1 | Kapakap “Patohwanohng Ih Amwail Pwunod akan Koaros”

PAIPEL MAHSANIH: “Patohwanohng ih [Koht] amwail pwunod akan koaros, pwehki eh kin ketin nsenohkin kumwail.”—1 PITER 5:7.

Met Wehwehki

Siohwa Koht ketin kangoangei kitail en patohwanohng ih soahng koaros me kin kapwunodei kitail. (Melkahka 55:22) Kitail kak kapakapki atail kahpwal kan mehnda ma laud de tikitik. Ma e kesempwal ong kitail, e pil kesempwal ong Siohwa. Kapakap ong ih wia kahk kesempwal en alehdi popohl en madamadau.—Pilipai 4:6, 7.

Ia Duwen Met Kak Sawas

Ni atail kin nannanti en apwalihala atail kahpwal en madamadau, mweinele kitail kin pehm me kitail kelekelehpw. Aramas teikan sohte uhdahn wehwehki dahme kitail kin lelohng. (Lepin Padahk 14:10) Ahpw ni atail kapakap patohwanohng Koht atail pepehm, e pahn ketin karongei kitail ahnsou koaros ni kadek oh mwahngih kitail. Siohwa kin ketin mahsanih kitail, e ketin mwahngih atail medek oh atail kin nannanti, oh e ketin kupwurki kitail en kapakapkihong ih soahng koaros me kin kapwunodei kitail.—2 Kronikel 6:29, 30.

Ni atail kapakapohng Siohwa, met pahn kakehlaka atail koapworopwor me e kin ketin nsenohkin kitail. Kitail kak ahneki soangen pepehmohte me sounmelkahkao kapakapki: “Komw kin ketin mahsanih ei lokolok; komw pil ketin mwahngih ei apwal.” (Melkahka 31:7) En esehte me Siohwa kin ketin mwahngih dahme kitail kin lelohng uhdahn kak sewesei kitail en nannanti ni ahnsou apwal akan. Ahpw e sohte kin ketin tehkete atail kahpwal kan. Ih me keieu ketin mwahngih dahme kitail kin lelohng oh e kin ketin sewese kitail en diar nsenamwahu oh kangoang nan Paipel.

Ia Duwen Paipel Eh Kin Sewese Julian

Dahme Pwunod Kin Wiahiong Ie

“I kin apwalki powehdi pwunod oh soumwahu me adaneki obsessive-compulsive disorder (OCD). Pwunod kin kahpwalih ie ni ei sohte kasik. Ehu ahnsou I kin mwahu ahpw mwurinte mwo I kin uhdahn pwunodada ni soh kahrepe. Ahpw ni mehlel ni ei kin mi limwahn aramas. I kin uhdahn pwunodki dahme re kin medewehkin ie.

“Irail akan me ese ei kahpwalet kin uhdahn sewese ie. Ekei pak dahme re kin nda sohte kin sawas. Ahpw I kin kalahnganki ar kin nantihong sewese ie.

“Ekei pak, ei pwunod oh soumwahu en OCD kin kahrehda ei kin apwalki kapakap. I kin uhdahn nantihong koasoanehdi ei madamadau oh kapakapohng Siohwa. Ei madamadau kin mwadangete lusseli kahrehda I kin kalapw pingida. Ni ei sohte kak koasoanehdi ei madamadau, I kin apwalki kawehwehiong Siohwa ei madamadau oh pepehm kan.”

Ia Duwen Paipel Eh Kin Sewese Ie

“I esehda sang ni ei onopki Paipel me kapakap kan sohte anahne reirei de kaselel pwe Koht en ketin kupwurperenki. Ekei pak ni ei sohte kak kasalehda ei pepehm, ihte me I kin kapakapki: ‘Maing Siohwa, komw menlau ketin sewese ie.’ Pil nan soangen ahnsou pwukat, I kin pehm me Siohwa ketin mwahngih ie oh kin ketikihong ie dahme I anahne ahnsowo. Patehngete kapakap, I kin rapahki epwelpen palien wini. I men nda me pwehki sawas riau pwukat, ei irairo mwahusang mahso. Mendahki ei kin uhdahn nantihong peki sawas rehn Semeio nanleng, I kin wia met pwehki I uhdahn kamehlele me e ketin poakohng ie oh kupwurki sewese ie.”