Ih Me Ketin Wiahda Mehkoaros

M IE mehkot kaselel me I ese. Ke men rong duwe?— Kilang mahs pehmwen. Kihpene pehmwen. Nna pwekada mehkot. Pehmwen kak wia doadoahk mwahu tohto. Ke ese ihs me wiahda pehtail kan?—

Iei ih me ketin wiahda ewetail, tumwatail oh pil pwoaren masatail kan. Iei Koht, Semen Sounpadahk Lapalapo. Kitail sou kin perenki Koht eh ketikihong kitail pwoaren masatail kan?— Soahng tohto me kitail kak kilangki mesetail kan. Kitail kak kilang wahnrohs akan. Kitail kak kilang kisin tuhke kan oh pil pahnlahng. Kitail kak kilang kisin menpihr kan mwengemwenge duwehte nan kilel wet. E sou mwahu atail kin kak kilang soahng kaselel pwukat?—

Ihs me wiahda soahng pwukat? Aramas me wiahda? Soh. Aramas kak wiahda ihmw. Ahpw sohte aramas kak wiahda kisin tuhke kan. Aramas sohte kak wiahda kisin menpihr, wahnrohs de soahng me mour teikan. Ke ese duwen met?—

Koht me ketin wiahda soahng pwukat koaros. Koht me ketin wiahda lahng oh sampah. E pil ketin wiahda aramas. Ih me ketin wiahda tepin ohl oh lih. Sounpadahk Lapalap Sises me ketin mahsanih duwen met.​—Madiu 19:4-6.

Ia duwen Sises eh ese me Koht me ketin wiahda ohl oh lih? Ia duwe, Sises kilang Koht eh ketin wia met?— Ei. Sises patopato rehn Koht ni eh ketin wiahda ohl oh lih. Koht ketin wiahda Sises mwohn mehkoaros. Sises wia tohnleng men ni eh patopato nanleng rehn Semeo.

Paipel padahkihong kitail me Koht mahsanih: “Kita pahn wiahda aramas.” (Senesis 1:26, NW) Ke ese ihs me Koht mahmahseniong?— Sapwellime Ohlo. E mahmahseniong menet me patohdihdo nin sampah oh adanekihla Sises.

E sou kaperen? Nna song medewehla met. Ni atail kin rong Sises, kitail kin ale kasukuhl sang rehn emen me patopato rehn Koht ni Koht eh ketin wiahda sampah oh soahng teikan koaros. Sises sukuhlki soahng tohto ni eh patopato rehn Semeo oh kin wie doadoahk nanleng. Ihme kahrehda Sises me Sounpadahk Lapalapo.

Ke lemeleme Koht sohte kin ketin peren ni eh kelekelehpw mwohn e ketin wiahda sapwellime Ohlo?— Soh. Eri ma e kin ketin peren, dahme kahrehda e ketin wiahda soangen mour teikan?— E ketin wia met pwehki ih Koht limpoak men. E kupwurki meteikan en mour oh nsenamwahu. Kitail anahne kalahngankihong Koht mour me e ketikihong kitail.

Soahng koaros me Koht ketin wiahda kin kasalehda sapwellime limpoak. Koht ketin wiahda ketipin. Ketipin kin kihong kitail marain oh e pil kin kahrehda kitail en dehr pou. Soahng koaros pahn kopou oh e pahn sohte mour pohn sampah ma sohte ketipin. Ke sou perenki me Koht ketin wiahda ketipin?—

Koht pil ketin wiahda keteu. Keteu kin sewese wahnrohs kan en wosada. Eri ni atail pahn kilang wahnrohs kaselel kan, ihs me kitail pahn kalahngan ong?— Koht. Oh pil ihs me kitail anahne kalahngan ong ni atail kin kang wahn tuhke kan oh wahnsahpw me iou?— Kitail anahne kalahngankihong Koht pwehki ih me ketin wiahda ketipin oh keteu me kahrehiong soahng pwukat en wosada.

Dahme ke pahn nda ma emen pahn idek rehmw, ‘Koht me ketin wiahda aramas oh mahn akan?’— E pwung ma ke pahn nda: “Ei, Koht me ketin wiahda aramas oh mahn akan.” Ahpw ia duwen ma emen sohte kin kamehlele me Koht me ketin wiahda aramas? Ia duwen ma e nda me aramas kohsang mahn akan? Eri, Paipel sohte kin padahngki duwen met. E mahsanih me Koht me ketin wiahda soahng koaros me momour.​—Senesis 1:26-31.

Ahpw ia duwen ma emen ndaiong uhk me e sohte kin kamehlele Koht? Eri, dahme ke pahn nda?— Ke sou idilahng ehu ihmw oh idek reh: “Ihs me wiahda ihmwo?” Koaros ese me mie emen me wiahda ihmwo. Ihmwo sohte kak pein wiawihda.​—Ipru 3:4.

Kowe eri kahrehla aramaso ni ehu mwetuwel oh kasalehiong ih ehu wahnrohs. Idek reh: “Ihs me wiahda met?” Sohte aramas men kak wiahda rohs. Duwehte ihmwo me sohte pein wiawihda, wahnrohso pil sohte pein wiawihda. Koht me ketin wiahda.

Ndaiong aramaso en rong ngilen menpihr kan. Idek reh: “Ihs me wiahda menpihr kan oh padahkihong irail en koul?” Koht me ketin wiahda. Koht me ketin wiahda nanleng oh sampah oh soahng koaros me momour. Ih me kin ketikihda mour.

Ahpw emen kak nda me e kin kamehlele soahngkante me e kin kilangki mese. E kakete nda: ‘Ma I sohte kak kilang, eri I sohte kak kamehlele.’ Kahrehda ekei kin nda me re sohte kin kamehlele Koht pwehki re sohte kak kilang ih.

Mehlel me kitail sohte kak kilang Koht. Paipel mahsanih: “Sohte me kin kilangki Koht mese.” Sohte emen ohl, lih de seri nin sampah kak kilang Koht. Kahrehda sohte me pahn wiahda kilel de sansal en Koht. Koht pil ketin padahkihong kitail en dehr wiahda sansal en ih. E sohte pahn kaperenda Koht ma soahng pwukat kin mihmi nan imwatail.​—Eksodus 20:4, 5; 33:20; Sohn 1:18.

Ahpw ma ke sohte kak kilang Koht, ia duwen ahmw kak ese me Koht uhdahn mie? Medewe duwen met. Ke kak kilang kisinieng?— Soh. Sohte me kak kilang kisinieng. Ahpw ke kak kilang dahme kisinieng kin wia. Ke kak kilang tehn tuhke kan kin mwekid ni ahnsou me kisinieng kin ipir rahn tuhke kan. Met kahrehda ke kamehlele me mie kisinieng.

Ke pil kak kilang soahng kan me Koht ketin wiahda. Ni ahmw kin kilang wahnrohs de menpihr men, ke kin kilang mehkot me Koht ketin wiahdahr. Eri, ke kak kamehlele me uhdahn mie Koht.

Emen kak idek rehmw, ‘Ihs me wiahda ketipin oh sampah?’ Paipel mahsanih: “Koht tepin kapikada sampah oh mehkoaros me mi pahnlahng.” (Senesis 1:1) Ei, Koht me ketin wiahda soahng kaselel pwukat koaros! Ia ahmw pepehm duwen met?—

E sou kin kaperen en momour? Kitail kak rong koul kaselel en menpihr kan. Kitail kak kilang wahnrohs kan oh soahng teikan me Koht ketin wiahda. Oh kitail kak kang mwenge kan me Koht ketikihong kitail.

Eri, kitail anahne kalahngankihong Koht soahng pwukat koaros. Me keieu laud iei mour me e ketikihong kitail. Ma kitail uhdahn kalahngan ong Koht, eri mie mehkot me kitail pahn wia. Dahme kitail pahn wia?— Kitail pahn rong Koht oh wia dahme e ketin padahkihong kitail nan Paipel. Ni ahl wet, kitail kak kasalehda me kitail kin poakohng Ih me ketin wiahda soahng koaros.