Ia Duwen Omw Kak Kousoan nan Sampah Kapwo

Iren mwowe ko kasalehda me kereniongehr Koht pahn ketin kasohrehla sampah wet, met kin dokedoke aramas suwed kan, iangahki kahpwal kan me re wiahda. Kitail kak kamehlele me met pahn pweida. Dahme kahrehda? Pwehki Mahsen en Koht, Paipel, inoukihda:

“Sampah . . . pahn sohrala.”—1 SOHN 2:17.

Kitail kak kamehlele me mie me pahn pitila pwehki iren Paipel me mi poweo pil inoukihda:

“Mehmen me kin wia kupwuren Koht pahn mour kohkohlahte.”

Kahrehda ma kitail men pitila, kitail anahne wia kupwuren Koht. Pwe kitail en ese ia kupwuren Koht, kitail anahne esehla mahs ih.

PITSANG IMWIO NI OMW ‘ESEHLA’ KOHT

Kilel kan: 1. Tohndoadoahk en imwen wini men mwohndi pohn taht en imwen winio, mesen pwang oh pwunod. 2. E kohla kommoal ni wasahn mwengeo oh tehkada ienge tohndoadoahko eh masperen wadewadek pwuhk ehu. 3. Ienge tohndoadoahko wadekohng ih iren Paipel ehu oh kihong ih ehu jw.org contact card.

Sises mahsanih: “Met wehwehki mour soutuk, arail pahn eseikomwihla, me komwihte me Koht mehlel.” (Sohn 17:3) Pwehn pitsang ni imwio oh mour kohkohlahte, kitail anahne ‘esehla’ Koht. Met wehwehki laudsang en kamehlelehte Koht de esehte ekei ire mehlel kan duwen ih. Kitail anahne kompoakepahnki ih. Ma kitail men kakehlaka atail nanpwungmwahu rehn kompoakepatail kan, kitail kin anahne kalapw patehng irail. Atail nanpwungmwahu rehn Koht pil duwehte met. Medewe padahk mehlel kan me kitail kin sukuhlkihsang nan Paipel me kin sewese kitail en kakairada oh kolokol atail nanpwungmwahu rehn Koht.

Padahk Mehlel kan me Kitail Sukuhlkihsang nan Paipel

Kitail sukuhlkier me Koht ketin kupwurki kitail en mour nan Paradais.

E ketin kapikada tepin aramas ko, Adam oh Ihp oh ketkinirahdi nan wasa kaselel ehu me adaneki mwetuwel en Ihden. Ira unsek oh Koht ketikihong ira mehkoaros me ira anahne pwe ira en ahneki mour nsenamwahu. Ira kak mour kohkohlahte. Ma ira wiahte kompoakepahn Koht, ira sohte pahn mehla. Ahpw ira pilada ira en sapeikiong kehkehlik mengei ehu me Koht ketikihong ira.

Kitail sukuhlkier dahme kahrehda kitail kin lokolok.

Sang ni eh sapeikiong Koht, tepin aramaso Adam sohla kak mour kohkohlahte oh pil aramas teikan koaros. Paipel kawehwehda: “Sang rehn aramas tehmen dihp leledohng sampah oh mehla sang ni dihp, ihme kahrehda mehla lelohngehr aramas koaros.” (Rom 5:12) Duwehte aramas emen me kakete sohsohki soumwahu ehu sang rehn eh pahpa oh nohno, nein Adam seri kan koaros sohsohki soh unsek sang reh. Kahrehda kitail kin mahla oh mehla.

Kitail sukuhlkier dahme Koht ketin wiadahr pwehn sewese kitail.

Paipel mahsanih: “Koht uhdahn ketin poakohng sampah ihme e ketikihdohki sapwellime Iehros, pwe mehmen me kin kasalehda eh pwoson ih en dehr mwomwla ahpw en ahneki mour soutuk.” (Sohn 3:16) Koht ketin poaronehdo Sises nin sampah pwehn ketikihda sapwellime mour ong kitail. Me pid mwekid en limpoak wet, ohlen India men me mahki sounpar 86, me adaneki Prabhakar koasoia: “Met kasalehda sapwellimen Siohwaa limpoak laud ong ie. Sapwellime limpoak kihong ie koapworopwor en mour soutuk.”

Kitail sukuhlkier duwen atail kak kasalehda atail kalahnganki dahme Koht ketin wiadahr ong kitail.

Paipel mahsanih me kitail kak kasalehda atail kalahnganki dahme Koht ketin wiadahr ong kitail, sang ni atail kin “kapwaiada sapwellime kehkehlik kan.” (1 Sohn 2:3) Ni limpoak Siohwa Koht ketin kasalehiong kitail dahme kitail kak wia pwe kitail en pereperenki mour ni ahnsou wet. (Aiseia 48:17, 18) Koht sohte ketin kupwurki kitail en kin lokolok. E ketin inoukihda me ma kitail pahn idawehn sapwellime kaweid, kitail sohte pahn pereperenkihte mour ni ahnsou wet ahpw kitail pil kak mour kohkohlahte.

WADEK MAHSEN EN KOHT, PAIPEL, EHUEHU RAHN

Tohndoadoahk en imwen winio kilikilengdalahng nanleng mwurin eh wadek Paipel ahnsou me e kommoal en souwas. — Ke kak pitsang imwin sampah sang ni omw kapakapki sapwellimen Koht sawas oh wia kupwure

Kitail kin mwenge pwe kitail en kak mour. Ahpw Sises mahsanih: “Kaidehn pilawahte me aramas kin anahne mourki, pwe mahsen koaros me pwilsang ni doauesen Siohwa.”—Madiu 4:4.

Rahnwet, kitail kin diar sapwellimen Siohwa mahsen kan nan Paipel. Ni omw onopki pwuhk sarawi wet, ke pahn esehla dahme Koht ketin wiadahr mahso, dahme Koht ketin wiewia ni ahnsou wet oh dahme e pahn ketin wia ni ahnsou kohkohdo.

KAPAKAP ONG KOHT PEKI SAWAS

Dahme ke kak wia ma ke men idawehn sapwellimen Koht kaweid ahpw ke diarada me e apwal en uhdihsang wia soahng kan me e mahsanih me suwed? Ma ih duwen met, omw esehla Koht kak uhdahn seweseiuk.

Medewehla duwen lih emen me kitail pahn kahdaneki Sakura, e kin wia tiahk samin kan. Ni ahnsou me e tepida onopki Paipel, e esehda duwen sapwellimen Koht kehkehlik en “tangasang tiahk samin me pid wia nsenen pwopwoud.” (1 Korint 6:18) Sakura kapakapohng Koht oh peki kehl oh e uhdihsang wiewia samin wet. Ahpw e kin anahnehte peiong kasongosong kan. E koasoia, “Ma madamadau samin kin pwarada nan moangeiet, I kin kapakapohng Siohwa ni mehlel, pwehki I ese me I sohte kak kelehpw peiong met. Manaman en kapakap kahrehiong ei karanihala Siohwa.” Duwehte Sakura, aramas rar kei kin esehla Koht. E kin ketikihong irail kehl me re anahne pwe ren wekidala ar mour oh mour ni ahl me kin kaperenda kupwure.—Pilipai 4:13.

Uwen laud en omw esehla Koht, ih uwen laud en Koht eh pahn ketin mwahngihiukala duwehte kompoakepah kesempwal men. (Kalesia 4:9; Melkahka 25:14) Eri ke pahn kak pitila oh pedolong nan sapwellime sampah kapwo. Ahpw ia pahn mwomwen sampah kapwo? Iren mwurin met pahn kawehwehda.

a Siohwa iei mwaren Koht me sansalda nan Paipel.