Duwehte kaunen pesineso eh doadoahngki sekteri men pwehn ntingihada nah kisinlikou, Koht ketin doadoahngki aramas lelepek kei ren ntingihada Pwuhk Sarawi
Ia Duwen Sounkapikadao Eh Ketin Kasalehda Sapwellime Inou Limpoak kan
Sangete ni kepikipikdahn aramas akan, Sounkapikpatailo kin ketin mahseniong aramas akan sang ni eh kin ketin doadoahngki tohnleng kan oh soukohp kan. Patehng met, e ketin pilada sapwellime mahsen oh inou kan en ntingdi. Koht ketin inoukihda me kitail kak nsenamwahu ni ahnsou kohkohdo. Eri ia wasa ke kak diarada ie sapwellimen Koht inou kan rahnpwukat?
Sapwellimen Koht mahsen ong kitail mi nan Pwuhk Sarawi. (2 Timoty 3:16) Ia duwen Koht eh ketin doadoahngki soukohp kan ren ntingihedi sapwellime mahsen? (2 Piter 1:21) Koht ketikihong sapwellime madamadau nan madamadau en irail sounnting kan, me uhd ntingihedi mepwukat. Duwehte rahnwet. Ni karasaras, ma kaunen pesines men doadoahngki nah sekterio en ntingihada dahme e men koasoia ni ede, kitail kak kamehlele me nein kaunen pesineso kisinlikou mwo. Duwehte met, Koht ketin doadoahngki aramas ren ntingihedi sapwellime mahsen, ahpw Ih me ketin kamwakid ntingdahn Nting Sarawi pwukat.
SAPWELLIMEN KOHT MAHSEN MIE WASA KOAROS
Sapwellimen Koht mahsen uhdahn kesempwal me kahrehda e ketin kupwurki aramas koaros ren wadek oh wehwehkihla. Rahnwet sapwellime “rongamwahu soutuk” kak mwadang lelohng “wehi koaros oh keinek koaros oh lokaia koaros.” (Kaudiahl 14:6) Pwehki sapwellimen Koht kapai, aramas kak wadek rohng wet nan ekei pali de pali koaros en Nting Sarawi kan ni soangsoangen lokaia daulih 3,000. Met uhdahn tohtohsang pwuhk teikan koaros nan sampah me wiawihda.