Irail Katehdi Stepen

OHL me kelepwidi wasaht ede Stepen. Ih emen tohnpadahk lelepak en Sises. Ahpw kilang dahme wiawi ong ih ansouwet! Ohl pwukat kin kateki ih takai. Dahme kahrehda re kailongki Stepen laud oh wia soahngen suwed wet ong ih? Kitail pahn kilang.

Koht sewese Stepen en wiahda soahngen manaman kapwuriamwei tohto. Ohl pwukat sohte mwahuki, irail eri akamai ong ih pwehki e padahkiong aramas kan duen padahk mehlel. Ahpw Koht ketikihong Stepen erpit laud, oh Stepen kasaleong ohl pwukat duen arail padahk sapwung. Met kahreong irail en pil mwakarada kowahlap. Irail eri parokedi ih, oh likwerido aramas kan pwen karaun likamwi duen ih.

Samworo lapalap idek rehn Stepen: ‘Mehlel mehpwukat?’ Stepen sapeng ni ah wia ehu padahk kasehlel sang nan Paipel. Ni kaimwisekela, e kasalehda duen aramas suwed kan kin kailongki soukohp en Siohwa sang mahs kohdo. Ih eri inda: ‘Kumwail duwehte irail ko. Kumwail kamehla ladu en Koht Sises, oh kumwail sohte peikiong kosonned kan en Koht.’

Met kahreong kaun en lamalam ko en mwakarada kowahlap! Irail eri ngih tehteh ni mwakar. Stepen eri saradala nanleng, oh inda: ‘Kilang! I kilang Sises keskesihnenda ni pali maun en Koht nanleng.’ Ni arail rong met, irail pinahla salongarail oh tangwong Stepen. Irail eri parokedi ih oh waikala likin kahnihmwo.

Wasaht re kihsang arail likou en liki oh kihong emen mwanakapw me adaneki Saul pwen apwahpwali. Ke kak kilang Saul? Irail ahpw tapiada kate Stepen. Stepen kelepwikidi, duen me ke kilang, oh e kapakap ong Koht: ‘Siohwa, dehr kaloke irail pwehki wiewia suwed wet.’ E ese me ekei irail wia met pwehki kaun en lamalam kan piti irail. Mwehrin mwo Stepen mehla.

Ni en emen kin wia mehkot suwed ong uhk, ke kin song en pil depuk ong, de ke kin peki rehn Koht en wia mehkot madak ong irail? Kaidehn ihme Stepen de Sises wia. Ira kin kadek, pil ong irail kan me sohte kadek ong ira. Kitail en song alasang ara wiewia.