehn Paipel kin pwurupwurehng ntingda, sounnting kan me kin doadoahk ni keneinei kin wadek lepin lokaia kan koaros me mi nan nting sarawio pwehn kilang ma mehlel sohte mehkot kapatapatohng, wekila, de kohsang. Ahpw aramas akan soh unsek, oh ekei sounnting ko wiahda kisin sapwung kan.
IA DUWEN ATAIL KAK KAMEHLELE ME PAIPEL EN RAHNPWUKAT AUDAUDKI MAHSEN EN KOHT DUWEHTE NIN TAPIO?
Mie Paipel kid kei me ntingda sang doaropwehn Nting Sarawi en mahs kan. Ma ehu Paipel pwukat kin mie kisin wekila kis loale, e kin mengei en diarada sapwungo ni emen eh pahn kapahrekiong Paipel teikan. Pwehn kalaudehla omw wehwehki duwen met, menlau kilang oaralapo “Has the Bible Been Changed or Tampered With?” ni lokaiahn wai me mi nan jw.org.
Medewe karasaras wet, doaropwe kan me adaneki Dead Sea Scrolls me bedouin kan diaradahr nan pwoahr kei me karanih Sehd en Mehla nan pahr 1947. Doaropwehn mahs pwukat audaudki ekei palien Paipel kan me mieier daulih sounpar 2000 samwalahro. Semen kan kin kapahrekihpene doaropwehn mahs pwukat oh Paipel en rahnpwukat. Dahme re diarada?
Semen kan diarada me audepen Mahsen en Koht me kitail naineki rahnwet kin duwehte nting en mahs ko.a Petehk keneinei en doaropwehn mahs kan me wereisang doaropwehn mahs teikan kin kadehdehda me dahme kitail wadek nan Paipel iei uhdahn mahsen en Koht duwehte nin tapio. Kitail kak kamehlele me Koht ketin nekidala mwahu ong kitail sapwellime Nting Sarawi kan pwehn kin pwung leledo ni atail ahnsou.
Eri kitail kak wadek Mahsen en Koht oh likih me e pwung. Pwehki kitail kamehlele met, kitail pahn uhd tehk dahme kitail kak sukuhlki duwen Koht sang rehn sapwellime soukohp kan.
a The Complete Dead Sea Scrolls in English, sang rehn Geza Vermes, pali 16.