Iren Mehn Kasukuhl 1

Iaduwen Komw Pahn Kak Diarada Dahme Koht Kupwurki Kitail en Wia

Ire kesempwal dah me diarek nan Paipel? (1)

Paipelo kohsang rehn ihs? (2)

Dahme kahrehda ke anahne onop Paipelo? (3)

1. Paipel iei kisakis kesempwal ieu me kohsang rehn Koht. E duwehte kisin likou ieu me pahpa limpoak men kihong nah seri kan. E kin padahkiong kitail dahme mehlel me pid duwen Koht—ihs Ih, oh ia sapwellimen koasondi kan. E kin kawehwehda iaduwen kitail kak powehdi kahpwal kan oh iaduwen kitail kak diarada peren mehlel. Paipel kelepw kin padahkiong kitail dahme kitail pahn anahne wia pwehn kaperenda Koht.—Melkahka 1:1-3; Aiseia 48:17, 18.

2. Mpen ohl 40 ntingihdi Paipelo erein sounpar 1,600, tepida ni pahr 1513 B.C.E. E wiawikihda pwuhk tikitik 66. Koht me kamwakid irail kan me ntingihdi Paipelo. Irail ntingihdi sapwellime lamalam kan, kaidehn pein arail lamalam. Eri, Paipel kin kohsang rehn Koht en nanleng, kaidehn aramas nin sampah.—2 Timoty 3:16, 17; 2 Piter 1:20, 21.

3. Koht kin apwalih mwahu Paipelo en ntingihdi pwung oh mihmih lao lel atail ahnsou. Sohte ehu pwuhk kerenih Paipel ni wen tohto en me wiawihdahr. Kaidehn aramas koaros pahn perenki kilang me ke sukuhlki Paipel, ahpw ke dehr mweidong met en kauiukidihsang omwi onop Paipelo. Omwi mour ni ahnsou kohkohdo pahn poahsoankihda omwi esehla Koht oh kapwaiada sapwellime kupwur kan, edetehn komw lel kihiong kahpwal kan.—Madiu 5:10-12; Sohn 17:3.