Ia Duwen Atail Kak Kakehlaka Atail Pwoson Sapwellimen Siohwa Inou en Sampah Kapwo?

1-2. Dahme kitail anahne wia nindoken atail awiawih sampah kapwo?

KITAIL kin uhdahn kalahnganki sapwellimen Siohwa inowo en ketin wiliandi koasoandi wet ong sampah kapw oh pwung ehu. (2 Pit. 3:13) Mendahki kitail sehse iahd me sampah kapwo pahn pweida, soahng kan me kitail kin kilang wiewiawi nan sampah wet kasalehda me kitail sohte anahne awih ahnsou werei.—Mad. 24:32-34, 36; Wiewia 1:7.

² Ahpw sohte lipilipil ia uwen werei me kitail miher nan padahk mehlel, kitail koaros anahne kakehlakahla atail pwoson inowo. Dahme kahrehda? Pwehki pwoson kehlail pil kak luwetala. Ni mehlel, wahnpoaron Pohl kahdaneki pwoson tikitik “dihp me kin mwadang salihkitaildi.” (Ipru 12:1) Pwe atail pwoson en dehr luwetala, kitail anahne kaukaule medemedewe soahng kan me kadehdehda me sampah kapwo pahn kereniong wiawi.—Ipru 11:1.

3. Dahme kitail pahn koasoiapene nan iren onop wet?

³ Nan iren onop wet, kitail pahn koasoiapene ahl siluh me kitail kak en kakehlaka atail pwoson sapwellimen Siohwa inou en sampah kapwo: (1) sang ni atail doudouloale pweinen pweipwei sapahlo, (2) sang ni atail medemedewe sapwellimen Siohwa manaman, oh (3) sang ni atail wia soahng kan me kin kakaranihkitailla rehn Siohwa. Mwuhr, kitail pahn koasoiapene ia duwen mahsen en Siohwa ong Apakuk eh kin kakehlaka atail pwoson rahnwet. Ahpw keieu, kitail pahn koasoiapene ekei irair kan me ele kitail ahneki met me anahne atail pwoson inou en sampah kapwo en kehlail.

IRAIR KAN ME ANAHNE ATAIL PWOSON EN KEHLAIL

4. Pilipil dah kan me anahne atail pwoson en kehlail?

⁴ Rahn koaros kitail kin wiahda pilipil kan me anahne atail pwoson en kehlail. Karasepe, atail pilipil kan kin pidada ihs me kitail en werekiong, mehn kamweit kan, sukuhl, mouren pwopwoud, seri kan, oh doadoahk en mwohni. E mwahu en pein idek rehtail: ‘Ahi pilipil kan kin kasalehda me I uhdahn kamehlele me koasoandi wet ongete ahnsou mwotomwot, oh me ahnsou keren sapwellimen Koht sampah kapwo pahn wiliandi? De I kin pilada en wia soahng kohte me irail me sohte kamehlele me re kak mour kohkohlahte kin wia?’ (Mad. 6:19, 20; Luk 12:16-21) Kitail pahn wiahda pilipil keieu mwahu ma kitail kakehlakahla atail pwoson me sampah kapwo uhdahn kerendohr.

5-6. Dahme kahrehda atail pwoson anahne kehlail ni ahnsou apwal kan? Menlau kihda ehu karasaras.

⁵ Kitail pil ahneki kahpwal kan me anahne atail pwoson en kehlail. Ele kitail anahne dadaur pahn kalokolok, soumwahu laud, de soahng teikan me kak kahrehiong kitail en mworusala. Nin tapio, ele kitail medewe me kitail kak dadaur pahn atail kahpwal kan. Ahpw soangen kahpwal pwukat kin kalapw mihmi werei, kahrehda atail pwoson anahne kehlail pwehn dadaur oh pousehlahte papah Siohwa ni peren.—Rom 12:12; 1 Pit. 1:6, 7.

⁶ Erein kahpwal ehu, ele kitail kin medewe me sapwellimen Siohwa sampah kapwo sohte pahn pweida. Ia duwe, met wehwehki me atail pwoson luwet? Soh. Medewehla karasaras wet. Ni ahnsou me e kin ketketeu erein wihk tohto, ele kitail kin medewe me e solahr pahn ketipin. Ahpw mwuhr ketipino dakada. Duwehte met, ni atail kin nsensuwedla laud, kitail kakete medewe me sampah kapwo sohla pahn pweida. Ahpw ma kitail ahneki pwoson kehlail, kitail ese me sapwellimen Koht inou kan pahn pweida. (Mel. 94:3, 14, 15; Ipru 6:17-19) Pwehki kitail kamehlele met, kitail kak pousehlahte mwohneki mahs atail kaudok ong Siohwa nan atail mour.

7. Madamadau dahieu me kitail en dehr ahneki?

⁷ Atail pwoson pil anahne kehlail pwe kitail en kak wia doadoahk en kalohk. Aramas tohto me kitail kin kalohk ong kin medewe me “rongamwahu” duwen sapwellimen Koht sampah kapwo sohte kak pweida. (Mad. 24:14; Esek. 33:32) Kitail anahne kanahieng en dehr peikasalki dahme Siohwa ketin padahkihong kitail duwehte me irail kin wia. Pwe met en dehr wiawi, kitail anahne pousehlahte kakehlaka atail pwoson. Kitail pahn koasoiapene ahl siluh me kitail kak en wia met.

DOUDOULOALE PWEINEN PWEIPWEI SAPAHLO

8-9. Ia duwen atail doudouloale pweinen pweipwei sapahlo eh kak kakehlaka atail pwoson?

⁸ Ehu ahl me kitail kak en kakehlaka atail pwoson iei sang ni atail en doudouloale pweinen pweipwei sapahlo. Pweinen pweipwei sapahlo kin kamehlelehiong kitail me sapwellimen Koht inou kan pahn pweida. Ni atail kin medemedewe kanahieng dahme kahrehda pweinen pweipwei sapahlo wiawi oh dahme e kin pidada, kitail kin kakehlakahla atail pwoson me sapwellimen Koht inou en mour kohkohlahte nan sampah mwahu ehu pahn uhdahn pweida. Dahme kahrehda kitail kak ndahki met?

⁹ Dahme pweinen pweipwei sapahlo kin pidada? Siohwa ketin poaronehdo sapwellime Ohlo, me keieu karanih ih, sang nanleng pwehn ipwidi nin duwen aramas unsek men. Erein eh ketiket sampah, Sises ketin lelohng kahpwal koaros. Ih eri ketin lelohng lokolok laud oh pwoula ni ahl me uhdahn kamedek. Ia uwen tounmetei laud me Siohwa ketin wiahda! Atail Koht limpoako sohte pahn ketin mweidohng sapwellime Ohlo en lokolok oh mehla pwe kitail en ahnekihte mour mwahu ehu erein ahnsou kiste. (Sohn 3:16; 1 Pit. 1:18, 19) Pwehki e ketin wiahda tounmetei laudo, Siohwa pahn ketin tehk mwahu me mour kohkohlahte nan sampah kapwo pahn uhdahn pweida.

MEDEMEDEWE SAPWELLIMEN SIOHWA MANAMAN

10. Nin duwen me Episos 3:20 mahsanih, dahme Siohwa kak ketin wia?

¹⁰ Keriaun ahl me kitail kak en kakehlaka atail pwoson iei sang ni atail kin medemedewe sapwellimen Siohwa manaman. E sapwellimanki manaman en kapwaiada soahng koaros me e ketin inoukihda en wia. Aramas tohto rahnwet medewe me mour soutuk nan sampah kapw ehu sohte kak wiawihong kitail. Ahpw Siohwa kin ketin pwurupwurehng inoukihda soahng kan me aramas sohte kak wiahda. Met pwehki ih me Koht me Keieu Manaman. (Sohp 42:2; Mark 10:27) Eri kitail sohte kin pwuriamweiki ni eh ketin inoukihong kitail soahng kapwuriamwei kan!—Wadek Episos 3:20.

11. Menlau kihda ehu karasaras en sapwellimen Koht inou kapwuriamwei kan. (Menlau kilang koakono “Ekei Inou Kapwuriamwei me Pweida.”)

¹¹ Medewehla ekei soahng kan me Siohwa ketin inoukihong sapwellime aramas akan mahso me mwomwen sohte kak pweida. E ketin mahsanihong Eipraam oh Sara me ira pahn nainekihda pwutak men ni ara mahla. (Sen. 17:15-17) E pil ketin mahsanihong Eipraam me kadaudoke kan pahn sapwenikihla Kenan. Erein sounpar tohto me kadaudok en Eipraam kan, mehn Israel ko, wia lidu kei nan Isip, ele e mwomwen me inowo sohte pahn pweida. Ahpw e pweida. Mwuhr, Siohwa ketin pakairki me Elisapet pahn nainekihda seri men, mendahki e mahlahr. Siohwa pil ketin mahsanihong meipwono Mery me e pahn kaipwidi sapwellime Ohlo. Met pahn kapwaiada inou me Siohwa ketin wiahda sounpar kid kid kei mwoweo nan mwetuwel en Ihden!—Sen. 3:15

12. Dahme Sosua 23:14 oh Aiseia 55:10, 11 kamehlelehiong kitail duwen sapwellimen Siohwa manaman?

¹² Ni atail kin medewehla inou kan koaros me Siohwa ketin wiahda oh ia duwen eh ketin kapwaiada, kitail wehwehki me e sapwellimanki manaman laud. Eri, atail pwoson sapwellime inou en sampah kapwo pahn kehlailla. (Wadek Sosua 23:14; Aiseia 55:10, 11.) Met kahrehiong kitail en kaunopada mwahu en sewese meteikan en wehwehki me inou en sampah kapwo kaidehn ouraman ehu. Pein Siohwa ketin mahsanihki duwen lahng kapw oh sampah kapw: “Mahsen pwukat me lelepek oh mehlel.”—Kaud. 21:1, 5.

WIA SOAHNG KAN ME KIN KAKARANIHKITAILLA REHN SIOHWA

13. Ia duwen mihting en mwomwohdiso kan ar kak kakehlaka atail pwoson? Menlau kawehwehda.

¹³ Kesiluh en ahl me kitail en kakehlaka atail pwoson iei sang ni atail kin wia soahng kan me kin kakaranihkitailla rehn Siohwa. Karasepe, medewehla duwen atail kin paiekihda mihting en mwomwohdiso kan. Anna, me kin wia soahng tohto ni eh doadoahngki pali laud en eh ahnsou ong papah Koht erein sounpar tohto, koasoia: “Mihting kan kin sewese ie en pousehlahte kakehlailih ei pwoson. Mehnda ma me wia padahko sohte wia sounpadahk mwahu men de sohte kin nda soahng kapw kan, I kin kalapw rong soahng ehu me sewese ie en wehwehkihla mwahu Paipel, oh met kin kakehlaka ei pwoson.”b Atail pwoson pil kin kehlailla ni atail rong en riatail Kristian kan pasapeng nan mihting kan.—Rom 1:11, 12; 10:17.

14. Ia duwen doadoahk en kalohk eh kin kakehlaka atail pwoson?

¹⁴ Kitail pil kin kakehlaka atail pwoson ni atail kin iang kalohk. (Ipru 10:23) Barbara, me papahkier Siohwa daulih sounpar 70, koasoia: “I kin ahnsou koaros kilang me kalohk kin kakehlaka ei pwoson. Ni ei kin kalaudehla ei ehukihong meteikan duwen sapwellimen Siohwa inou kaselel kan, ei pwoson pil kin kehlailla.”

15. Ia duwen pein onopki Paipel eh kin kakehlakahla atail pwoson? (Menlau pil kilang kilel.)

¹⁵ Medewehla pil ehu ahl en kakehlakahla atail pwoson, me iei en pein onopki Paipel. Susan koasoia me e kin sawas ma e koasoanehdi iahd me e pahn onop. E koasoia: “Ni Rahn Sarawi kan, I kin kaunopada nei Kahn Iroir ong wihk en mwuhr. Niehd oh Niare kan, I kin kaunopada ong atail mihting en nan wihk. Oh rahn teikan, I kin wia pein ei onop en Paipel.” Pwehki e kin ahnsou koaros idawehn eh koasoandi en onop, Susan kin pousehlahte kakehlaka eh pwoson. Irene, me kin papah ni atail poasen kaun erein sounpar tohto, koasoia me eh onopki kokohp en Paipel kin kakehlaka eh pwoson. E koasoia: “I kin pwuriamweiki me sapwellimen Siohwa kokohp kan kin pweida ni oaritik.”c

“E PAHN PWEIDA NI AHNSAWI”

16. Dahme kahrehda rahnwet kitail pil iang paiekihda sapwellimen Siohwa mahsen ko ong Apakuk? (Ipru 10:36, 37)

¹⁶ Erein ahnsou werei, ekei sapwellimen Siohwa ladu kan kin awiawih koasoandi wet en imwisekla. Ekei aramas kin medewe me imwio nohn pwand en leledo. Ahpw Siohwa ketin mwahngih pepehm en sapwellime ladu kan. Ni mehlel, e ketin kamehlelehiong soukohp Apakuk: “E saikinte lel ahnsou me e pahn wiawi. Ahpw e pahn mwadang leledo, oh dahme I pahn kasalehiong uhk pahn pweida. Mehnda ma e pahn pwand, ahpw awiawihete; pwe e pahn pweida ni ahnsawi; oh e sohte pahn pwand.” (Apak. 2:3) Ia duwe, Koht ketikihda mahsen pwukat pwe Apakuk kelehpw en paiekihda? De kitail pil kak iang paiekihda sapwellime mahsen ko rahnwet? Siohwa ketin kaweidki wahnpoaron Pohl en doadoahngki mahsen pwukat ong Kristian kan me kin kasikasik sampah kapwo. (Wadek Ipru 10:36, 37.) Eri, kitail kak kamehlele me mehnda ma sapwellimen Siohwa inou en ketin doareikitailla nohn pwand, “e pahn pweida ni ahnsawi; oh e sohte pahn pwand.”

17. Ia duwen sister men eh doadoahngki kaweid me Siohwa ketikihong Apakuk?

¹⁷ Sapwellimen Siohwa ladu tohto kin doadoahngki sapwellime kaweid en “awiawihete.” Ekei irail kin wia met erein sounpar tohto. Karasepe, Louise tepida papah Siohwa nan pahr 1939. E koasoia: “Ni ahnsowo, I medewe me Armakedon pahn wiawi mwohn ei neksang high school. Ahpw met sohte wiawi. Mwurin sounpar tohto, I diarada me e kin sawas en wadek koasoipen irail kan nan Paipel, me duwehte Noha, Eipraam, Sosep, oh meteikan me kin awiawih erein ahnsou werei pwehn alehdi ketingparail me inouda sang rehn Siohwa. En kin awiawihte kin sewese ie oh meteikan en medemedewehte mehlelpen sampah kapwo eh kerendohr.” Me tohto teikan me kin papah Siohwa wereilahr pil pwungki!

18. Ia duwen atail kilang kepikipik kan eh kak kakehlaka atail pwoson me sampah kapwo pahn pweida?

¹⁸ Mehlel, sampah kapwo saikinte leledo. Ahpw medewehla ekei soahng kan me mie—usu kan, tuhke kan, mahn akan, oh aramas akan. Sohte me pahn peikasalki me soahng pwukat koaros uhdahn mie, mendahki mie ahnsou ehu me re sohte mie. Irail mie ahnsou wet ihte pwehki Siohwa ketin kapikirailda. (Sen. 1:1, 26, 27) Atail Koht pil ketin inoukihda en wiahda sampah kapw ehu. E pahn ketin kapwaiada met. Nan sampah kapwo, aramas pahn ahneki roson unsek oh mour kohkohlahte. Kitail kak kamehlele me sampah kapwo pahn pweida ni ahnsou me Koht ketin koasoanehdi.—Ais. 65:17; Kaud. 21:3, 4.

19. Ia duwen omw kak kakehlaka omw pwoson?

¹⁹ Erein atail awiawih en pweida, wia uwen omw kak koaros pwehn kakehlaka omw pwoson. Ahnsou koaros kalahnganki pweinen pweipwei sapahlo. Medemedewe sapwellimen Siohwa manaman. Wia soahng kan me pahn kakaranihiukala rehn Siohwa. Ni omw wia met, ke kak iang “irail kan me sohsohkiher inou kan sang ni arail pwoson oh kanengamah.”—Ipru 6:11, 12; Rom 5:5.