Sounkapikpatail Limpoak Ketin Nsenohki Kitail

1. SOUNKAPIKPATAIL KETIN WIAHIONG KETIPIN EN DAKADA

Sohte me kak mour ma sohte ketipin. Ketipino kin kihda kehl ong tuhke kan pwehn kapwarehda teh kan, wahnrohs kan, wah kan, oh were kan. E pil kin wiahiong tuhke kan ren kin ihkikihda pihl kalewe kan sang nan pwehl kohda lel nan teh kan oh pwerda nan wehwe nin duwen toahkoi.

2. SOUNKAPIKPATAIL KIN KETIN KAMWEREHDI KETEU

Keteu iei kisakis kesempwal ehu sang rehn Koht me kin kahrehiong pwelen sampah en kawosehda mwenge ong kitail en kang. Koht ketikihong kitail keteu sang nanleng oh ahnsoun rahk, oh ketikihong kitail diren mwenge oh audehkihda mohngiongitail peren.

3. SOUNKAPIKPATAIL KIN KETIKIHDA MWENGE OH LIKOU

Tohto pahpa kan kin pwunodki rapahki mwenge me itar oh likou ong arail peneinei kan. Tehk dahme Paipel mahsanih: “Tehk mwahu menpihr en pahnlahng kan; re sohte kin kamwarak werentuhke de dolung de kin kihpene nan imwen nahk, ahpw Samamwail nanleng kin ketin katungoale irail. Kumwail sou kesempwalsang irail?”​—Madiu 6:25, 26.

“Tehk mwahu kiepw en nan mohs akan ni arail kin kekeirda . . . ; ahpw I ndaiong kumwail me [Nanmwarki] Solomon ni eh kapwatkihda eh lingan koaros, e pil sohte kaselel duwehte apwoat irail. A ma ih duwen Koht eh kin ketin kapwatahda dipwen nan mohs . . . , e sou pahn pil ketin kalikawihkumwailda?”​—Madiu 6:28-30.

Pwehki Koht kak ketikihong kitail mwenge oh likou, e uhdahn pil kak ketin sewese kitail en diar soahng teikan me kitail anahne nan atail mour. Ma kitail kin nantihong wia kupwuren Koht, e kak ketin kapaia atail kin nantihong padokedi mwenge de e kak ketin sewese kitail en diarada doadoahk pwe kitail en pwainda dahme kitail kin anahne.​—Madiu 6:32, 33.

Ni mehlel, mie kahrepe mwahu kan kitail en kin poakohng Koht ni atail kin kasawih ketipin, keteu, menpihr kan, oh wahnrohs kan. Oaralap en mwurin met pahn koasoia ia duwen Sounkapikpatail eh kin ketin mahseniong aramas akan.