IA DUWEN ATAIL KAK SOHLA KADAKADAUR KAILOK?

2 | Dehr Dupuk

Padahk en Paipel:

“Dehr dupungkihong emen me suwed. . . . Wia uwen amwail kak pwe kumwail en ahneki popohl rehn aramas koaros. Riei ko, kumwail dehr pein dupuk, . . . pwe e ntingdier: Siohwa ketin mahsanih, ‘Ngehi me pahn ikih; Ngehi me pahn dupuk.’”—ROM 12:17-19.

Ia Wehwehn Met:

Mendahki kitail kin lingeringerkihda en meteikan ar kamedekeikitailla, Koht sohte ketin kupwurki kitail en dupuk. Ahpw e ketin kangoangehkin kitail en awih ih, pwehki kereniongehr e pahn ketin kapwungala me suwed koaros.—Melkahka 37:7, 10.

Dahme Ke Kak Wia:

Ni aramas soh unsek kan ar kin dupuk, re kin kalaudehla kailok nanpwungarail. Kahrehda, ma emen kansensuwedihiukala de kamedekihiukala, dehr dupuk. Nantihong kaunda omw pepehm oh meleileidi. Ekei pak, e pahn mwahu en manokehla dahme wiawi. (Lepin Padahk 19:11) Ekei pak, e pahn mwahu en kasalehda dahme wiawi. Karasepe, ma ke lelohng wiewia sapwung ehu, ke kak pilada en ripohtkilahng polihs de irail akan me ahneki manaman.

Dupuk kin kauwehla pein kitail

Ia duwen ma sohte elen omw pahn kamwahwihala kahpwalo ni popohl? De ia duwen ma ke wiahier soahng koaros pwehn kamwahwihala kahpwalo ni popohl? Dehr dupuk. Met pahn kakete kalaudehla kahpwalo. Ma ke sohte dupuk, ke sohte pahn kadakadaur kailok. Ke kak likih sapwellimen Koht elen kamwahwihala kahpwalo. “Likih, e ahpw pahn seweseiuk.”—Melkahka 37:3-5.

Dahme Uhdahn Wiawi—ADRIÁN

Powehdi Pepehm en Men Dupuk

Ni Adrián eh pwulopwul, e kin lemei oh ahneki kailok laud oh kin men dupungkihong meteikan me suwed. E koasoia: “I kin kalapw iang pei doadoahngki kesik, oh ekei pak e kin imwikihla nta ni paliwereiet oh kereniong mehla pohn ahl kan.”

Adrián tepida onopki Paipel ni eh sounpar 16. E koasoia: “Ni ei wie kekeirda nan ei onop Paipel, I kilangada soangen anahn kan me I anahne wekidala duwen ngehi.” E anahne kesehla kailok oh uhdihsang wia tiahk lemei. E uhdahn kalahnganki dahme e sukuhlkihsang Rom 12:17-19 duwen dehr dupuk. E koasoia: “I tepida pwungki me Siohwa me pahn ketin kapwungala wiewia sapahrek nin duwen me e kupwurki oh ahnsou me e kupwurki. Ekisekis I powehdi ei mouren tiahk lemei.”

Ehu nipwongo, pwihn pwulopwul ehu me kin peiong Adrián mahso, peiongada ih. Arail kauno werkihla: “Doarehla omw mour!” Adrián wehkada: “I men pelianda irail.” Ahpw e sohte pelianirailda, e kapakapohng Siohwa ni mwotomwot oh kohkohla.

Adrián pousehla koasoia: “Mwurin rahno I tuhwong kaun en pwihn wet. I tepida lingeringer, men pelianda ih, ahpw I pil pwurehng kapakap ni ngihl soh sansal peki rehn Siohwa en ketin sewese ie en kanengamah. I pil pwuriamweila pwe pwutako kohdo rehi oh nda: ‘Menlau mahkikihong ie dahme wiawi pwohng. Ni mehlel I men duweiuk. I men onopki Paipel.’ Ia uwen ei peren pwe I kakehr kanengamahiong ei lingeringer! I kalahnganki ei kakehr wia met kahrehda se tepida onopki Paipel.”