Rohng Mwahu Uhdahn Kohsang Rehn Koht?

1. Paipel kohsang rehn ihs?

Rohng mwahu me aramas pahn kousoan nin sampah kohkohlahte ntingdi nan Paipel. (Melkahka 37:29) Paipel wiawihkihda kisin pwuhk 66. Koht ketin doadoahngki mpen ohl lelepek 40 pwehn ntingihedi pwuhk pwukat. Moses me ntingihedi tepin pwuhk limau en Paipel mpen sounpar 3,500 samwalahro. Wahnpoaron Sohn me ntingihedi kaimwiseklahn pwuhken Paipel daulih sounpar 1,900 samwalahro. Ahn ihs madamadau me sounnting kan en Paipel ntingihedi? Koht ketin doadoahngki sapwellime manaman pwe en kamwakid sounnting pwukat. (2 Samuel 23:2) Re ntingihedi sapwellimen Koht madamadau ahpw kaidehn pein arail. Eri, Paipel kin kohsang rehn Siohwa.​—Wadek 2 Timoty 3:16; 2 Piter 1:20, 21.

Kilang kisin kasdo Ihs Me Ketin Kaweid Ntingdahn Paipel?

2. Ia duwen atail kak kamehlele me Paipel kohsang rehn Koht?

Kitail ese me Paipel kohsang rehn Koht pwehki e kin kohpada ni pwung oaritik kan duwen ahnsou kohkohdo. Sohte aramas emen kak wia met. (Sosua 23:14) Koht Wasa Lapalahpie kelehpw me kak uhdahn ketin mwahngih dahme pahn wiawihong aramas ni ahnsou kohkohdo.​—Wadek Aiseia 42:9; 46:10.

Kitail pahn kasik me pwuhk ehu me kohsang rehn Koht pahn weksang pwuhk teikan oh met kin mehlel. Paipel lik kei wiawihdahr ni lokaia epwiki kei. Mendahki Paipel ntingdi mahsie, e kin pahrekiong dahme palien sains kadehdedahr me mehlel. Oh pil dahme sounnting 40 ko ntingihedi sohte kin uhpene. Patehng met, dahme Paipel mahsanih duwen limpoak kak kohsang rehn Koht mehlelo kelehpw, me iei Koht en limpoak, oh Paipel pil kin ahneki manaman me kak kamwahwihala mouren aramas. Ire mehlel pwukat kin kamehlelehiong aramas rar kei me Paipel iei Mahsen en Koht.​—Wadek 1 Deselonika 2:13.

Kilang kisin kasdo Ia Duwen Atail Kak Kamehlele me Paipel Mehlel?

3. Ia audepen Paipel?

Ehu ire kesempwal en Paipel iei rohng mwahu me Koht ketin kupwurki koasoandi limpoak ehu ong aramas. Paipel kawehwehda duwen kapai en mour nan paradais nin sampah eh salongala ni tepin poadopoad en aramas oh duwen paradais ehu eh pahn pwurehng kapwurpwurdo.​—Wadek Kaudiahl 21:4, 5.

Mahsen en Koht pil kin audaudki kosonned kan, mouren kosonned kan oh kaweid kan. Patehng met, Paipel kin kasalehda duwen sapwellimen Koht wiewia ong aramas. Sang sapwellime wiewia kan, kitail kak sukuhlki soangen Koht dah men ih. Eri, Paipel kak seweseiuk ken esehla Koht. E kawehwehda ia duwen omw kak wiahla kompoakepah.​—Wadek Melkahka 19:7, 11; Seims 2:23; 4:8.

4. Ia duwen omw kak wehwehkihla Paipel?

Pwuhk wet pahn seweseiuk ken wehwehkihla Paipel sang ni omw kin doadoahngki wiepe me Sises ketin doadoahngki. E kin ketin doadoahngki iren Paipel kan oh ketin kawehwehda Paipel.​—Wadek Luk 24:27, 45.

Rohng mwahu me kohsang rehn Koht uhdahn kaselel sang soahng teikan. Ahpw, ekei aramas sohte kin perenki, oh ong meteikan, e kin kalingeringerih irail. Dehr mworuskihla met. Omw koapworopwor en ahneki mour soutuk kin poahsoankihda omw esehla Koht.​—Wadek Sohn 17:3.