IA DUWEN ATAIL KAK SOHLA KADAKADAUR KAILOK?

1 | Sohte Lipilipilki Aramas

Padahk en Paipel:

“Koht sohte kin ketin lipilipilki aramas, ahpw nan wehi koaros, e kin ketin kupwurperenki aramas emen me kin lemmwiki ih oh wia dahme pwung.”—WIEWIA 10:34, 35.

Ia Wehwehn Met:

Siohwaa Koht sohte kin ketin kadeik kitail pwehki atail wehi, keinek, pohn kilitail de tiahk. Ahpw, e kin ketin mahsanihete dahme uhdahn kesempwal, iei atail madamadau oh ineng kan. Ni mehlel, Siohwa ketin mahsanih: “Aramas kin kasawih mwomwen aramas, ahpw ngehi, I kin kasawih nan mohngiong en aramas akan.”—1 Samuel 16:7.

Dahme Ke Kak Wia:

Mendahki kitail sohte kak ese dahme mi nan mohngiong, kitail kak song kahlemengih Koht oh sohte lipilipilki aramas. Nantihong kilengwohng emenemen aramas a kaidehn pwihnen aramas ehu. Ma ke tehkada me ke kin ahneki madamadau sapwung ong meteikan, mwein ong keinek de wehi ehu, kapakapohng Koht oh peki en ketin seweseiuk ketikihsang soangen pepehm wet. (Melkahka 139:23, 24) Ma ke peki ni mehlel rehn Siohwa en ketin seweseiuk en dehr lipilipilki aramas, ke kak kamehlele me e pahn ketin karonge omw kapakap oh seweseiuk.—1 Piter 3:12.

a Siohwa iei mwaren Koht. (Melkahka 83:18) Kawehwehpen Lepin Mahsen kan nan Pwuhk Sarawi ni Mahsen en Pohnpei mahsanih: “KAUN-O—Nan kawehwe wet lepin mahsen lepet wiliandi Iahweh, mwaren [Koht] ni mahsen en Ipru.”

“Saikinte pak ehu I mwohndi rehn aramas pwetepwet men ni popohl . . . Met I wialahr kisehn pirien mehlel ehu nan sampah pwon.”—TITUS

Dahme Uhdahn Wiawi—TITUS

Powehdi Kadakadaur Kailok

Titus kin iang pwihn lemei ehu me kin kauwehla kosonned kan. E koasoia: “Se kin kohlahte nan hotel oh imwen sakau kan wasa me sohte mweimwei aramas toantoal en kohla ie, pwe sen pei.” Titus ese me kailok me kin kamwakid ih oh e koasoia: “Ma I kin akamaiongada emen, ohl de lih, ahnsou koaros ngehi me kin tepin paker.”

Titus tepida wekila ni ahnsou me e onopki Paipel rehn Sounkadehdehn Siohwa kan. Ni eh wadek Paipel, met wekidala eh madamadau. E uhdahn mwekidki inou en ahnsou kohkohdo me “mehla solahr pahn wiawi, solahr mwahiei, solahr sengiseng oh solahr medek” nin sampah.—Kaudiahl 21:3, 4.

Nin tapio, Titus kin nantihong uhdihsang kailongki meteikan. E koasoia: “I uhdahn apwalki wekidala ei madamadau oh wiewia kan.” Ahpw dahme e sukuhlkihsang Wiewia 10:34, 35 sewese ih, me kawehwehda Koht sohte kin ketin lipilipilki aramas.

Ia imwilahn met? Titus kawehwehda: “I kamehlelehla me Sounkadehdehn Siohwa kan wia pelien lamalam mehlel ehu ni ei kilang ar kin limpoakpene, sohte lipilipil ar keinek de pohn kilirail. Pil mwohn ei papidaisla wiahla emen Sounkadehde, emen aramas pwetepwet nan mwomwohdisou lukeielahng ni imweo sen mwengepene. Met duwehte ouraman ehu. Saikinte pak ehu I mwohndi rehn aramas pwetepwet men ni popohl, ahpw met I mi reh nan imweo mwengemwenge. Met I wialahr kisehn pirien mehlel ehu nan sampah pwon.”