Komour Kohsang Rehn Siohwa
“Atail Koht iei Koht me kin komourkitailla.”—MELKAHKA 68:20.
1, 2. (a) Dahme kahrehda kitail kak nda me Siohwa iei Utupen komour? (b) Iaduwen ke pahn kawehwe Lepin Padahk 21:31?
SIOHWA iei Sounkomour en aramas akan me kin poakohng ih. (Aiseia 43:11) Depit, Nanmwarki en Israel ndand men, eseier met sang ni pein eh ekspiriens, oh sang nan eh mongiong, e koulki koul wet: “Komour kohsang rehn Siohwa.” (Melkahka 3:8, NW) Soukohp Sona pil doadoahngkihte lepin lokaia pwukat ni ahnsou e wie eh kapakap ngidingid nan kapehd en mwahmw kalaimwuno.—Sona 2:9.
2 Nein Depit pwutak, Solomon pil eseier me Siohwa iei Utupen komour, pwe e koasoia met: “Ke kak kaunopada oahs akan ong mahwen, ahpw Siohwa me kin ketin kupwurehda ihs me pahn kana.” (Lepin Padahk 21:31) Nan Middle East en mahsie, mahn ox kin wuradekih mehn deipwel, mahn ahs kan kin wahda dipwisou toutou kan, aramas akan kin dake mahn mule kan, oh mahn oahs kan kin kadoadoahk nan mahwin. Mwohn mehn Israel akan pidelong nan Sapwen Inou, Koht ahpw kekehlikiong irail me arail nanmwarki kapwo sohte pahn “katohtohla mahn oahs akan ong pein ih.” (Deuderonomi 17:16) Irail sohte pahn anahne mahn oahs akan ong mahwen, pwehki Siohwa pahn doarehla sapwellime aramas akan.
3. Mehnia peidek kan me kesempwal kitail en koasoi duwen?
3 Kaun Siohwa me Keieu Lapalap iei emen “Koht me kin komourkitailla.” (Melkahka 68:20) Iren Paipel wet kin kihong kitail kangoang laud! Ahpw ni ahl dahieu en “komourla” me Siohwa ketin wiahdahr? Oh ihs me e komourala?
Siohwa kin Ketin Komourala me Pwung kan
4. Iaduwen kitail ese me Siohwa kin ketin doarehla aramas pwung kan?
4 Koaros me kin nantiong en momourki mour pwung nin duwen sapwellimen Koht ladu inouda kan kak ale kamweit sang ahn wahnpoaron Piter kaweid: “Eri, Kauno [“Siohwa,” NW] ketin mwahngih kapitasang me poadidi kan nan ar apwal akan, oh pil ketin mwahngih nekinekid ong me suwed kan lokolok lao lel Rahnen Kadeik.” Pwehn kasansalehda ire wet, Piter koasoia me Koht “sohte ketin kupwurehla mehn kawa ko, ahpw e ketikihdiong pohn tohn sampah suwed ko Nohlik Lapalapo; ihte me e ketin komourala Noha, iei ih me lohkiseli duwen mour pwung pahn kupwur en Koht, oh pil iangahki aramas isimen.”—2 Piter 2:5, 9.
5. Pahn soahngen irair dah kei me Noha papah nin duwen emen me kin “lohkiseli duwen mour pwung pahn kupwur en Koht”?
5 Medewehla me pein kowe me kin momour ni mwehin Noha. Ngehn saut kan me wia aramasala mihmi nin sampah. Nein tohnleng sapeik pwukat kin wie tiahk lemei ong aramas teikan, oh ‘kamaramas kaparaparalahr wasa koaros.’ (Senesis 6:1-12) Ahpw, aramas akan sohte kak kamasepwehki Noha en kesehla eh papah Siohwa. E kin wie emen me kin “lohkiseli duwen mour pwung pahn kupwur en Koht.” Ih oh eh peneinei wiahda warihmw ehu, oh irail kin kamehlele me suwed pwukat pahn sohrala erein arail mwehi. Ahn Noha pwoson kin kadeikada sampah en ni ahnsowo. (Ipru 11:7) Irair akan nan rahn pwukat kin duwehte ni mwehin Noha, oh met kin wie kasansalepen imwin rahn akan en koasoandi suwed wet. (Madiu 24:37-39; 2 Timoty 3:1-5) Komw pahn duwehte Noha, me wie sounkalohk lelepek men, iang sapwellimen Koht aramas akan oh awih sapwellimen Siohwa kamour?
6. Iaduwen 2 Piter 2:7, 8 kasalehda me Siohwa kin doarehla aramas pwung kan?
6 Piter pil kin kihda mehn kadehde kan me kin kasalehda me Siohwa kin doarehla aramas pwung kan. Wahnpoaron menet koasoia: “[Koht] ketin kapitala Lohd, ohl lelepek men, me nsensuwedkihla kohwahlap tiahk samin en aramas sapeik kan. Pwe, ni eh ohl lelepek emen, e ahpw kin mihmi nanpwungarail rahn koaros oh kin kilikilang oh rongorong ar wiewia suwed kan me kin kansensuwedihada nan kapehde.” (2 Piter 2:7, 8; Senesis 19:1-29) Dihp en nenek wialahr elen mour ong aramas rar kei nan imwin rahn akan. Duwehte Lohd, komw kin ‘nsensuwedkihla kohwahlap tiahk samin’ me tohto me kin wia rahn pwukat? Ma komw kin nsensuwedkihla, oh ke kin wia dahme pwung, ele mwein Siohwa pahn doarehla komwi ni ahnsou me koasoandi suwed wet pahn imwisekla.
Siohwa kin Doarehla Sapwellime Aramas akan Sang Aramas Uhwong kan
7. Iaduwen sapwellimen Siohwa wiewia kan ong mehn Israel kan nan sapwen Isip kin wie mehn kadehde ehu me e kin ketin kapitasang sapwellime aramas akan sang kalokolok?
7 Erein koasoandi mering wet mihmihte, sapwellimen Siohwa ladu kan pahn lelohng kalokolok oh uhwong kan me kin kohsang rehn imwintihti kan. Ahpw re kak likih me Siohwa pahn doarehirailla, pwe mahso, e ketin doarelahr sapwellime aramas akan me kin lelohng kalokolok. Medemedewe ma komwi emen mehn Israel me kin lelohng kalokolok pahn mehn Isip kan ni mwehin Moses. (Eksodus 1:1-14; 6:8) Koht kin kaloke mehn Isip kan irerekla. (Eksodus 8:5–10:29) Ni ahnsou me kalokolok kaeiseko wiawi oh kemehla irail mesenih kan en mehn Isip, Parao mweidong mehn Israel akan en kohkohlahsang Isip, ahpw mwuhri, e koasoanehdi nah sounpei ko en pwakih irail. Ahpw sohte pwand, ih oh nah sounpei ko kamakamala nan Sehd Weitahta. (Eksodus 14:23-28) Ke iang Moses oh mehn Israel kan koaros koulki koul wet: “Siohwa iei sounpei kommwad men; Siohwa iei mware. E ketin sikendiong karis en sounpei en Isip kan oh wararail kan nan kepin madau; kaunen sounpei wadawad koaros ahpw duhla nan Sehd Weitahta. Ahden sehdo koaduhpwaliraildi; re ahpw kihrla, rasehng takai ehu me kin kihrdiong nan kepin madau.” (Eksodus 15:3-5, NW) Imwihla suwed wet pil pahn kohwong irail akan me kin kaloke sapwellimen Koht aramas akan nan imwin rahn pwukat.
8, 9. Sang pwuhken Sounkopwung, kihda ehu karasaras me pahn kadehdehda me Siohwa kin doarehla sapwellime aramas akan sang irail akan me kin kaloke irail.
8 Sounpahr tohto mwurin mehn Israel akan pidelong nan Sapwen Inou, sounkopwung kan kin tehk ma kopwung pwung kin wiawi rehrail. Aramas akan kin ekei pak lelohng kahpwal akan sang kalokolok kan me kohsang wehi teikan, ahpw Koht kin doadoahngki sounkopwung lelepek kan en doarehirailla. Mendahki kitail pil pahn ‘sengisengki [atail] lokolok laud pahn [atail] imwintihti kan,’ Siohwa pahn pil doarehkitailla nin duwen sapwellime ladu lelepek kan. (Sounkopwung kan 2:16-18; 3:9, 15) Nan Paipel pwuhk en Sounkopwung kan, e kin kamehleleiong kitail duwen met oh duwen komour lapalap me Koht pahn ketikihong kitail ki sapwellime Sounkopwung idihda, Sises Krais.
9 Kitail pahn pwurala ni mwehin Sounkopwung Parak. Pwehki kaudok likamw oh Siohwa sohlahr pwungkin irail, mehn Israel kan lelohng kahpwal laud sang rehn Nanmwarki en Kenan, Sapin, erein sounpahr 20. Sisera iei kaun en sounpei kan en mehn Kenan. Ahpw, ‘sohte mehn sansar ehu, de ketieu pwoat me diarek nan Israel rehn ohl 40,000,’ edetehn wehio me tohtohki aramas pah rar samwa. (Sounkopwung 5:6-8, NW) Mehn Israel kan sengisengki oh koluhkihla diparail kan ong Siohwa. Nin duwen Koht padahkiong lih soukohp, Depora, me Parak en uhd koasoanehdi ohl 10,000 ni Nahna Tapor, oh Siohwa kahrehlahng imwintihti kan nan wahu me mihmi pahnangin Nahna Tapor. Ke kak rong ngihl lauden weren Sisera oh nah sounpei kan werennansapw mete 900 ko me kotkote mohs oh pillap Kison me madekengdahr. Ahpw keteu laud mweredi oh met kahrehong pillap Kison en lapakehda oh ahd kehlail en wiawi. Ni Parak oh nah karis en sounpei kan kohdihdo sang Nahna Tapor, re ahpw kilangada en Siohwa ketin kapingada sounpei kan en Sisera. Nein Parak sounpei kan uhd pwahki mehn Kenan kan me kin sang en tangowei, ahpw sohte me pitla. Met wia kilel en kaweid ong atail imwintihti kan me lemeleme me irail kak uhwong Koht!—Sounkopwung 4:3-16; 5:19-22.
10. Dahme kahrehda kitail kak likih me Koht pahn ketin doarehla sapwellime ladu kan en nan rahnpwukat sang ahr imwintihti kan?
10 Siohwa pahn ketin doarehla sapwellime ladu kan nan rahnpwukat sang ahr imwintihti kan, duwehte me e ketin doarehla mehn Israel kan me kin lemmwin Koht ni ahnsou re kin lelohng kahpwal akan. (Aiseia 43:3; Seremaia 14:8) Koht doarehla Depit sang eh “imwintihti kan.” (2 Samuel 22:1-3) Mehnda ma kitail pahn lelohng kahpwal akan oh kalokolok kan nin duwen sapwellimen Siohwa aramas akan, kitail en eimah, pwe sapwellime Nanmwarki Mesaia pahn ketin kapitasang kitail kahpwal akan. Ehi, “E kin doarehla mouren me paisuwed kan. E kin ketin kapitirailla sang nan arail kehnaudek oh ahngkehlail kan; e kin ketin kesempwalki ar mour.” (Melkahka 72:13, 14) Komourala wet inenen kerendohr.
Koht kin Ketin Doarehla Irail akan me kin Likih Ih
11. Mehn kahlemeng dahieu me pid duwen likih Siohwa me pwutak pwulopwul Depit wiahda?
11 Pwehn kilang komour sang rehn Siohwa, kitail anahne ni eimah likih Ih. Depit kasansalehda me e kin likih Koht ni ahnsouwo me e tuhwong kodon Kolaiad. Medemedewe duwen uwen reirei oh laud en mehn Pilisdiao me keskesinenda mwohn kisin pwutako Depit, oh Depit uhd likwerih: “Ke kohkodohng peikihong ie kedlahs oh ketieu laud oh pil ketieu tikitik, a ngehi I pahn peikihong uhk mwaren Siohwa, Wasa Lapalap, Koht en karis en Israel kan, me ke peliandahr. Rahnwette Siohwa pahn ketikihong uhk pahn ei manaman. I pahn poweiukedi, oh lupukasang moangomwen. Oh I pahn wiahkihla paliweren sounpei en Pilisdia kan kenen menpihr oh mahn akan kanarail kisin mwenge. Wehiet pwon pahn esehla me mie en Israel eh Koht. Eri, aramas koaros wasaht pahn kilang me e sohte ketin anahne kedlahs de ketieu pwe en kapitala sapwellime aramas akan.” Kolaiad mehlahr, oh mehn Pilisdia kan kamakamala. E sansal me Siohwa kin ketin doarehla sapwellime aramas akan.—1 Samuel 17:45-54, NW.
12. Dahme kahrehda e pahn kihong kitail sawas laud en tamanda duwen nein Depit ohl kehlailo, Eleasar?
12 Ni ahnsou me kitail kin lelohng kalokolok kan sang rehn aramas akan, kitail anahne “eimah” oh liki Koht ni unsek. (Aiseia 46:8-13, NW; Lepin Padahk 3:5, 6) Tehk dahme wiawi nan wasa me adaneki Pas-dammim. Mehn Israel kan pwuroweisang sounpei en mehn Pilisdia. Ahpw Eleasar sohte masak irail, ih emen nein Depit kesilimen en ohl ndand kan. E kesinendahte nan mwetuwel en parli ehu oh kelepw doadoahngkihla kedlas ehu oh kemehkihla mehn Pilisdia kan. Eri, ‘Kauno [“Siohwa,” NW] eri ketikihong en poweiraildi.’ (1 Kronikel 11:12-14; 2 Samuel 23:9, 10) Sohte me kaskasik me pein kitail en kelepw powehdi pwihn en sounpei ehu. Ahpw, ekei ahnsou, kitail kin kelepw oh lelohng kahpwal akan sang rehn atail imwintihti kan. Kitail pahn kapakap oh likih Siohwa, Koht me kin ketin doarehla aramas akan? Kitail pahn rapahki sapwellime sawas pwehn sewese kitail en dehr pangala iengatail me pwoson akan ong irail akan me kin kaloke kitail?
Siohwa kin ketin Doarehla Aramas akan me kin Kolokolte Ahr Lelepek
13. Dahme kahrehda e apwal en kolokolte ahr lelepak ong Koht nan keinek eisek en wehin Israel?
13 Pwe kitail kak iang kilang komour sang rehn Siohwa, kitail anahne kolokolte atail lelepek ong Ih, mehnda ma e apwal. Sapwellimen Koht aramas akan en mahs kin lelohng soangsoangen kasongosong kan. Medemedewe dahme ke pahn lelohng ma ke momour ni mwehin keinek eisek en Wehin Israel. Pwehki Reopoham kin lemei ong mehn Israel akan, keinek eiseko sohla men utungada ih oh irail tepida wiahda wehin Israel ni paliepeng. (2 Kronikel 10:16, 17; 11:13, 14) Sang nanpwungen nanmwarki tohto, Sehu me keieu mwahu, ahpw pil ih ‘sohte kapwaiada ni mohngiong unsek Kosonned en Kauno [“Siohwa,” NW].’ (2 Nanmwarki 10:30, 31) Ahpw, mie sang ekei nan keinek eisek en wehio me kin lelepek ong Koht. (1 Nanmwarki 19:18) Irail pwoson Koht, oh e ketin ieiang irail. Mendahki ke kin lelohng kasongosong kan, ke kin kolokolte omw lelepek ong Siohwa?
14. Dahme Siohwa ketin doarehla ni mwehin Nanmwarki Esekaia, oh dahme kahrehda mehn Papilon kan kalowehdi mehn Suda?
14 Pwehki aramas tohto sohlahr kin kapwaiada sapwellimen Koht Kosonned akan, wehin Israel kin lelohng kahpwal akan. Ni ahnsou me mehn Asiria kan kalowehdi irail nan pahr 740 B.C.E., ekei aramas sang nan keinek eiseko tangala ni keinek riau en wehin Suda, wasa me irail kak kaudokiong Siohwa nan sapwellime tehnpas. Pahmen sang nanpwungen nanmwarki 19 en Suda me kohsang kadaudok en Depit—Asa, Seosopat, Esekaia, oh Sosaia—kin inenen lelepek ong Koht. Ni mwehin ohl lelepek Esekaia, mehn Asiria kan kohdohng mahweniong Suda ki karis en sounpei lapalap ehu. Sansal me Koht sapengla ahn Esekaia kapakap kan, pwe e doadoahngki tohnleng emente en kemehla mehn Asiria 185,000 ni pwong ehute, oh met doarehla sapwellime tohnkaudok kan! (Aiseia 37:36-38) Mwuri, aramas pwukat sohte kapwaiada Kosonnedo oh pil sohte rong kaweid kan me kin kohsang rehn sapwellimen Koht soukohp akan, oh met kahrehong mehn Papilon kan en kalowehdi Suda oh kawehla poasen kaun en Serusalem, oh tehnpas sarawio nan pahr 607 B.C.E.
15. Dahme kahrehda mehn Suhs akan me selidi nan Papilon anahne irairen dadaur, oh iaduwen Siohwa komourala irail?
15 Irair en dadaur me kesempwal emen en ahneki pwehn kolokolte ahr lelepek ong Koht ni ahnsou me re selidi nan Papilon erein sounpar 70. (Melkahka 137:1-6) Soukohp Daniel wia mehn kahlemeng mwahu nin duwen emen me kin kolokolte eh lelepek. (Daniel 1:1-7; 9:1-3) Medewehla duwen ia uwen laud eh peren ni ahnsou me e rong duwen kosonnedo me Nanmwarki Sairus en Persia wiahda nan pahr 537 B.C.E., me kin mweidohng mehn Suhs akan en pwurala Suda oh onehda sapahl tehnpaso! (Esra 1:1-4) Daniel oh mehteikan dadaurete erein sounpahr tohto, ahpw ikmwuri, re kilang en Papilon ohla oh komourpen sapwellimen Siohwa aramas akan eh pweida. Met pahn kak sewese kitail en pil dadaurete ni atail pahn awiawih kamwomwalahn “Papilon Lapalap,” minimin en kaudok likamw koaros en sampah.—Kaudiahl 18:1-5.
Siohwa kin Ahnsou Koaros Ketin Doarehla Sapwellime Aramas akan
16. Ihs me Koht komourala ni mwehin Lih Nanmwarki Ester?
16 Siohwa kin ahnsou koaros doarehla sapwellime aramas akan ni ahnsou re kin lelepek ong Ih. (1 Samuel 12:22; Aiseia 43:10-12) Medewehla ni mwehin Lih Nanmwarki Ester—senturi kalimau B.C.E. Nanmwarki Ahasuerus (Serksihs I) idihada Aman en wiahla prime minister. Aman inenen lingeringerda pahn Mordekai pwehki e sohte poaridi mwowe, oh Aman uhd wiahda pilahn ehu en kemehla Mordekai oh mehn Suhs akan koaros me mihmi nan Wehin Persia. E kawehwehong Nanmwarkio me irail iei aramas akan me kin kawehla kosonned akan, oh e pahn pein kihda mwohni ma irail pahn kamakamala, oh e ale mweimwei en doadoahngki nan Nanmwarkio rihng pwen kamanala doaropwe en kamehla mehn Suhs ako. Ester ni eimah kasalehong Nanmwarkio me ih mehn Suhs men oh e kasansalehda ahn Aman pilahn en kemehla irail. Aman ahpw langadahng wasahn kalusiamo me e kaunopadahr ong Mordekai. Mordekai uhd ale pwukoah en prime minister, oh e pil ale manaman en mweidong mehn Suhs akan en pere pein irail. Irail eri kalowehdi ahr imwintihti kan. (Ester 3:1–9:19) Wiewia wet anahne kakehle atail pwoson me Siohwa pahn pil doarehla sapwellime ladu peik kan nan atail ahnsou.
17. Iaduwen irairen peik kin sewese mehn Suhs Kristian akan nan Sudia nan tepin senturi?
17 Pil ehu kahrepe me Koht ketin doarehla sapwellime aramas akan iei pwehki re kin peikiong Ih oh sapwellime Ohl. Medewehla me komwi emen tohnpadahk en Sises mehn Suhs men nan keieun senturi. E mahsanihong irail: “Ni amwail pahn kilang karis en sounpei kei me kapilpenehr Serusalem, kumwail pahn esehki me ahnsoun eh ohla kerendohr. Eri, ni ahnsowo irail kan me mihmi nan Sudia, re en sopolahng pohn dohl kan.” (Luk 21:20-22) Sounpahr tohto dowe powe, oh ke pahn wapwonki iahd mahsen pwukat pahn pweida. Ahpw, nan pahr 66 C.E. mehn Suhs akan kin tepida uhwong oh sounpei en mehn Rom kan pahnangin Cestius Gallus kapilpene Serusalem oh kohkohla lel kehl en tehnpaso. Ahpw, ni ahnsouwohte, oh ni soh kahrepe, mehn Rom kan pwurala. Dahme mehn Suhs Kristian akan pahn wia met? Nan nah pwuhken Ecclesiastical History (Book III, ire laud V, 3), Eusebius koasoia me irail tangasang Serusalem oh Sudia. Irail poadoandoarla pwehki re peikiong mahsen en kaweid me mihmi nan kokohp en Sises. Komw kin pil mwadang en kapwaiada kaweid en iren Pwuhk Sarawi kan me kin kohsang “ladu lelepek kan” me idihada en apwaliada “dipwisou kan koaros” en Sises”?—Luk 12:42-44.
Komourala ong Mour Kohkohlahte
18, 19. (a) Komour dahieu me matalahn Sises ritingihda, oh ong ihs? (b) Dahme wahnpoaron Pohl nantiong song en wiahda?
18 Mehn Suhs Kristian akan nan Sudia kapitala ahr mour pwehki irail rong kaweid en Sises. Ahpw matalahn Sises kin ritingada mour soutuk ong “aramas koaros.” (1 Timoty 4:10) Anahnepen tomw ong tohnsampah tepida ahnsou me Adam dipada, ihme pein ih katiasang mour oh e mwomwen netikihla mouren aramas en liduwih dihp oh mehla. (Rom 5:12-19) Meirong en mahn akan me wiawi pahnangin Kosonned en Moses kin wiahte kilel ehu en pwaindi dihp. (Ipru 10:1-4) Pwehki sohte en Sises pahpa ni pali uduk oh pil sapwellimen Koht ngehn sarawi me ‘ti pohn’ Mery sang ni ahnsou me e liseiankihda Sises lao lel ni ahnsou me Sises ipwidi, Sises ipwidihte sohte dipe oh e unsek. (Luk 1:35; Sohn 1:29; 1 Piter 1:18, 19) Ni ahnsou me Sises pwoula nin duwen sounkolokol lelepek men, e ketikihda pein eh mour pwehn pwainda oh kasaledekala aramas akan. (Ipru 2:14, 15) Ihme Krais “ketin meirongkilahr pein ih ong Koht pwe en ketin doarehla aramas akan koaros.” (1 Timoty 2:5, 6) Kaidehn aramas koaros pahn isaneki sawas wet en komourala, ahpw Koht kin kupwurki en kapaiada irail akan me kin kamehlele met oh pwosonla.
19 Ni ah ketikihdahlahng nanleng rehn Koht kesempwalpen sapwellime meirong tomwo, Krais pwainda nein Adam seri kan. (Ipru 9:24) E miehla lih kamwohd ong Sises me iei irail sapwellime keidi 144,000 me pahn ale mour nanleng. (Episos 5:25-27; Kaudiahl 14:3, 4; 21:9) E pil wiahla “Sahm Poatopoat” ong irail akan me kin pwoson sapwellime meirong oh pahn alehdi mour soutuk nin sampah. (Aiseia 9:6, 7; 1 Sohn 2:1, 2) Koasoandi wet inenen kaselehda limpoak laud! En Pohl kasalehda eh kalahnganki koasoandi wet kin sansal sang nah kisinlikou keriau ong Kristian akan nan Korint, nin duwen artikel en mwuhr pahn kasalehda. Ni mehlel, Pohl kin nantiong en dehr mweidong mehkot en kerempwa ih sang sewese aramas akan en paiekihda sapwellimen Siohwa koasoandi kaselel en ale mour soutuk.
Iaduwen Komw Pahn Sapeng?
◻ Mehnia iren Paipel kin kasansalehda me Koht kin ketin doarehla sapwellime aramas pwung kan?
◻ Iaduwen kitail ese me Siohwa kin ketin doarehla irail akan me kin likih Ih oh kin kolokolte ahr lelepek?
◻ Soangen sawas dahieu me Koht ketin wiahda ong en ale mour soutuk?
[Kilel nan pali 24]
Depit kin likih Siohwa, “Koht me kin doarehla aramas akan.” Iaduwen Komwi?
[Kilel nan pali 26]
Siohwa kin ahnsou koaros doarehla sapwellime aramas akan, duwehte me e wia ni mwehin Lih Nanmwarki Ester