1921—Sounpar Epwiki Samwalahro

KAHN Iroir (lokaiahn wai) en January 1, 1921, idek rehn Tohnsukuhl en Paipel kan peidek wet: “Doadoahk dahieu me kitail kak kasikasik en wia nan pahr wet?” Kahn Iroiro eri doadoahngki Aiseia 61:1, 2 (NW) pwehn katamankihong irail arail pwukoahn kalohki rongamwahwo. “Siohwa ketin keieiehdier pwe I en lohki rohng mwahu ong me opampap . . . , pwe I en lohki pahr en sapwellimen Siohwa kupwuramwahu, oh rahnen ikih en atail Koht.”

SOUNKALOHK EIMAH KAN

Pwehn kapwaiada arail doadoahk en kalohk, Tohnsukuhl en Paipel kan pahn anahne eimah. Irail anahne kalohki duwen “rohng mwahu” ong me opampap kan, oh duwen “rahnen ikih en atail Koht.”

Brother J. H. Hoskin sang Canada kin kalohk ni eimah nan pahr 1921 mendahki uhwong kan. Pak ehu, e tuhwong emen sounpadahk en palien lamalamo Methodist. Brother Hoskin tepida koasoi oh nda: “Kita anahne koasoiapene duwen Paipel ni meleilei. Oh mehnda ma kita sapwungki soahng kei, kita kak uhdi ata koasoi ni meleilei oh dehr wiahla imwintihti kei.” Ahpw met sohte wiawi. Brother Hoskin koasoia: “Se koasoi mwurin minit keite a sounpadahko poakih kehlail kilahs en eh wenihmwo me kahrehda I medewe me kilahs en wenihmwo pahn mweredi.”

Sounpadahko wer oh nda: “Dahme ke seu kohla kalohk ong irail me kaidehn Kristian?” Brother Hoskin sohte nda mehkot, ahpw ni eh kohkohla, e medewe, ‘E mwomwen me I koasoakoasoiong emen me kaidehn Kristian!’

Ni sounpadahko eh padahk nan eh imwen sarawio rahno mwuri, e koasoia soahng suwed kan duwen Brother Hoskin. Brother Hoskin koasoia: “E ndaiong aramas ako me ngehi me keieu likamw nan kahnimwo oh I anahne kamakamala.” Ahpw met sohte kauhdi Brother Hoskin. E pousehlahte kalohk ong aramas tohto. E koasoia: “I uhdahn perenki kalohk wasaht. Ekei aramas ako pil ndaiong ie: ‘I ese me ke wiewia sapwellime Koht doadoahk!’ oh irail kin men kihong ie soahng kan me I anahne.”

PEIN ONOP PAIPEL OH ONOP EN PENEINEI

Pwehn sewese aramas akan ren wehwehkihla mwahu Paipel, Tohnsukuhl en Paipel kan kin kaukaule wiahda peidek oh pasapeng kan nan Paipel nan makasihn me met kitail kin kahdaneki Awake! Mie peidek kan sang nan Paipel ong me pwulopwul kan me pahpa nohno kan kak koasoiaiong neirail seri kan. Pahpa nohno kan pahn kin idek rehn neirail seri kan peidek pwukat oh sewese irail en diarada pasapeng kan sang nan Paipel. Ekei peidek ko, me duwehte “Pwuhk depe mi nan Paipel?,” kin padahngki soahng mengei kan nan Paipel. Pil ekei peidek, duwehte “Kristian mehlel koaros anahne lelohng lokolok?,” kin sewese me pwulopwul kan ren wiahla sounkalohk eimah kei.

Pil mie peidek oh pasapeng kan sang nan Paipel ong irail kan me ese laud duwen Paipel. Pasapeng ko kak dierek nan keieun pwuhken Studies in the Scriptures. Sounwadawad tohto sukuhlki soahng tohto sang peidek pwukat, ahpw mwuhr re pakairkihda me re sohla pahn pwurehng wiahda peidek pwukat. Dahme kahrehda?

PWUHK KAPW EHU!

Pwuhken *The Harp of God*

Card me kasalehda wasa me tohnsukuhl ko en wadek

Card me peidek kan mi loale

Brother kan me kin tiengla mwowe wehwehki me aramas akan anahne sukuhlki duwen Paipel ni soandi mwahu. Eri, irail wiahda pwuhko me adaneki The Harp of God nan November 1921. Irail kan me alehdi pwuhko pil iang koasoandi en onop ehu me irail kak pein wia. Koasoandi en onop wet sewese aramas akan en sukuhlki duwen Koht eh ketin kupwurki ketikihong aramas akan mour soutuk. Ia duwen arail wia met?

Ni emen eh kin alehdi pwuhko, e pil kin alehdi card ehu me padahkihong ih pali dah me e anahne wadek nan pwuhko. Wihko mwuri, e pahn alehdi card ehu me mie peidek kei duwen dahme e wadek. Kisin cardo pil padahkihong sounwadawado pali dah kan me e anahne wadek ong wihk en mwurio.

Ehuehu wihk erein wihk 12, pwihnen kasukuhlo de mwomwohdisou kin kadaralahng tohnsukuhlo card kapw ehu. Irail me mah kan nan mwomwohdiso oh irail kan me sohte kak kohla kalohk ihmw lel ihmw iei me kin kalapw kadarpeseng card ko. Karasepe, Anna K. Gardner, sang Millvale, Pennsylvania, Wehin Amerika, koasoia: “Ni ahnsou me pwuhko The Harp of God wiawihda, e kihong riei serepeino Thayle me sohte kak alu, doadoahk me e kak wia, me iei en kadarpeseng card kan me peidek kan mi loale wihk koaros.” Ni ahnsou me aramaso kin kanekehla kasukuhlo, emen sang nan mwomwohdiso kin mwemweitla reh pwehn sewese kalaudehla eh sukuhlki Paipel.

DOADOAHK ME MI MWOHRAIL

Ni imwin pahr 1921, Brother J.F. Rutherford kadarala kisinlikou ong pwihnen kasukuhl ko koaros. E koasoia me “doadoahk en Wehio nan pahret laudsang oh pweidahsang doadoahk kan en mwoweo.” Ih eri pil kapatahiong: “Mihete doadoahk laud me pahn pil wiawi. Kangoange meteikan ren pil iang doadoahk kesempwal wet.” E sansal me tohnsukuhl en Paipel ko kapwaiada dahme e nda. Nan pahr 1922, irail kalohki duwen Wehio ni eimah laudsang mwoweo.

Kompoakepah kan me Kommwad

Tohnsukuhl en Paipel kan kin kasalehda limpoak en Kristian sang ni arail kin sawaspene. Irail wia kompoakepah kommwad kei me kin “seweseiuk ni ahnsou apwal,” nin duwen dahme kileldi pah.—Lep. Pad. 17:17.

Niare May 31, 1921, ohl toantoal men nan kahnimw en Tulsa, Oklahoma, Wehin Amerika, selidi pwehki re nda me e tiahk suwedih lih pwetepwet men. Mwurin mwo, daulih ohl pwetepwet 1,000 peiongada ohl toantoal malaulau kei. Peio mwadangete lella wasa kan me pali laud en me toantoal kan kin kousoan ie, me adaneki Greenwood. Ihmw oh pesines daulih 1,400 isihsla oh aramas akan pirapa. Ripoht kasalehda me aramas 36 me mehla, ahpw ele mpen aramas 300 me mehla. Irail kahdaneki pingiping wet Tulsa Race Massacre.

Tohnsukuhl en Paipel men me toantoal me adaneki Richard J. Hill kin kousoan Greenwood koasoiahda dahme wiawi: “Nipwongo me peio wiawi, se wiewia at mihting en Kristian. Mwurin at mihtingo, se rong ngilen kesik sang nan kahnimw en Tulsa. Se rongorongete ngilen kesiko lao se meirla.” Nimenseng en Niesil June 1, irairo suwedla. “Ekei aramas kohdo oh ndaiong kiht me ma se anahne mehn perehpat, se anahne mwadang kohla ni ihmw laud ehu me aramaso akan kin pokonpene ie (Convention Hall).” Eri, Brother Hill oh eh pwoudo iangahki nah seri ko tangala wasao. Mpen aramas toantoal 3,000 me mi wasao. Oh sounpei kan me koperment en wasao kadarala pwehn kauhdi peio me sinsile wasao.

Ahnsowo Brother Arthur Claus me pwetepwet wiahda pilipil kommwad ehu. “Ni ahnsou me I rongada aramas akan ar piripirap oh isihsik ihmw kan nan Greenwood, I pilada en kohla wasao oh kilang ia iren kompoakepahio, Brother Hill.”

Brother Arthur Claus doadoahngki pwuhko The Harp of God pwehn kasukuhlih seri 14

Ni eh lella ni imwen Brother Hill, e kilangada ohl pwetepwet men me kin kousoan karanih imwen brothero. Ohl pwetepweto kolokol kesik. Ohlo pil wia kompoakepahn Brother Hill, oh e medewe me Arthur iang pepeiseli. E wering oh nda: “Dahme ke kodohng wia wasaht?”

Arthur koasoia: “Ma I sohte kawehwehda mwahu kahrepen ei kohla wasao, e pahn kasikihiehdi. I ndaiong me ngehi kompoakepahn Brother Hill, oh me I kin kalapw kohdo ni imweo pak tohto.” Arthur oh ohlo eri mi wasao oh sile ihmwo sang sounpirap ko.

Mwuhr, Arthur esehda me Brother Hill oh eh peneineio iang mi nan Convention Hall. Arthur esehda me aramas toantoal ko sohte kak kohkohsang wasao ma kaunen sounpeio General Barrett sohte sainihala doaropwehn mweimweio. Arthur koasoia: “E uhdahn apwal en koasoiong kaunen sounpeio. Ni ahnsou me I padahkihong me I men wahsang peneineio nan Convention Hall, e idek: ‘Ke pahn apwalih peneinei wet oh apwalih arail anahn kan?’ I perenda oh nda ei.”

Arthur ale kisinlikowo oh mwadangala ni Convention Hall. E kasalehiong kisinlikowo sounpeio oh sounpeio nda: “Okoi, kaunen sounpeio me sainihala doaropweh! Ke ese me kowe me tepin kodohn ale aramas sang wasaht rahnwet?” Sohte pwand, Arthur oh sounpeio diarada Brother Hill oh eh peneineio. Arthur, Brother Hill oh eh peneineio pwon eri douda nan weren Arthur sidohsao oh kohkohla ni imwen Brother Hill.

Brother Claus kin tehk mwahu me Brother Hill oh eh peneineio sohte lelohng apwal. Ni meteikan ar kilang en Brother Claus eimah oh limpoak en Kristian, irail mwekidkihda. Arthur koasoia: “Irail kan me sewese sile imwen Brother Hill, arail wauneki Sounkadehde kan laudla. Oh me tohto tepida men sukuhlki padahk mehlel pwehki irail kilang me sapwellimen Koht aramas akan sohte kin lipilipilki aramas akan me pohrail wekpeseng, oh kiht koaros sohte kin medewe me se mwahusang meteio.”