Dahme Kahrehda Koht Sohte Kin Ketin Sapeng Kapakap Koaros?

Samatail nanleng, Siohwa Koht, kin ketin kupwurki karonge oh kupwurperenkihda atail kapakap kan me kohsang nan atail mohngiong. Ahpw Koht sohte kin ketin sapeng soangen kapakap koaros. Dahme kahrehda, oh dahme kitail anahne tamataman ni ahnsou me kitail kin kapakap? Iet ekei kaweid sang nan Paipel.

Pwihn ehu nan imwen sarawi, ndinda kapakap ehu sang nan pwuhken kapakap.

“Ni amwail pahn kin kapakap, dehr pwurepwurehng ndinda soahng tehieu.”—Madiu 6:7.

Siohwa sohte ketin kupwurki kitail en kapwukapwurehiong soangen kapakap tehieu me kitail wadlikihala de wadek sang nan pwuhken kapakap ehu. Ahpw, e ketin kupwurki kitail en patohong ih sang nan atail mohngiong. Medewehla ia uwen eh kapwang en rong kompoakepahmw men eh kin kapwukapwurehiong soangen lepin lokaia keite ahnsou koaros oh rahn koaros ni eh pahn koasoiwei! Kompoakepah mwahu kan kin kasalehda arail madamadau ni sansal oh ni mehlel. Ni atail kin doadoahngki pein atail lokaia pwehn kapakap ong Koht, met pahn kasalehda me kitail kin wiahki Koht kompoakepatail.

Ohl emen kilikilengda powe ni eh korkorehd ticket en usuhs ehu.

“A ni amwail kin peki, kumwail sohte kin ale pwehki kumwail kin peki ong ni kahrepe sapwung.”—Seims 4:3.

Uhdahn kitail sohte pahn kasik me Koht pahn ketin sapeng atail kapakap kan ma kitail peki soahng kan me kitail ese e sohte kupwurki kitail en wia de ahneki. Karasepe, ma emen kin pilein mwohni oh kapakapki paiamwahu, ia duwe, Siohwa pahn ketin sapeng eh kapakap? Koht ketin padahkihong kitail ni sansal me kitail en dehr noahrok oh dehr kamehlele soahng kan me sohte mehlel, duwehte paiamwahu (lucky). (Aiseia 65:11; Luk 12:15) Uhdahn kitail sohte kak kasik me Siohwa pahn ketin sapeng soangen kapakap pwukat! Pwe Koht en ketin sapeng atail kapakap, kitail anahne tehk mwahu pwe atail pekipek kan en pahrekiong dahme e ketin padahkihong kitail sang nan Paipel.

Sounpadahk en pelien lamalam ehu wie kapakapki pwihnen sounpei ehu.

“Ma ke sohte peikiong kosonned, Koht pahn ketin kalahdeki karonge omw kapakap akan.”—Lepin Padahk 28:9.

Ni ahnsou kan en Paipel, Koht sohte kin ketin sapeng irail kan me sapeikiong sapwellime kosonned pwung kan. (Aiseia 1:15, 16) Koht sohte ketin wekila. (Malakai 3:6) Ma kitail men Koht en ketin sapeng atail kapakap kan, kitail anahne wia uwen atail kak en peikiong sapwellime kosonned kan. Ahpw ia duwen ma kitail wiahda soahng suwed kan mahso? Met kin wehwehki me Siohwa sohte mwahn pahn ketin karonge kitail? Soh douluhl! Ni limpoak, Koht pahn ketin mahkohng kitail ma kitail kasalehda atail koluhkihla soahng suwed me kitail wiahda ko oh wia uwen atail kak en kaperenda kupwure.—Wiewia 3:19.