IA DUWEN ATAIL KAK SOHLA KADAKADAUR KAILOK?

3 | Kesehla Kailok

Padahk en Paipel:

“Wekidala pein kumwail sang ni amwail wekidala elen amwail madamadau, pwe kumwail en kadehdehiong pein kumwail kupwuren Koht, kupwure me mwahu, me unsek oh me e kin ketin kupwurperenki.”—ROM 12:2.

Ia Wehwehn Met:

Atail madamadau kan kin kesempwal ong Koht. (Seremaia 17:10) Kitail anahne soikala nda de wia mehkot kamedek, ahpw kitail anahne wia laudsang met. Kailok kin tepisang atail madamadau oh pepehm kan. Kahrehda kitail anahne kihsang soangen kailok koaros sang nan atail madamadau oh pepehm kan. Ih ahnsowo me kitail kak “wekidala” pein kitail oh uhdihsang kadakadaur kailok.

Dahme Ke Kak Wia:

Medewe mwahu omw madamadau oh pepehm ong meteikan, mehlel irail kan me kohsang ehu keinek de ehu wehi. Pein idek rehmw: ‘Dahme I kin medewehkin irail? Ei madamadau ong irail kin kohsang dahme pein ngehi kin esehkin irail? De I kin lipilipilki aramas?’ Liksang kilang soahng kan nan online me kin utung kailok oh tiahk lemei.

Paipel kak sewese kitail powehdi kailok nan atail mohngiong oh madamadau

E sohte kin ahnsou koaros mengei en kadeik atail madamadau oh pepehm kan ni pwung. Ahpw Mahsen en Koht kak sewese kitail en “kasalehda madamadau oh ineng kan en mohngiong.” (Ipru 4:12) Eri pousehlahte onopki Paipel. Kapahrekihong padahk kan ong omw madamadau oh wia uwen omw kak en kaiahne pein kowe pwe ken ahneki madamadau me kin kaperenda kupwuren Koht. Mahsen en Koht kak sewese kitail en powehdi kailok me kin tengala nan atail madamadau oh mohngiong.—2 Korint 10:4, 5.

Dahme Uhdahn Wiawi—STEPHEN

Wekidala Eh Madamadau

Stephen oh ekei eh peneinei kin lokolok pwehki aramas pwetepwet kan kin kailongkin irail. Kahrehda pwihn en politik ehu me kin peiki pwuhng en aramas kamwakid ih. Mwuhr, e kin iang wia tiahk suwed me kohsang kailok. Stephen koasoia: “Ehu ahnsowo, ngehi oh kompoakepahi kan kilikilang kasdo ehu me kasalehda lokolok en lidu en Aperika kan nan United States. Se lingeringerkihda wiewia sapahrek ko, kiht eri peiong aramas pwulopwul pwetepwet kan nan wasahn kasdou. Mwuri, se kohla wasa me aramas pwetepwet kan kin mi ie, pwe sen rapahki aramas tohto me se pahn keme.”

En Stephen madamadau uhdahn wekila ni ahnsou me e tepida onopki Paipel rehn Sounkadehdehn Siohwa kan. E koasoia: “Pwehki I lelohng wiewia sapahrek tohto sang ni lipilipilki aramas, I uhdahn pwuriamweila ni ei kilang Sounkadehdehn kan ar kin mwahupene. Karasepe, ni ahnsou me Sounkadehde pwetepwet men seiloak, e peki rehn peneinei toantoal ehu ren apwalih nah seri ko. Oh pil, peneinei pwetepwet ehu ale pwutak pwulopwul toantoal men me anahne wasahn kousoan.” Stephen kamehlelehla me Sounkadehdehn Siohwa kan wia pirien mehlel ehu me kin limpoakpene, duwehte me Sises ketin kohpada me pahn sansalda rehn Kristian mehlel kan.—Sohn 13:35.

Dahme sewese Stephen en sohla lemei oh kailongki meteikan? Rom 12:2 me sewese ih. E koasoia: “I tehkada me I anahne wekidala ei madamadau. I anahne uhdihsang wia tiahk lemei oh esehla me ahneki popohl iei mour me keieu mwahu.” Met Stephen kin ahneki mour me saledeksang kailok erein sounpar 40 samwa.