Watchtower ONLINE LIBRARY
Watchtower
ONLINE LIBRARY
Ponapean
  • PAIPEL
  • SAWASEPEN PAIPEL KAN
  • MIHTING KAN
  • w99 1/1 pp. 11-20
  • “Kakehlailla Mohngiongimwail Kan”

Sohte kasdo ong met

Kupwurmahk, mehkot sapwung en kihda kasdo

  • “Kakehlailla Mohngiongimwail Kan”
  • Kahn Iroir Pakpakairki Wehin Siohwa—1999
  • Sawaspen Oaralap kan
  • Ire kan me Duwehte Met
  • Ahn Eipraam Mehn Karasepen Pwoson
  • Rongorong Koht
  • Patohwohng Koht
  • Rekord en Pwoson Rahnwet
  • Kekeirada Pwoson Nan Rahnwet
  • Koapworopwor Me Ahnsou Keren Pahn Pweida
  • Siohwa Ketin Kamwarehki “Kompoakepahi”
    Kahn Iroir Pakpakairki Wehin Siohwa (Ong Onop)—2016
  • Komw Ahneki Pwoson Me Duwehte En Eipraam?
    Kahn Iroir Pakpakairki Wehin Siohwa—1999
  • Ihs Eipraam?
    Kahn Iroir Pakpakairki Wehin Siohwa—2012
  • “Pwoson Me Kitail Kin Weweidki, Kaidehk Marain En Paliwar”
    Kahn Iroir Pakpakairki Wehin Siohwa—1998
Kilang Pil Ekei
Kahn Iroir Pakpakairki Wehin Siohwa—1999
w99 1/1 pp. 11-20

“Kakehlailla Mohngiongimwail Kan”

“Kumwail uhdahn pahn kin kanengamah, pwe kumwail en kapwaiada kupwur en Koht oh ale mehkan me e ketin inoukihong kumwail.”​—⁠IPRU 10:36.

1, 2. (a) Dahme wiawihong Kristian tohto nan senturi keieu? (b) Dahme kahrehda e mengeiong pwoson en luwetala?

SANG NANPWUNGEN sounnting kan koaros en Paipel, sohte emen rehrail me kin kalapw koasoia duwen pwoson duwehte wahnpoaron Pohl. Oh pak tohto, e kin koasoia duwen irail kan me arail pwoson kin luwetala de mehla. Karasepe ehu, Imenius oh Aleksander “keselahr ara pwoson.” (1 Timoty 1:​19, 20) Demas kesehla Pohl pwehki e “poakohngalahr sampah en ahnsou wet.” (2 Timoty 4:10) Ekei, pwehki arail wiewia kan me soh konehng Kristian, “kahmahmkilahr arail pwoson.” Mehteikan kin pitida pahn loalokong likamw oh “salongalasang elen pwoson.”​—⁠1 Timoty 5:8; 6:​20, 21.

2 Dahme kahrehda Kristian keidi ko luhssang arail pwoson ni ahl wet? Eri, “pwoson iei kamehlele mehkan me kitail kin koapworopworki de kasikasik, kamehlele mehkan me kitail sohte kak kilangki masatail.” (Ipru 11:⁠1) Kitail kin pwoson mehkan me kitail sohte kak kilang. Pwoson sohte anahn ong mehkan me kitail kak kilang. E mengei en doadoahkohng kepwe kan me sansal sang en doadoahkohng kepwe ngehnin kan me soh sansal ong masatail. (Madiu 19:​21, 22) Me sansal tohto​—⁠duwehte “ineng en uduk oh mehkan me aramas kin kilang oh ahnehda”​—⁠kin kaperen ong udukatail me soh unsek oh kak kaluwetela atail pwoson.​—⁠1 Sohn 2:16.

3. Soahngen pwoson dah me Kristian men en kekeirada?

3 Ahpw, Pohl mahsanih me “mehmen me men kowohng rehn Koht uhdahn pahn kamehlele me Koht ketin mie, oh me Koht kin ketin katingih irail kan me kin raparapahki.” Moses ahneki soahngen pwoson wet. E “kilikilengwohngete keting me pahn kohdo” oh “wonlahte mwowe nan eh seiloak, likamwete e kilang Koht me soh sansal.” (Ipru 11:​6, 24, 26, 27) Emen Kristian anahne soahngen pwoson wet. Duwen me sansaldahr nan artikel en mwowe, Eipraam kin wia mehn karasepe mwahu ehu nan irair wet.

Ahn Eipraam Mehn Karasepen Pwoson

4. Iaduwen elen mouren Eipraam kin kamwekid ah pwoson?

4 Eipraam kin koukousoan nan Ur ni ahnsou me Koht ketin inoukihong ih me e pahn wiahla semen kadaudok men me pahn kapaiada aramas kan en wehi kan koaros. (Senesis 12:​1-3; Wiewia 7:​2, 3) Sang ni poahson en inouwo, Eipraam peikiong Siohwa, ni ah kosoula mahs nan Aran oh mwuhr nan Kenan. Wasao, Siohwa ketin inoukihda me e pahn ketikihong sahpwo kadaudok en Eipraam. (Senesis 12:7; Nehmaia 9:​7, 8) Ahpw, pali laud en dahme Siohwa ketin inoukihda pahn pweida mwurin en Eipraam mehla. Karasepe ehu, pein Eipraam sohte sapwenikihla ekiste kisehn Kenan​—⁠ihte pwoaren paip en Makpela, me e pwainda en wiahla eh wasahn sarepedi me melahr akan. (Senesis 23:​1-20) Mendahki met, e pwoson mahsan en Siohwa. Mwohn mehkoaros, e pwoson “kahnimw ehu me Koht ketin kupwurehla oh kauwada, kahnimw me poahsoan poatopoat” en ahnsou kohkohdo. (Ipru 11:10) Soahngen pwoson wet kin kakehlail ih erein ah mour.

5, 6. Ni ahl dahieu en Eipraam pwoson mihla pahn kasongosong me pid sapwellimen Siohwa inou?

5 Met kin keieu sansal ni ah kin pid inouwo me kadaudok en Eipraam pahn wiahla wehi lapalap ehu. Pwe met en kak pweida, Eipraam anahne en nainekihda emen pwutak, oh e awiawihkiehr ahnsou reirei en paiekihda naineki emen seri. Kitail sehse e sounpar depe ni ahnsou me e tepin rong sapwellimen Koht inouwo, ahpw ni ahnsou me e wiahda sapal reireio kohlahng nan Aran, Siohwa saikinte ketikihong ih nah seri. (Senesis 11:30) E mihmihehr nan Aran ahnsou werei pwe e ‘nainekidahr kepwe koaros oh ladu koaros,’ oh ni ahnsou me e kosoula nan Kenan, e mahki sounpar 75 oh Sara mahki sounpar 65. Irail pil saikinte naineki seri ahnsouwo. (Senesis 12:​4, 5) Ni ahnsou me Sara mahkiehr sounpar 70 samwa, e medemedewe me ahnsouwet e nohn likeilapalahr oh solahr kak wiahiong Eipraam emen seri. Ihme kahrehda, e idawehnla tiahk en ahnsouwo, oh kihong Eipraam eh lidu serepein Akar, oh Eipraam wiahiong liduwo kisin pwutak men. Ahpw met kaidehn seri inoudao. Akar oh nah serio, Ismael, eri kedekedeo pekederla sang wasao. Mendahki met, ni ahnsou me Eipraam wie pekipek pwehki ira, Siohwa ketin inoukihda me e pahn kapaiada Ismael.​—⁠Senesis 16:​1-4, 10; 17:​15, 16, 18-20; 21:​8-21.

6 Ni pein sapwellimen Koht ahnsou me e ketin kileleiong​—⁠ahnsou reirei mwurin ara tepin rongada duwen inouwo​—⁠Eipraam me mahki sounpar 100 oh Sara me mahki sounpar 90 nainekihda kisin pwutako, Aisek. Ia uwen kaperen en met! Ong pwopwoud likeilapala wet, e kin kereniong duwehte kaiasada ehu ni ahnsou me paliwerera me mwomwen “mehla” wiahda mour kapw ehu. (Rom 4:​19-21) Ara awiawih met me werei, ahpw ahnsou me inouwo pweida, ira kilang katepen ara awiawih.

7. Iaduwen pwoson kin dokdoke kanengamah?

7 Mehn kahlemeng mwahu en Eipraam katamankin kitail me ahneki pwoson kaidehn kin ongete ahnsou kis. Pohl kin kadokehpene pwoson oh kanengamah ni ah ntingihdi: “Kumwail uhdahn pahn kin kanengamah, pwe kumwail en kapwaiada kupwur en Koht oh ale mehkan me e ketin inoukihong kumwail. . . . Eri, kaidehk kitail kisehn irail kan me kin kesehla ar pwoson, re ahpw kin lekdekla. Pwe mie atail pwoson oh kitail aleier komourpatail.” (Ipru 10:​36-39) Me tohto kin awiawihki ahnsou reirei pweidahn inouwo. Ekei kin awiawihki erein arail mour. Arail pwoson kehlail kin komoure irail. Oh, me duwehte Eipraam, re pahn alehdi katingo ni sapwellimen Siohwa ahnsouwo me e ketin kileleiong.​—⁠Apakuk 2:⁠3.

Rongorong Koht

8. Iaduwen kitail kin rong Koht rahnwet, oh dahme kahrehda met pahn kakehlailla atail pwoson?

8 Mie soahng pahieu me kakehle en Eipraam pwoson oh soahng pwukatte pil kak sewese kitail. Keieu, e kasalehda ah ‘kamehlele me Koht ketin mie’ ni ah kin peikiong mahsen en Siohwa. Ihme kahrehda, e weksang mehn Suhs kan ni mwein Seremaia, me kin kamehlele Siohwa ahpw sohte kin pwoson sapwellime mahsan kan. (Seremaia 44:​15-19) Nan rahnwet, Siohwa kin ketin mahsendohng kitail sang nan Paipel, sapwellime Mahsan sarawi, me Piter mahsanih me rasehng “marain me kin dakedaker wasa rotorot . . . nan kapehdamwail kan.” (2 Piter 1:19) Ni atail kin wadek kanaiehng Paipel, kitail kin “katungoalehki pali ngenetail mahsen kan en pwoson.” (1 Timoty 4:6; Rom 10:17) Pil ehu, nan imwin rahn pwukat, “ladu lelepek oh loalokong” kin ketikihda “mwengehn ngehn ni ahnsou me konehng,” kaweid en kapwaiada mouren kosonned kan en Paipel oh wehwehkihla kokohp en Paipel. (Madiu 24:​45-47) Rongorong Siohwa sang ni sawas pwukat kin kesempwal ong en ahneki pwoson kehlail.

9. Dahme pahn imwikihla atail uhdahn kamehlele koapworopwor en Kristian?

9 En Eipraam pwoson kin doake ah koapworopwor. “Ahpw e pwosonlahr oh koapworopwor mieier reh; ihme e wiahla semen wehi ngedehrie.” (Rom 4:18) Met iei soahng keriauwo me kak sewese kitail. Kitail endehpa manokehla me Siohwa kin “ketin katingih irail kan me kin raparapahki.” Wahnpoaron Pohl mahsanih: “Eri, ihme kahrehda kitail kin nantihong oh doadoahk laudki pwe kitail kin koapworopworki Koht ieias.” (1 Timoty 4:10) Ma kitail uhdahn kamehlele koapworopwor en Kristian, elen atail mour pahn wia kadehdehpen atail pwoson, duwehte me wiawi rehn Eipraam.

Patohwohng Koht

10. Soahngen kapakap dah me pahn kakehlailla atail pwoson?

10 Eipraam kin patohwohng Koht, oh met iei soahng kesiluhwo me kakehlailla eh pwoson. Rahnwet, kitail pil kak patohwanohng Siohwa, ni atail doadoahngki kisakis en kapakap ni mwaren Sises Krais. (Sohn 14:6; Episos 6:18) Mwurin ah koasoiahda karasaras ehu me kin kasalehda duwen kesempwalpen anahn en kapakap ahnsou koaros, Sises kalelepek peideko: “Nein-Aramas pahn ketin diar pwoson nin sampah ni eh pahn ketido?” (Luk 18:⁠8) Kapakap me kin kakehlailla pwoson sohte kin wiawi ni soh madamadau de en pein wiawi. Audepe me loal. Karasepe ehu, kapakap sang nan mohngiong me kesempwal ni ahnsou me kitail anahne wiahda koasoandi kesempwal kan de ni ahnsou me kitail kin mihla pahn kapwunod laud kan.​—⁠Luk 6:​12, 13; 22:​41-44.

11. (a) Iaduwen Eipraam kehlailla ni ahnsou me e wehkadahng Koht mohngiongih? (b) Dahme kitail kak sukuhlkihsang dahme wiawihong Eipraam?

11 Ni ahnsou me Eipraam wie likeilapalahr oh Siohwa saikinte ketikihong ih kadaudoko me e ketin inoukihda, e patohwanohng Koht eh pwunod. Siohwa ketikihong ih koapworopwor. Ia imwilahn met? Eipraam “likihala Kauno [Siohwa], oh ihme Kauno [Siohwa] ketin kupwurperenkihla oh sapwellimankihla.” Mwuri, Siohwa ketikihda kilel ehu pwehn kadehdehda mehlel en sapwellime mahsan kan. (Senesis 15:​1-18) Ma kitail wehkadahng Siohwa audepen mohngiongatail nan kapakap, oh pwungki sapwellimen Siohwa mahsan likilik kan nan sapwellime Mahsan, Pwuhk Sarawi, oh peikiong ih ni pwoson unsek, eri Siohwa pahn pil ketin kakehlailla atail pwoson.​—⁠Madiu 21:22; Sud 20, 21.

12, 13. (a) Iaduwen Eipraam ale kapai ni ahnsou me e idawehnla kaweid en Siohwa? (b) Soahngen ekperiens dah kei me pahn kakehlailla atail pwoson?

12 Soahng kapahieuwo me kakehlailla en Eipraam pwoson iei utuht me Siohwa ketikihong ih ni ahnsou me e kin idawehnla kaweid en Koht. Ni ahnsou me Eipraam kohla pwehn kapitala Lohd sang nanmwarki kan me koledi ih, Siohwa ketikihong Eipraam kana. (Senesis 14:​16, 20) Nin doken Eipraam kin koukousoan duwehte mehn keiru men nan sahpwo me kadaudokeo pahn sohsohkihla, Siohwa kapaiakihda ih kepwe kan. (Pil tehk Senesis 14:​21-23.) Siohwa ketin sewese nein Eipraam sounkohwao ah doadoahk en rapahkihda en Aisek ah pwoud me pahn konehng ih. (Senesis 24:​10-27) Ehi, Siohwa “kupwuramwahwiher Eipraam ni mehkoaros.” (Senesis 24:⁠1) Pwehki met ah pwoson inenen kehlail oh ah nanpwung rehn Siohwa Koht inenen kerenla me kahrehda Siohwa ketin ekerki ih “kompoakepahi.”​—⁠Aiseia 41:8; Seims 2:23.

13 Kitail nan rahnwet kak ahneki soahngen pwoson kehlail? Ehi. Ma kitail, duwehte Eipraam, kin koapworopworki Siohwa ni atail kin peikiong sapwellime kehkehlik kan, eri e pil pahn kapaikitailda, oh met pahn pil kakehlailla atail pwoson. Karasepe ehu, ma kitail pahn kilang Ripoht en Kalohk en Pahr en 1998, e kin kasalehda me aramas tohto kin ale kapai ni ahl kaselel ehu ni ahnsou me re kin peikiong sapwellime kehkehlik en kalohngki rongamwahu en Wehio.​—⁠Mark 13:10.

Rekord en Pwoson Rahnwet

14. Iaduwen Siohwa kapaiada doadoahk en kalohk en kihpeseng Kingdom News No. 35?

14 Nan October en 1997, kohpeseng en Kingdom News No. 35 me wiawi nan sampah pwon kin inenen pweida mwahu, met pwehki kalahngan en doadoahk idipek oh ngoang en emenemen Sounkadehde rar kan. Dahme wiawi nan Ghana ihme kin wiawi wasa koaros. Kereniong doaropwe rierar limelop kohpeseng ni lokaia pahieu, oh imwilahn met iei me aramas kereniong 2,000 men onop Paipel. Nan Cyprus, Sounkadehde riemen me kin kihkihpeseng Kingdom News tehkada duwen emen padire me kin pwakpwakih ira. Mwurin ahnsoukis, re kihong ih nah doaropwe Kingdom News. Mieiehr nah doaropwe oh e koasoia: “I inenen wadekala rohng me e audaudki me kahrehda I men kapinga aramas kan me wiahda doaropwe wet.” Nan Denmark, doaropwe en Kingdom News rar limelop me kohpeseng kin wahdo imwila mwahu kan. Emen lih me kin doadoahk ni pelien kamwahuwi nanpwungen aramas oh wehipokon nan wasao koasoia: “Rohng me mihmi nan doaropwe wet kin wiawihda ong aramas koaros. E mengei en wehwehki, oh e kin kamwekid uhk, oh kahrehong uhk en men kalaudehla omw wehwehki met. E uhdahn kin lel mehn akedeio me e wiawihda ong!”

15. Dahme wiawi me kasalehda me Siohwa kin ketin kapaiada nannanti en kalohkohng aramas wasa koaros?

15 Nan 1998 nanti wiawihda pwehn kalohk ong aramas kaidehn nan imwarail kante ahpw wasa koaros. Ehu pwopwoud me iang doadoahk en misineri nan Côte d’Ivoire pwarek sohp 322 ni wap kan. Re pwilikihdi pwuhk 247, makasihn 2,284, brochure 500, oh tract epwiki kei, iangahki video kan ong sehla kan en kilang nindoken arail seiseiloak nansed. Emen Sounkadehde nan Canada kohla wasahn onesapahl sidohsa. Aramas me ahneki wasahn onesapahl sidohsao men rong, oh brothero mihmi reh erein awa pahieu elep, mendahki uwen awa kan koaros me kapatapatpene me brother padahngki mwurin emenemen sounpwain kan kin ihte awa ehu. Kedekedeo, ohlo koasoanehdi en onop kuloak 10:00 nih pwong. Ahpw, ekei pak, re sohte kin tepda onop lao lel lukepen pwong oh kin wiawi lao lel kuloak riau ni sohrahn. Koasoandio inenen apwal, ahpw mie imwila mwahu me kohsang met. Ohlo koasoanehdi en ritingidi ah pisnis Rahn Sarawi kan pwehn kak iang towehda mihding kan. Ahnsou keren ih oh ah peneinei kin wie kekeirada mwahu.

16. Eksperiens dah kei kasalehda me brochure Kupwurki oh pwuhken Knowledge kin wia mehn kalohk kehlail nan doadoahk en kalohk oh katohnpadahk?

16 Brochure en Dahme Koht Kupwurki Kitail En Wia? oh pwuhk en Knowledge That Leads to Everlasting Life kin wiahte mehn kalohk kehlail kei nan doadoahk en kalohk oh katohnpadahk. Nan Itali emen lih kadek me kin awiawih pwoas alehda nah doaropwe en Kingdom News. Rahn en mwuri, kalohk pil pwurehng wiawihong ih oh e alehda brochure en Kupwurki. Ehuehu rahn mwurin met, e kin onopki Paipel erein minit 10 lel minit 15 ni peidi en pwoaso. Mwurin sounpwong ehu elep, e koasoanehdi me eh sohla pahn wia emen lih kadek oh e pahn kohla nan sapweo nan Guatemala pwehn pousehla ah onopo. Nan Malawi emen lih me adaneki Lobina me kin poadidi ong sarawi kin nsensuwedki nah serepein kan ara tepida onop Paipel rehn Sounkadehde kan en Siohwa. Mendahki met, serepein ko kin ehukihong ara nohno padahk mehlel ni ahnsou kan me re kakohng. Nan June en 1997, Lobina kilangada pwuhken Knowledge oh pwonopwonki lepin lokaia ko “Knowledge That Leads” (Loalokong Me Kin Kahluwa). Nan July, e pwungkihda en onop Paipel. Nan August, e iang towehda Kapokon en District oh kin rongorong kanaiehng prokramo. Ni imwin sounpwongo, e kesehla ah sarawio oh warohngehr en wiahla emen sounkalohk me saikinte papidais. Nan November en 1997 e papidaisla.

17, 18. Iaduwen nein Society video kan kin katapan ni ah kin sewese emenemen aramas en “kilang” soahng ngehnin kan?

17 Nein Society video kan kin seweseiehr me tohto en “kilang” soahng kan me ngehnin. Nan Mauritius emen ohl kesehla ah pelien lamalam pwehki saminimin en lamalam wet. Emen misineri kasalehong ih duwen minimin en Sounkadehdehn Siohwa kan, ni ah doadoahngki video United by Divine Teaching. Ohlo wadekala met, oh nda: “Kumwail Sounkadehdehn Siohwa kan miher nan Paradais!” E pwungkihda en onop Paipel. Emen sister nan Sapan kasalehong eh pwoudo me soh pwoson video Jehovah’s Witnesses​—The Organization Behind the Name, oh ohlo mwekidiki met me kahrehong en onop Paipel kaukaule. Mwurin ah kilang United by Divine Teaching, e men wiahla emen Sounkadehdehn Siohwa. Video me mih ni pali silu me oarelap koasoia The Bible​—A Book of Fact and Prophecy sewese ih en kapwaiada mouren kosonned kan en Paipel nan ah mour. Ikmwuri, video Jehovah’s Witnesses Stand Firm Against Nazi Assault kasalehong ih me Siohwa kin ketin kakehlailla sapwellime aramas akan sang uhwong kan en Sehdan. Ohlo papidaisla nan October en 1997.

18 Mehpwukat kin wiahte ekei eksperiens kan me Sounkadehde kan kin paiekihda erein pahr en kalohk nan sounpahr samwalahro. Eksperiens pwukat kin kasalehda me Sounkadehdehn Siohwa kan kin ahneki pwoson me wiewia kin iang oh me Siohwa kin ketin kakehlailla pwoson wet ni ah kin ketin kapaiada arail kalohk.​—⁠Seims 2:17.

Kekeirada Pwoson Nan Rahnwet

19. (a) Iaduwen atail mihmi nan irair ehu me mwahusang Eipraam? (b) Aramas depe me kohpene nan pahr samwalahro pwehn katamanda Katamanpen Kamatalahn Krais Sises? (c) Sahpw dah kei me irail ko me towehda Katamano nan pahr samwalahro inenen tohto? (Kilang chart ni pali 12 lel 15.)

19 Ni ahl tohto kitail nan rahnwet kin mihmi nan irair ehu me mwahusang Eipraam. Kitail ese me Siohwa ketin kapwaiadahr sapwellime inou kan koaros ong Eipraam. Kadaudok en Eipraam kan sohsohkilahr Kenan, oh re wialahr wehi laud ehu. (1 Nanmwarki 4:20; Ipru 11:12) Me pil laud sang met, mpen sounpahr 1,971 mwurin Eipraam mweselsang nan Aran, emen kadaudoke, Sises, papidaisla nan pihl rehn Sohn Sounpapdais oh mwuri ni ngehn sarawi rehn pein Siohwa pwehn wiahla Mesaia, Kadaudok en Eipraam ni irair ehu me unsek oh ngehnin. (Madiu 3:16, 17; Kalesia 3:16) Ni Nisan 14, 33 C.E., Sises tohnmeteikihla pein moure nin duwen tomw ehu ong irail ko me pwoson ih. (Madiu 20:28; Sohn 3:16) Aramas rar kan ahnsouwet kak paiekihda Sises. Nan pahr samwalahro, meh 13,896,312 kin kohpene ni Nisan 14 pwehn katamanda wiewia limpoak kaselel wet. Ia uwen met kin kawahuwihala Siohwa, Sounkolokol Inou Lapalapo!

20, 21. Iaduwen aramas kan sang nan wehi koaros kapaiada pein irail ki Kadaudok en Eipraam nan senturi keieu, oh iaduwen re kin kapaiada pein irail rahnwet?

20 Nan senturi keieu, aramas tohto sang nan wehi kan koaros​—⁠tepidahsang rehn Israel en uduk​—⁠kasalehda arail pwoson Kadaudok en Eipraam menet oh wiahla seri keidi kan en Koht, tohn “Israel en Koht” me kapw oh ngehnin. (Kalesia 3:​26-29; 6:16; Wiewia 3:​25, 26) Re kasik mehlel en ahnekihla mour ngehnin me solahr kak mehla nanleng nin duwen iengen Krais kaun akan nan Wehin Koht. Ihte irail 144,000 me pahn kapaiada ni ahl wet, oh me malaulaute rehrail me luhluhwe. (Kaudiahl 5:​9, 10; 7:⁠4) Nan pahr samwalahro, irail meh 8,756 kadehdehda arail kamehlele me re iang kisehn nempe wet ni arail iang tungoale pilawa oh nim wain ni kasarawi en Katamano.

21 Kereniong Sounkadehdehn Siohwa kan koaros rahnwet kin iang kisehn “pokon kalaimwun” me Kaudiahl 7:​9-17 kohpada. Pwehki irail kin ale kapai kan sang arail pwoson Sises, re ahneki koapworopwor en mour soutuk nan paradais nin sampah. (Kaudiahl 21:​3-5) Meh 5,888,650 ko me kin iang doadoahk en kalohk nan 1998 kin wia mehn kadehde me pokon wet inenen “kalaimwun.” E kin keieu kaperen en kilang me ehdin sahpw riau pwukat koaros Russia oh Ukraine ripohtki sounkalohk pohnangin meh 100,000. Me pil kaselel iei, ripoht sang United States​—⁠mie sounkalohk 1,040,283 nan August! Sahpw silu pwukat kin iangete kisehn sahpw 19 ko me ripohtki sounkalohk pohnangin meh 100,000 nan pahr samwalahro.

Koapworopwor Me Ahnsou Keren Pahn Pweida

22, 23. (a) Dahme kahrehda kitail en kakehlailla mohngiongatail nan rahnwet? (b) Iaduwen atail kak duwehte Eipraam, ahpw kaidehn duwehte me seupwoson kan me Pohl koasoia?

22 Irail ko me iang towehda Katamano kin katamanda duwen ia uwen atail miher ni pweida tohtohn sapwellimen Siohwa inou kan. Nan 1914, Sises kasapwilda nin duwen Nanmwarki en Wehin Koht nanleng, oh e tepiadahr ah ketier nan manaman en Wehio. (Madiu 24:3; Kaudiahl 11:15) Ehi, Kadaudok en Eipraamo ahnsouwet kin kakaun nanleng! Seims mahsanihong Kristian kan en ah mwehi: “Eri, kumwail pil kanengamahiong; kakehlailla mohngiongamwail, pwe rahnen ketidohn Kauno kerendohr.” (Seims 5:⁠8, NW) Eri, met wehwehki me Krais ketier nan mwoale! Ia uwen met kin wia kahrepe laud en kakehlailla mohngiongatail kan!

23 Atail likih sapwellimen Koht inou kan en ahnsou koaros kehlailkihda onop en Paipel kaukaule oh kapakap me mie audepe. Kitail endehpa uhdisang alehda kapai kan en Siohwa ni atail kin peikiong sapwellime Mahsan. Eri kitail pahn duwehte Eipraam, kaidehn duwehte irail ko me arail pwoson kin luwetala oh mehla, me Pohl koasoia. Sohte mehkot me pahn irehkitaildihsang atail pwoson me keieu sarawi. (Sud 20) Kitail kapakapki me Sounkadehdehn Siohwa kan koaros pahn kapwaiada met erein pahr en kalohk en 1999 oh pil lao lel ahnsou kohkohlahte.

Komw Wehwehki?

◻ Iaduwen atail kak rong Koht nan rahnwet?

◻ Kapai dah kei kin kohsang kapakap kan me mie audepe ong Koht?

◻ Ma kitail ni peik idawehnla sapwellimen Siohwa kaweid kan, iaduwen atail pwoson pahn kehlailla?

◻ Iawasa nan ripoht en kalohk en ehu ehu sounpar (pali 12 lel 15) me ke keieu perenki?

[Kakon nan pali 12-15]

1998 RIPOHT EN PAHR EN KALOHK EN SOUNKADEHDEHN SIOHWA KAN NAN SAMPAH PWON

(Pwehn kilang nting kan ni soandi mwahu, kilang pwuhk wet)

[Kilel nan pali 16]

Ma kitail kin rong sapwellimen Siohwa Mahsan, atail likih sapwellime inou kan pahn kehlailda

[Kilel nan pali 18]

Atail pwoson kin kehlailla ni atail kin iang kalohk

    Pwuhk kan en lokaiahn Pohnpei (1987-2025)
    Log Out
    Log In
    • Ponapean
    • Share
    • Me Ke Mwahuki
    • Copyright © 2025 Watch Tower Bible and Tract Society of Pennsylvania
    • Terms of Use
    • Privacy Policy
    • Privacy Settings
    • JW.ORG
    • Log In
    Share