Siohwa Kin Ketin Poakohng Aramas Mwakelekel

“Omwiomw. Kamwakelehda omw pere. Koakoahk. Kesehla kihd.” Pahpa nohno tohto kin padahkihong neirail seri kan ia duwen arail pahn kin mwakelekel ni paliwar. Ahpw, kaweid kan duwen mwakelekel kin pwildohsang rehn atail Koht sarawio. (Eks 30:18-20; Deu 23:14; 2Ko 7:1) Ni atail kin kolokol mwakelekel en paliwaratail oh atail kepwe kan, kitail kin kawauwih Siohwa. (1Pi 1:14-16) Ahpw ia duwen imwatail kan oh wasa kan me pidakihpene? Weksang aramas me kin kesehla kihd pohn ahl akan oh nan wasahn mwemweit kan, Kristian akan kin nantihong en dehr kasaminehla sampah. (Me 115:16; Kau 11:18) Mehnda ma pil soahng tikitik kan, me duwehte atail kin kesehla kilin kirahka kan, tehn pwoaht en saida, de pwilis, met kak kasalehda mwomwatail me pid mwakelekel. Soahng koaros me kitail kin wia nan atail mour, kitail kin men ‘kasalehda me kitail sapwellimen Koht sounpapah kan.’—2Ko 6:3, 4.

KILANG KISIN KASDO GOD LOVES CLEAN PEOPLE, OH MWURI SAPENGALA PEIDEK PWUKAT:

• Soangen kahrepe dah kan me ekei ele kak kihda pwehki ar sohte kin kamwakele arail kepwe kan?

• Ia duwen Kosonned en Moseso eh kasalehda mwomwen Siohwa eh kin ketin kilangwohng mwakelekel?

• Ia duwen atail kak wadohng Siohwa kaping ni atail sohte kin ndahte?