MOMOUR NIN DUWEN KRISTIAN KEI
Kilengwohng Pein Kowe Duwehte Siohwa
“[Siohwa] kin kupwurperenki sapwellime aramas akan.” (Me 149:4) Mendahki kitail sohte unsek, e kin ketin mahsanih atail irair mwahu kan oh dahme kitail kak wia ni ahnsou kohkohdo. Ahpw, ekei pak kitail kakete apwalki ahneki soangen madamadau toupahrek wet duwen pein kitail. Kitail kakete pehm me sohte katepatail pwehki dahme meteikan kin wiahiong kitail. De, ma kitail kin medemedewehte atail sapwung en mahs kan, kitail kakete peikasalki ma Siohwa uhdahn ketin poakohng kitail. Dahme kak sewese kitail ni atail ahneki soangen pepehm pwukat?
Tamataman me Siohwa kin ketin mahsanih dahme aramas sohte kak kilang. (1Sa 16:7) Met wehwehki me e kin ketin mahsanih dahme pein kitail sohte kak kilang rehtail. Kitail kalahnganki me Paipel kin sewesei kitail en wehwehki duwen Siohwa eh kin ketin mahsanih kitail. Kitail kak wehwehki met ni atail kin wadek iren oh koasoipen Paipel kan me kasalehda ia uwen Siohwa eh ketin poakohng sapwellime tohnkaudok kan.
KILANG KISIN KASDO PERSUADE YOUR HEART BEFORE JEHOVAH, OH MWURI SAPENGALA PEIDEK PWUKAT:
Dahme karasaras en sounweiren tang men oh eh pahpao padahkihong kitail duwen Siohwa eh kin ketin mahsanih kitail?
Ma aramas emen me wiahda dihp laud wia dahme anahn pwehn kamwahwihala eh nanpwungmwahu rehn Siohwa, ia duwen eh kak kamehlelehiong pein ih me Koht ketin poakohng?—1So 3:19, 20
Ia duwen brothero eh paiekihda eh wadek oh doudouloale duwen koasoipen Depit oh Seosopat?