Koht Tapiada Wiahda Mehkan

ME MWAHU koaros me kitail ahniki kohsang rehn Koht. E ketin wiahda ketipin pwe kitail en marainki ni rahn, oh maram oh usu kan pwen mie kisin marain ni pwong. Oh Koht ketin wiahda sampah pwe kitail en kousoan ie.

Ahpw ketipin, maram, usu kan oh sampah kaidehn me Koht keieun wiahda. Ke ese dahme e wiahda keieu? Koht ketin wiahda aramas duwehte pein ih. Kitail sohte kak kilang aramas pwukat, duwehte kitail sohte kak kilang Koht. Nan Paipel aramas pwukat adaneki tohnleng. Koht ketin wiahda tohnleng pwukat pwen iang ih kousoan nanleng.

Keieun tohnleng me Koht ketin wiahda iei emen me keieu kesempwal. Ih me sapwellimen Koht Ohl keieu, oh e kin iang Seme doadoahk. E sewese Koht wiahda mehkan koaros. E sewese Koht wiahda ketipin, maram, usu kan oh pil atail sampah.

Iaduen mwomwen sampah ni ansouo? Nin tapio sohte emen kak mihmi nan sampah. Sohte mehkot nan sampah, ihte pihl kalaimwun me kipehdi sahpw kan. Ahpw Koht kupwureki aramas en mihmi sampah. Ihme e tapiadahr kauonopada mehkan ong kitail. Dahme e ketin wia?

Eri, keieu sampah anahne marain. Koht eri wiaiong ketipin en sereda pohn sampah. E pil ketin wiahda pwen mie ni rahn oh ni pwong. Mwuhri Koht kahreong sahpw kan en pwarada pohn pihl en nan madau.

Nin tapio sohte mehkot pohn sahpw. E duwehte kilel me ke kilang nan pwuhk wet. Sohte wahn rohs kan de tuhke kan de mahn kan. Pil sohte mwahmw nan madau. Mie doadoahk tohto me Koht pahn wia pwen kauonopada sampah ong wasa kasehlel ehu pwe mahn oh aramas en kousoan ie.