Ke Kin Ese Duwen Met?

Dahme kahrehda e mwahu me Siohwa ketin mweidohng mehn Israel kan en meirongki mwuroi oh pitsin kan?

PAHN Kosonnedo, Siohwa ketin mweidohng mehn Israel kan en meirongki mwuroi oh pitsin kan. Paipel kin ahnsou koaros koasoia duwen menpihr riemen pwukat nan kosonned kan me pid meirong, oh aramas akan kin kak doadoahngki ehu rehra. (Lip. 1:14; 12:8; 14:30) Dahme kahrehda met mwahu? Ehu kahrepe iei me mwuroi kan sohte kin ahnsou koaros mie. Dahme kahrehda?

Mwuroi kan kin mihseli nan sapwen Israel erein sounpwong karakar kan. Nan sounpwong en October koaros, irail kin pihrdihla palieir ni sahpw kan me karakar, oh eri pwuradahla Israel ni sounpwong en April de May. (Mel. Mel. 2:11, 12; Ser. 8:7) Nan Israel mahso, met wehwehki me e apwal ong mehn Israel kan en meirongki mwuroi ni ahnsoun kopou.

Weksang mwuroi kan, pitsin kan sohte kin kohseli, kahrehda e mengei ong mehn Israel kan en meirongki. Patehng met, pitsin kan kin mand. (Pil kilang Sohn 2:14, 16.) Nin duwen me pwuhk ehu (Bible Plants and Animals) kasalehda: “Kousapw oh kahnimw koaros nan Palestin kin naineki pitsin kan. Ni ehuehu ihmw kan, e kin mie dewen mahn pwukat ni dihd en ihmw ko.”​—Pil kilang Aiseia 60:8.

Eri, Siohwa ketin kasalehda duwen sapwellime limpoak oh toupahrek sang ni eh ketin mweidohng mehn Israel kan en meirongki menpihr riemen pwukat nan sounpar ehu pwon.