Roson en Madamadau—Kahpwal Ehu nan Sampah Pwon
“Ahnsou koaros I kin ekis pwunod, mehnda ma I kelehpw mwomwohd nan pere ehu.”
“Ma I kin pehm me I nohn kehlail, I kin tepida pwunod. Sang dahme I pehmehr, I ese me ma I kin uhdahn peren mwuri I pahn mwadangete nsensuwedla douluhl.”
“I kin nantihong medemedewe dahme kin wiawi ehuehu rahn. Ahpw ekei pak I kin wiahkintehieu pwunodkihda soahng tohto.”
Koasoi pwukat kohsang rehn aramas akan me kin lokolongki soumwahu en madamadau (mental illness). Mie pak me kowe de emen me ke kin poakohng kin ahneki soangen pepehm wet?
Ken kamehlele me kaidehn kowe kelehpw. Aramas tohto rahnwet kin lokolongki kahpwal en madamadau, mehnda ma pein arail de en irail kan me re kin poakohng.
Ni mehlel kitail momour ni “ahnsou apwal oh keper” me kin kahrehda soangen kahpwal tohto. (2 Timoty 3:1) Ehu roporop kasalehda me nan sampah pwon, mwein emen nanpwungen aramas welimen kin lokolongki soumwahu en madamadau. Pwehki soumwahu lusulus en COVID-19, nan pahr 2020, aramas me kin pwunod tohtohkihla mpen persent 26 oh me kin ahneki soumwahu en nsensuwed tohtohkihla mpen persent 28 sang pahr 2019.
E kesempwal en ese aramas depe rahnwet kin lokolongki pwunod oh soumwahu en nsensuwed. Ahpw en ese omw pepehm oh pepehm en irail kan me ke kin poakohng kesempwalsang met.
Dahkot roson en madamadau?
Ni ahnsou me omw roson en madamadau kin mwahu, ke kin ahneki pepehm mwahu oh kak doadoahk mwahu. Ke kak powehdi kapwunod kan, kak doadoahk oh nsenamwahuki omw mour.
Soumwahu en madamadau . . .
KAIDEHN kasalepen luwet en aramas emen.
IEI irair en soumwahu ehu me kin kahrehda nsensuwed laud oh kin kasapwungehla en aramas madamadau, pepehm oh wiewia.
Kin kalapw kahrehiong emen en apwalki kompoakepahnki meteikan oh wia eh doadoahk en ehuehu rahn akan.
Kak lelohng aramas sohte lipilipil ni sounpar, tiahk, keinek, pelien lamalam, me iang sukuhl laud de soh, de me kepwehpwe de semwehmwe.
Alehdi sawas ong kahpwal en roson en madamadau
Ekei pak en aramas emen wiewia oh pepehm kak wiahkintehieu wekila. E kin tepida kalapw meir de sohte meir mwahu, tepida mwenge laud de mwenge tikitik sang mahso, de tepida pwunod de nsensuwed laud. Ma met wiawi, ele aramaso pahn anahne sawas sang emen semen palien wini pwehn sewese ih en wehwehki dahme kahrehda mepwukat wiawi oh ia duwen eh kak kamwahwihala. Ahpw ia wasa e kak kohla ie pwehn ale sawas?
Sises Krais, aramas me keieu loalokong, mahsanih: “Aramas roson sohte anahne toahkte, ahpw irail me soumwahu me anahne.” (Madiu 9:12) Irail akan me kin nannanti pahn kahpwal en roson me kin aliale epwelpen wini kak katikala kilelen soumwahu pwukat rehrail oh kak ahneki mour me katapan oh kaperen. E wia elen loalokong irail en dehr kapwandehla ale epwelpen wini ma kilelen soumwahu wet laud de wereila rehrail.a
Mendahki Paipel kaidehn pwuhk en wini ehu, audepe kan kak sewese atail roson en madamadau. Se kangoangeiuk ken tehk oaralap kan mwurin met me kin koasoia ia duwen Paipel eh kak sewesei kitail en powehdi kahpwal en madamadau.
a Kahn Iroir wet sohte kin kangoange aramas en ale soangen epwelpen wini ehu. Emenemen anahne medewe mwahu epwel pwukat mwohn eh wiahda eh pilipil.