Kisinlikou Ehu Sang Rehn Koht Limpoak Men

MEHNIA pwuhk me ke keieu perenki? . . . Ekei seri kan kin pilada ehu pwuhk me kin koasoia duwen mahn akan. Meteikan kin pilada pwuhk me mie kilel tohto loale. E kin kaperen en wadek soangen pwuhk pwukat.

Ahpw pwuhk kan me keieu mwahu iei pwuhk kan me kin padahkihong kitail duwen dahme mehlel duwen Koht. Ehu rehn pwuhk pwukat me keieu kesempwal. Ke ese mehnia pwuhk mwo?— Met iei Paipel.

Dahme kahrehda Paipel uhdahn kesempwal?— Pwehki e kohsang rehn Koht. Pwuhk wet kin padahkihong kitail duwen ih oh duwen soahng mwahu kan me e pahn ketin wiahiong kitail. E pil kin kasalehiong kitail dahme kitail anahne wia pwehn kaperenda Koht. E kin duwehte kisinlikou ehu sang rehn Koht.

Koht kak ketin wiahda Paipel pwon nanleng oh ketikihong aramas. Ahpw e sohte ketin wia met. Audepen Paipel kohsang rehn Koht. Ahpw, e ketin doadoahngki sapwellime ladu kan pohn sampah pwehn ntingihdi pali laud en dahme mi nan Paipel.

Ia duwen Koht eh ketin wia met?— Iet karasaras kei me kak sewese iuk en wehwehki met. Ni ahnsou me kitail kin rong redio, kitail kak rong ngilen aramas men me mi wasa doh. Ni atail kin kilang kasdo, kitail kak kilang aramas teikan nan sahpw teikan oh rong ngilarail.

Ke ese me aramas kak leldahla nan maram oh irail kak koasoiong aramas nin sampah sang wasao?— Ma aramas kak wia met, Koht sou pil kak mahsendihdo sang nanleng?— Ei, e uhdahn kak. Oh e ketin wia met mahsie, mwohn redio oh kasdo miehla.

Moses iei emen ohl me iang rong ni ahnsou me Koht mahsen. Moses sohte kak kilang Koht, ahpw e kak rong ni en Koht wie mahmahsen. Aramas rar kei iang mi wasao ni ahnsou me met wiawi. Rahno Koht ketin kahrehiong nahnao en rerda oh nansapwe oh lioal en pir. Aramas ako ese me Koht me mahmahsen ahpw re uhdahn masepwehkada. Irail eri ndaiong Moses: “Komwi me en koasoiong kiht, se ahpw pahn rong; a ieremen Koht, pwe se de mehla.” Mwuhr Moses ntingihdi soahng kan me Koht mahsanih. Oh dahme Moses ntingihdi mi nan Paipel.​—Eksodus 20:18-21.

Moses me ntingihdi tepin pwuhk limau kan en Paipel. Ahpw kaidehn ih kelehpw me ntingihdi Paipel. Koht ketin doadoahngki mpen ohl 40 pwehn ntingihdi Paipel. Ohl pwukat kin momour mahsie oh arail ntingih Paipel nek mwurin sounpar tohto. Ntingdahn Paipel wiawihki sounpar 1,600 samwa! Dahme kapwuriamwei iei mendahki ekei ohl pwukat sohte kin tuhpene, soahng koaros me re ntingihdi kin pwungpene.

Ekei ohl kan me Koht ketin doadoahngki pwehn ntingihdi Paipel wia aramas ndand kei. Moses wia silepen sihpw men ahpw mwuhr ih me kin kahluwa wehin Israel. Solomon iei nanmwarki me keieu loalokong oh kepwehpwe nin sampah. Ahpw ekei sounnting kan en Paipel sohte wia aramas ndand kei. Eimwos kin apwalih wahn tuhke pik kan.

Emen sounnting en Paipel kin wia toahkte men. Ke ese ia ede?— Ede Luk. Pil emen sounnting kin wia sounrik daksis men. Ede Madiu. Pil emen kin wia soun sawas en kosonned en pelian lamalam en mehn Suhs akan. E ntingihdi pwuhk tohto en Paipel sang sounnting teikan. Ke ese ia ede?— Ede Pohl. Sapwellimen Sises tohnpadahk Piter oh Sohn pil wia sounnting kan en Paipel oh ira sounlaid kei.

Tohto irail sounnting kan en Paipel ntingihdi dahme Koht pahn ketin wia ni ahnsou kohkohdo. Ia duwen arail ese soahng pwukat mwohn eh pahn wiawi?— Koht me ketin padahkihong irail soahng pwukat. E ketin padahkihong irail dahme pahn wiawi.

Mwohn Sounpadahk Lapalap Sises eh ketido sampah, pali laud en Paipel ntingdier. Taman me Sounpadahk Lapalapo kin ketiket nanleng. E mwahngih dahme Koht ketin wiahier. Ia duwe, e kin ketin kamehlele me Paipel kohsang rehn Koht?— Ei.

Ni Sises eh kin mahsanihong aramas akan duwen doadoahk en Koht, e kin ketin wadek sang nan Paipel. Ekei pak e kin mahsanih ire kan en Paipel me e ketin wadlikihla. Sises pil ketin padahkihong kitail soahng teikan sang rehn Koht. Sises mahsanih: “Ihete me I pahn koasoia ong sampah: mehkan me I rongasangehr reh.” (Sohn 8:26) Sises karonge soahng tohto sang rehn Koht pwehki e kin patopato rehn Koht. Ia wasa me kitail kak wadek soahng pwukat me Sises mahsanih duwe?— Nan Paipel. Mahsen pwukat ntingdier pwe kitail en kin wadek.

Ni ahnsou me Koht ketin doadoahngki ohl pwukat en ntingihedi Paipel, irail doadoahngki lokaia kan me re kin lokaiahki. Pali laud en Paipel kin ntingdi ni lokaiahn Ipru, ekei wasa ni lokaiahn Aramaik, oh pil wasa tohto ni lokaiahn Krihk. Pwehki pali laud en aramas rahnwet sohte ese lokaia pwukat, Paipel kin kawehwehdi ni lokaia teikan. Rahnwet ekei pwuhk kan nan Paipel mi ni lokaia tohtohsang 2,260. Nna medewehla uwen tohtohn lokaia pwukat! Paipel iei kisinlikou ehu sang rehn Koht ong aramas wasa koaros. Mendahki Paipel kin kawehwehdi ni lokaia tohto, ahpw audepe kan kohsang rehn Koht.

Dahme Paipel kin mahsanih kesempwal ong kitail. E ntingdier mahsie. Ahpw e kin padahkihong kitail soahng kan me kin wiawi nan atail ahnsou. Oh e pil padahkihong kitail dahme Koht pahn ketin wia ni ahnsou kohkohdo. Dahme Paipel mahsanih kin inenen kaperen! E kihong kitail koapworopwor kaselel ehu.

Paipel pil kin padahkihong kitail soangen mour dah me Koht kupwurki kitail en ahneki. Paipel kin padahkihong kitail dahme pwung oh dahme sapwung. Kita koaros anahne ese met. E kin kasalehiong kitail duwen aramas akan me wiahda me suwed oh dahme wiawihong irail. Met kak sewese kitail en dehr lelohng kahpwal kan me re lelohng. E pil kasalehda duwen aramas akan me wiahda me mwahu oh e imwila mwahu ong irail. Mepwukat ntingdi ong kamwahupatail.

Pwe kitail en uhdahn paiekihda Paipel, kitail anahne ese pasapeng ong peidek wet: ‘Ihs me kihong kitail Paipel?’ Dahme ke lemeleme?— Ei, Paipel pwon kohsang rehn Koht. Eri, ia duwen atail kak kasalehda me kitail uhdahn loalokong?— Ni atail kin rong oh wia dahme Koht kin mahsanihong kitail.

Eri kitail anahne koasoanehdi ahnsou pwehn wadekpene Paipel. Ni atail kin alehdi kisinlikou sang rehn emen me kitail uhdahn poakohng, kitail kin pwurepwurehng wadek. E kesempwal ong kitail. Met pil duwehte Paipel pwehki e wia kisinlikou ehu sang rehn Ih me keieu poakohng kitail. E wia kisinlikou ehu sang rehn Koht limpoak men.