Ke Kin Ese Duwen Met?

Dahme kahrehda mehn Israel kan mahso kin kihda pweinen lih kamwohdo?

MAHSO, ohl kamwohdo de eh peneineio kin kihda pweipwei ehu ong peneinei en lih kamwohdo ni ahnsou me peneinei ko pwungki ira en kapwopwoudla. Pweinen lih kamwohdo kin kak pidada soahng kei me peneineio kin kesempwalki, duwehte neirail mahn akan de mwohni. Ekei pak, pweinen lih kamwohdo kin pweipweila sang ni ohl kamwohdo eh kin doadoahk ong peneinei en liho, duwehte me wiawihong Seikop me pwungkihda en doadoahk ong en Resel eh pahpao erein sounpar isuh pwehn kak pwoudiki Resel. (Sen. 29:17, 18, 20) Ia kahrepen arail kin wia tiahk wet?

Emen lih me saman poadopoad en Paipel me adaneki Carol Meyers koasoia: “Pweinen lih kamwohdo kin kowohng peneineio pwehn pwainla doadoahk kan me lih kamwohdo sohla pahn wiahiong peneineio, oh met kesempwal ong peneinei kan [me kin wia mwetuwel].” Pweinen lih kamwohdo pil kin kakehlaka nanpwungmwahu en peneinei en ohl kamwohdo oh lih kamwohdo. Tohnpeneinei ko kak sawaspene ni ahnsou me kahpwal kin pwarada. Patehng met, pweinen lih kamwohdo kin kadehdehda me liho inoudahr ong pwopwoud, oh me e pahn kohla mihla rehn eh pwoudo oh sohla mi pahn epwelpen eh pahpao.

Pweinen lih kamwohdo sohte wehwehki me lih kamwohdo wia mehkot me kak pweipweida de netila. Pwuhk ehu me koasoia duwen tiahk en mehn Israel mahs (Ancient Israel​—Its Life and Institutions) koasoia: “Tiahk en kihong peneinei en lih kamwohdo uwen mwohni ehu, de uwen pweipwei ehu me duwehte mwo, kin kahrehda en mehn Israel kan pwopwoud en mwomwen me irail kin pwainda liho. Ahpw [pweinen lih kamwohdo] kin mwomwen wiahte pweipwei ehu me wiliandi mehkot me peneinei en liho sohla ahneki, a kaidehn pwehn pwainda liho.”

Rahnwet nan ekei sahpw, aramas akan kin wiewiahte tiahk wet en kihda pweinen lih kamwohd. Ni pahpa oh nohno Kristian kan ar kin peki pweinen lih kamwohdo, irail anahne ‘aramas koaros en ese arail madamadau toupahrek’ ni arail en dehr peki laudsang dahme konehng. (Pil. 4:5; 1 Kor. 10:32, 33) Ni ahl wet, irail kin kasalehda me re sohte kin “poakohng mwohni,” de noahrok. (2 Tim. 3:2) Patehng met, ni pahpa nohno Kristian kan ar sohte peki pweinen lih kamwohdo en laudsang me konehng, ohl kamwohdo sohte pahn anahne kasaula rahnen kapwopwoudo lao e koadoahkihada mwohni me itar ong pwainla pweipweio. De ohl kamwohdo sohte anahne uhdihsang pioneer pwehki e anahne kohla koadoahkihada mwohni me anahn pwehn pwainla pweinen lih kamwohdo me uhdahn pweilaud.

Nan ekei sahpw, mie kosonned kan ong pweinen lih kamwohdo. Nan soangen irairo, pahpa oh nohno Kristian kan anahne peikiong kosonned pwukat. Dahme kahrehda? Mahsen en Koht padahngki me Kristian kan anahne “uhpahiong irail kan me ahneki manaman” oh peikiong kosonned kan me sohte kin uhwong sapwellimen Koht kosonned kan.​—Rom 13:1; Wiewia 5:29.