Iahd me Imwio Pahn Leledo? Dahme Sises Mahsanih

MEDEWE MAHSEN RIAU KAT ME SISES MAHSANIHEKI DUWEN IMWIO:

“Kumwail eri pousehlahte mwasamwasahn pwe kumwail sehse rahno de awao.”​—MADIU 25:13.

“Kumwail pousehlahte mwasamwasahn oh pepehd pwe kumwail sehse ahnsou me koasoandiero.”​—MARK 13:33.

Sohte emen nan sampah me ese ahnsou me koasoandi en mwehi wet pahn sohrala. Ahpw, Koht ketin koasoanedier ahnsowo, “rahno de awao” me imwio pahn leledo. (Madiu 24:36) Met wehwehki me sohte douluhl emen kak ese iahd me imwio pahn kereniong leledo? Uhdahn soh. Sises ketin padahkihong sapwellime tohnpadahk ko ren tehk ekei mwekid kan me pahn kasalehda me imwio kerendohr.

KILEL EN MET

Mwekid pwukat pahn wia kilel en “imwin koasoandi en mwehi wet.” Sises mahsanih: “Ehu tohnwehi pahn mahweniong ehu tohnwehi oh ehu wehi pahn mahweniong ehu wehi, oh ehuehu wasa lehk lapalap oh rerrer en sahpw pahn kin wiawi.” (Madiu 24:3, 7) E pil mahsanih me e pahn mie “soumwahu lusulus.” (Luk 21:11) Ke kin kilang mwekid pwukat me Sises ketin kohpadahr?

Rahnwet aramas akan kin lokolok pwehki mahwen, duhpek, oh rerrer en sahpw oh pil ehu soumwahu mwurinte ehu. Karasepe, nan pahr 2004 lapalahn rerrer en sahpw ehu wiawi nan Sehden India me kahrehda ilok laud ehu me kemehla aramas 225,000 samwa. Erein sounpar siluh, soumwahu lusulus ehu me adaneki COVID-19 kemehla aramas wenerar duwelopw samwa nan sampah pwon. Sises mahsanih me soangen mwekid pwukat pahn kasalehda me imwin koasoandi en mwehi wet kerendohr.

“IMWIN RAHN AKAN”

Paipel kin kahdaneki ahnsou ehu me pahn wiawi mwohnte imwio eh pahn leledo iei “imwin rahn akan.” (2 Piter 3:3, 4) Keriaun Timoty 3:1-5 kasalehda me imwin rahn akan pahn sansalkihda en aramas akan ar sohla kin wia tiahk mwahu. (Kilang koakon “Mwohnte Imwin Sampah.”) Ke kin kilang aramas akan ar kin roporop, noahrok, lemei oh sohte kin limpoakpene? Met pil kasalehda me kitail kerenlahngehr imwin sampah.

Ia uwen werei me imwin rahn akan pahn wiawihki? Paipel mahsanih me ‘ni ahnsou mwotomwot.’ Mwuri Koht pahn ketin kasohrehla “irail kan me kin kauwehla sampah.”​—Kaudiahl 11:15-18; 12:12.

PARADAIS NIN SAMPAH KERENDOHR!

Koht ketin koasoanedier rahno oh awao, ahnsou me e pahn ketin kasohrehla koasoandi suwed en mwehi wet. (Madiu 24:36) Ahpw, pil mie rohng mwahu, Koht “sohte kin ketin kupwurki emen en kasohrala.” (2 Piter 3:9) E kin ketikihong kitail ahnsou mwahu kitail en sukuhlki duwen kupwure oh peikiong ih. Dahme kahrehda? Pwehki e ketin kupwurki kitail en pitsang imwin sampah wet, oh kitail en momour nan sapwellime sampah kapw ni ahnsou me sampah pahn wiahla paradais.

Koht ketin wiadahr koasoandi en kasukuhl nan sampah pwon pwehn sewese aramas akan ren ese ia duwen ar kak iang mi nan sampah kapwo pahn kaundahn sapwellime Wehio. Sises ketin mahsanih me rongamwahu en Wehin Koht pahn “lohkseli wasa koaros me aramas kin mi ie nin sampah.” (Madiu 24:14) Nan sampah pwon Sounkadehdehn Siohwa kan kin doadoahngkihla awa lik kei pwe ren kalohkohng oh padahkihong aramas akan rohng en koapworopwor sang nan Paipel. Sises mahsanih me doadoahk en kalohk wet pahn wiawi nan sampah pwon mwohn imwio eh pahn leledo.

En aramas akan kaunda pahn kereniongehr imwisekla. Ahpw rongamwahwo iei ke kak pitsang imwin sampah oh iang mi nan Paradais nin sampah me Koht ketin inoukidahr. Iren mwurin met pahn koasoia ia duwen omw kak iang mi nan sampah kapwo.