Wehwehki Koasoandi en Tapwi nan Mwomwohdiso

1. Ia ehu kahrepe me sapwellimen Siohwa peneinei kin miniminpene?

KITAIL kin perenki wia kisehn sapwellimen Siohwa peneinei. Dahme kahrehda kitail kin meleilei oh miniminpene? Ehu kahrepe iei me kitail koaros kin wia uwen atail kak en wauneki koasoandi en tapwi me Siohwa ketin wiahda. Ni mehlel, ni atail kin wehwehkihla mwahu koasoandi wet, atail miniminpene kin laudla.

2. Peidek dah kan me kitail pahn sapengala nan iren onop wet?

² Nan iren onop wet, kitail pahn koasoiapene ihs me ahneki manaman nan mwomwohdiso. Kitail pahn pil koasoiapene pasapengpen peidek pwukat: Pwukoa dahieu me Siohwa ketikihong sister kan? Mehlel me brother koaros iei tapwin sister kan koaros? Manaman me elder kan ahneki pohn brother oh sister kan kin duwehte manaman me pahpa men ahneki pohn eh pwoud oh nah seri kan? Keieu, kitail pahn tehkpene ia duwen atail pahn kin kilangwohng sister kan.

IA DUWEN ATAIL PAHN KIN KILANGWOHNG SISTER KAN?

3. Ia duwen atail kak kalaudehla atail kesempwalki doadoahk kan me sister kan kin wia?

³ Kitail kin kesempwalki riatail lih Kristian kan me kin doadoahk laud pwehn apwalih arail peneinei, kalohki rongamwahwo, oh sewese meteikan nan mwomwohdiso. Kitail kak kalaudehla atail kesempwalkin irail sang ni atail kin medewe duwen mwomwen Siohwa oh Sises ara kin ketin kilangwohng irail. Kitail pahn pil paiekihda atail tehkpene mwomwen ahn wahnpoaron Pohl wiewia ong lih akan.

4. Ia duwen Paipel eh kasalehda me Siohwa kin ketin kesempwalki lih akan iangahki ohl akan?

⁴ Paipel kasalehda me Siohwa kin ketin kesempwalki lih akan iangahki ohl akan. Karasepe, e kasalehda me ni mwehin wahnpoaron ko, Siohwa ketikihong lih akan oh ohl akan sapwellime manaman pwe ren kak wia soahng kapwuriamwei kan, duwehte lokaiahki soangsoangen lokaia kan. (Wiewia 2:1-4, 15-18) Irail koaros keikihdi sapwellimen Koht manaman oh pahn iang Krais kaunda. (Kal. 3:26-29) Lih akan iangahki ohl akan pahn alehdi keting en mour kohkohlahte nin sampah. (Kaud. 7:9, 10, 13-15) Oh ohl oh lih akan pwukoahki kalohki oh padahngki duwen rongamwahwo. (Mad. 28:19, 20) Karasepe, pwuhken Wiewia koasoia duwen sister men me adaneki Persila. Ih oh eh pwoudo, Akwila, kawehwehda padahk mehlel ni pwung ong Apolos me ale sukuhl laud.​—Wiewia 18:24-26.

5. Ia duwen Luk 10:38, 39, 42 eh kasalehda me Sises kin ketin wauneki lih akan?

⁵ Sises kin ketin wauneki lih akan. E sohte kin ketin kahlemengih Parisi ko, me kin medewe me lih akan sohte kesempwal duwehte ohl. Irail sohte kin koasoiong lih akan mwohn meteikan oh sohte douluhl kin koasoiaiong irail duwen Nting Sarawi kan. Ahpw, Sises kin ketin koasoiaiong lih akan oh ohl akan padahk mehlel kesempwal kan.b (Wadek Luk 10:38, 39, 42.) E pil kin ketin mweidohng lih akan en iangih seiloakseli nan sapwellime doadoahk en kalohk. (Luk 8:1-3) Sises ketikihong lih akan pwais kaselel en padahkihong wahnpoaron ko me e ketin iasadahr.​—Sohn 20:16-18.

6. Ia duwen wahnpoaron Pohl eh kasalehda me e wauneki lih akan?

⁶ Wahnpoaron Pohl katamankihong Timoty en wauneki lih akan. Pohl ndaiong ih en wiahki ‘lih mah kan duwehte eh nohno, oh peinakapw kan duwehte rie serepein.’ (1 Tim. 5:1, 2) Mendahki Pohl sewese laud Timoty en ahneki pwoson kehlail, e ese me ahn Timoty nohnou oh nohno kahlapo me tepin kasukuhliong Timoty “nting sarawi kan.” (2 Tim. 1:5; 3:14, 15) Nan nah kisinlikou ong mehn Rom ko, Pohl kin rahnmwahwih sister kan ni eh doadoahngki adarail. E kilang dahme sister pwukat kin wiahda oh pil nda me e kalahnganki dahme irail wia.​—Rom 16:1-4, 6, 12; Pil. 4:3.

7. Peidek dah kan me kitail pahn tehkpene?

⁷ Parakrap kan en mwoweo kasalehda me Paipel sohte mahsanih me sister kan sohte kesempwal duwehte brother kan. Riatail lih Kristian kan kin sewese laud mwomwohdiso, oh elder kan kin koapworopworki arail kin sewese wiahda popohl oh minimin nan mwomwohdiso. Ahpw ekei peidek kan anahne pasapengla. Karasepe: Dahme kahrehda Siohwa ketin kupwurki sister men en ekei pak doadoahngki koaduhpwel? Pwehki brother kante me kin idihdida en wia elder oh sounsawas, met wehwehki me brother koaros iei tapwin sister kan koaros nan mwomwohdiso?

BROTHER KOAROS IEI TAPWIN SISTER KAN KOAROS?

8. Nin duwen me Episos 5:23 mahsanih, brother koaros iei tapwin sister kan koaros? Menlau kawehwehda.

⁸ Ia duwe, brother koaros iei tapwin sister kan koaros nan mwomwohdiso? Pasapengo iei soh! Krais me arail tapwi. (Wadek Episos 5:23.) Nan peneinei, ohl pwopwoudo ahneki manaman pohn eh pwoudo. Pwutak men me papidaisla kaidehn ih me tapwin eh nohnou. (Ep. 6:1, 2) Oh nan mwomwohdiso, elder kan ahneki ekeite manaman pohn sister oh brother kan. (1 Des. 5:12; Ipru 13:17) Lih kiripw kan me sohla kousoan rehn arail pahpa oh nohno kin pousehlahte wauneki ira oh elder kan. Ahpw duwehte brother kan nan mwomwohdiso, arail tapwi emente iei Sises.

9. Dahme kahrehda ekei pak sister kan anahne koaduhpwel?

⁹ Ei mehlel, Siohwa ketin idihada ohl akan en tiengla mwowe nan mwomwohdiso, oh e sohte ketikihong lih akan soangen manamanohte. (1 Tim. 2:12) Dahme kahrehda? Pwehki e duwehte kahrepeo me Siohwa ketin idihada Sises en wia tapwin ohl akan, me iei en sewese mwomwohdiso en soandi mwahu. Ma irair ehu pwarada me kahrehda sister men anahne wia pwukoa ehu me brother men kin wia, eri Siohwa ketin kupwurki sistero en doadoahngki koaduhpwel.c (1 Kor. 11:4-7) Siohwa ketin kupwurki sister kan en wia met pwe ren kasalehda me re wauneki sapwellime koasoandi kan ahpw kaidehn en kahrehiong ren medewe me re sohte kesempwal. Met kitail pahn koasoiapene pasapengpen peidek wet: Manaman dah me tapwin peneinei kan oh elder kan ahneki?

MANAMAN ME TAPWIN PENEINEI OH ELDER KAN AHNEKI

10. Dahme kahrehda elder men kakete men wiahda koasoandi kan nan mwomwohdiso?

¹⁰ Elder kan kin poakohng Krais oh “sihpw kan” me Siohwa oh Sises ketikihong irail en apwalih. (Sohn 21:15-17) Pwehki elder men kin apwalih mwomwohdiso, ele e kin medewe me e rasehng pahpa men ong irail kan nan mwomwohdiso. Eri mwein e kin medewe me ma tapwin peneinei men ahneki pwuhng en wiahda koasoandi kan pwehn pere eh peneinei, elder men kak wiahda koasoandi kan me e medewe pahn pere sapwellimen Koht sihpw kan. Oh ekei brother oh sister kan ele kin kangoange elder kan en wiahda koasoandi kan sang ni arail peki irail en wiahda arail pilipil kan. Ahpw ia duwe, manaman me elder kan nan mwomwohdiso oh tapwin peneinei kan ahneki duwepenehte?

11. Ia duwen manaman me tapwin peneinei kan ahneki eh duwehte manaman me elder kan ahneki?

¹¹ Wahnpoaron Pohl kasalehda me ni soangen ahl kei, manaman me tapwin peneinei kan ahneki kin duwehte manaman me elder kan ahneki. (1 Tim. 3:4, 5) Karasepe, Siohwa ketin kupwurki tohn peneinei en peikiong tapwin peneinei. (Kol. 3:20) Oh e ketin kupwurki irail kan nan mwomwohdiso en peikiong elder kan. Siohwa ketin kasik me tapwin peneinei kan oh elder kan en padahkih irail kan me re kin apwalih ren poakohng Siohwa. Oh ren kin tehk mwahu me irail kin pehm me mie me kin poakohng irail. Oh duwehte tapwin peneinei mwahu kan, elder kan kin sewese irail kan nan mwomwohdiso me ahneki kahpwal kan. (Seims 2:15-17) Patehng met, Siohwa ketin kasik elder kan oh tapwin peneinei kan en sewese meteikan ren peikiong sapwellime koasoandi kan. E pil ketin katamankihong irail en dehr “daulihala soahng kan me ntingdier” nan Paipel.​—1 Kor. 4:6.

12-13. Nin duwen me Rom 7:2 mahsanih, ia duwen pwukoa kan en tapwin peneinei oh elder kan ar wekpeseng?

¹² Ahpw, pil mie wekpeseng laud nanpwungen pwukoahn elder men oh pwukoahn tapwin peneinei men. Karasepe, Siohwa ketikihong elder kan pwukoahn kadeik oh pwukoahn kihsang nan mwomwohdiso irail kan me wiahda dihp ahpw sohte koluhla.​—1 Kor. 5:11-13.

¹³ Weksang met, Siohwa ketikihong tapwin peneinei kan soangen manaman kei me e sohte ketikihong elder kan. Karasepe, e ketikihong tapwin peneinei kan manaman en wiahda koasoandi kan ong eh peneineio oh tehk mwahu me irail kin idawehn koasoandi pwukat. (Wadek Rom 7:2.) Karasepe, tapwin peneinei men ahneki pwuhng en koasoanehdi kuloak depe me nah seri kan anahne pwurala imwarailo nipwong. E pil ahneki manaman en panawih nah seri kan ma irail sohte kin peikiong koasoandio. (Ep. 6:1) Ei, mwohn tapwin peneinei limpoak men kin wiahda koasoandi kan ong eh peneineio, e kin koasoiong eh pwoudo; met pwehki ira “warteieu.”d​—Mad. 19:6.

WAUNEKI KRAIS PWEHKI IH ME TAPWIN MWOMWOHDISO

14. (a) Dahme Mark 10:45 mahsanih me kasalehda me e konehng me Siohwa ketin idihada Sises en wia tapwin mwomwohdiso? (b) Ia pwukoahn Pwihn me Kin Apwalih Mwomwohdiso nan Sampah Pwon? (Menlau kilang koakono “Pwukoahn Pwihn me Kin Apwalih Mwomwohdiso nan Sampah Pwon.”)

¹⁴ Sang ni eh ketin doadoahngki pweinen pweipwei sapahlo, Siohwa ketin pwainla mouren emenemen nan mwomwohdiso oh koaros me kin pwoson Sises. (Wadek Mark 10:45; Wiewia 20:28; 1 Kor. 15:21, 22) Eri e konehng me e ketin idihada Sises, me tounmeteikihla sapwellime mour ong kitail, pwehn wia tapwin mwomwohdiso. Ihme kahrehda Sises sapwellimanki manaman en wiahda koasoandi kan ong dahme aramas akan, peneinei kan, oh mwomwohdiso pwon anahne wia. Oh e sapwellimanki pwuhng en tehk mwahu me kitail kin peikiong koasoandi pwukat. (Kal. 6:2) Ahpw Sises sohte kin ketin wiahdahte koasoandi kan. E kin ketin apwalih mwahu oh poakohng emenemen kitail.​—Ep. 5:29.

15-16. Dahme ke sukuhlkihsang dahme Marley oh Benjamin koasoia?

¹⁵ Sister kan kin kasalehda me re wauneki Krais sang ni arail kin idawehn kaweid kan sang ohl kan me e ketin idihada pwehn apwalih irail. Sister tohto kin pwungki dahme emen sister me adaneki Marley, me mi nan Wehin Amerika, nda: “Ei pwukoa nin duwen lih pwopwoud men oh sister men nan mwomwohdiso kin kesempwal ong ie. I kin anahne pousehlahte doadoahk laud pwehn wauneki manaman me Siohwa ketikihong ei pwoudo oh elder kan. Ahpw ei pwoudo oh brother kan nan mwomwohdiso wiahiong met en mengeiong ie pwehki irail kin waunekin ie oh kasalehda arail kalahnganki doadoahk me I kin wia.”

¹⁶ Brother kan kin kasalehda me re wehwehki koasoandi en tapwi sang ni arail kin wauneki sister kan. Benjamin, brother men me kin mi England, nda: “I sukuhlki soahng tohto sang pasapeng kan me sister kan kin wia nan mihting kan, oh arail kin kihda iren sawas kan ong mwomwen atail kalohk oh padahk. I medewe me doadoahk me re kin wia uhdahn katapan.”

17. Dahme kahrehda kitail anahne wauneki koasoandi en tapwi?

¹⁷ Ni ohl akan, lih akan, tapwin peneinei kan, oh elder kan koaros nan mwomwohdiso ar kin wehwehki oh wauneki koasoandi en tapwi, e pahn mie meleilei nan mwomwohdiso. Oh kesempwal sang met, kitail kin wahdo kaping ong Samatail limpoako nanleng, Siohwa.​—Mel. 150:6.