Komw Ahneki Pwoson Me Duwehte En Eipraam?
“Nein-Aramas pahn ketin diar pwoson nin sampah ni eh pahn ketido?”—LUK 18:8.
1. Dahme kahrehda eh kin apwal en kolokol en emen pwoson en kehlailte nan rahnwet?
E SOHTE mengei en kolokolte en emen pwoson en kehlail nan rahnwet. Sampah kin wahdo kapwunod laud ong Kristian kan pwehn irehdi arail medemedewe me ngehnin kan. (Luk 21:34; 1 Sohn 2:15, 16) Me tohto kin songosong en pitsang mahwen kan, kahpwal akan, soumwahu kan, de duhpek. (Luk 21:10, 11) Nan wehi tohto, pwehki tiahk en aramas me inenen laud, re kin kilangwohng emen me kin mourki dahme e kamehlele me aramas menet nohn daulihla nan ah wiewia. Pil ehu, Kristian tohto kin kamakamki arail pwoson. (Madiu 24:9) Sapwellimen Sises peidek, me e kalelepek mpen sounpar 2,000 samwalahro, kin uhdahn konehng: “Nein-Aramas pahn ketin diar pwoson nin sampah ni eh pahn ketido?”—Luk 18:8.
2. (a) Dahme kahrehda pwoson kehlail me kesempwal ong emen Kristian? (b) Ahn ihs mehn kalimeng en pwoson me kitail anahne en tehk?
2 Ahpw, ire mehlelo iei, me pwoson kehlail me kesempwal ma kitail pahn wiahda atail mour en pweida mwahu ahnsouwet oh alehdi mour soutuk nan ahnsou kohkohdo me Koht ketin inoukihda. Ni ah koasoiahda mahsan en Siohwa kan ong Apakuk, wahnpoaron Pohl ntingihdi: “‘Nei aramas pwung kan pahn momourki pwoson; a ma emen irail pahn kesehla eh pwoson, I sohte pahn kupwurperenki.’ . . . Sohte me kak kenikenla pahn kupwuren Koht ma sohte eh pwoson.” (Ipru 10:38–11:6, NW; Apakuk 2:4) Pohl padahkihong Timoty: “Tangowei uwen omw kak nan weirentang en pwoson, oh kalowehdiong uhk mour soutuk, pwe iei mour wet me Koht ketin malipeiukohng.” (1 Timoty 6:12) Eri, iaduwen emen kak ahneki pwoson me sohte kak ohla? Ni atail medemedewe peidek wet, e katapan en kilangwohng ohl emen me mour mpen sounpahr 4,000 samwalahro, me ah pwoson kin wie kesempwalte nan pelien lamalam laud siluh—Islam, Judaism, oh pelien Kristian. Ohl menet iei Eipraam. Dahme karehda ah pwoson me inenen kapwuriamwei? Kitail kak kahlemengih ih nan rahnwet?
Peikiong Kaweid en Koht
3, 4. Dahme kahrehda Tera oh ah peneinei kosoula sang nan Ur ong nan Aran?
3 Tepin koasoipen Eipraam (me mahso adaneki Eipram) sansalda mahsie nan Paipel. Nan Senesis 11:26, kitail wadek: “Tera . . . nainekihda Eipram, Nahor, oh Aran.” Tera oh ah peneinei kin kousoan nan Ur en Kaldia, ehu kahnimw kepwehpwe ni palieir en Mesopodamia. Ahpw, re sohte koukousoante wasao. “Tera eri kahrehda nah pwutak Eipram, oh Lohd nein Aran, rien Eipram ohl, oh Sarai [Sera], en Eipram eh pwoud; irail koaros ahpw mweselsang Ur, kahnimw en Papilonia, pwe re en kohlang Kenan. Irail ahpw lel kahnimw Aran, wasa re kousoanla ie.” (Senesis 11:31) Rien Eipraam ohlo Nahor pil kosoula ah peneinei nan Aran. (Senesis 24:10, 15; 28:1, 2; 29:4) Ahpw, dahme karehda, Tera mweselsang kahnimw kepwehpwe Ur ong wasa doh nan Aran?
4 Mpen sounpar 2,000 mwurin Eipraam, ohl lelepek Stipen, koasoi mwohn Sanedrin en mehn Suhs kan, oh kawehwehda mwekid tohrohr wet me en Tera peneineio wiahda. E mahsanih: “Mwohn samatail kahlap Eipraam eh kousoanla Aran, Koht en lingan ketin pwarohng nan Mesopodamia, oh mahsanihong, ‘Komw mweselweisang rehn omw peneinei oh nan omwi wehi, oh kowohng sahpw ehu me I pahn kasalehiong uhk.’ Eri, Eipraam ahpw mweselsang nan sapwen Kaldia, oh kohla Aran oh kousoanla wasao.” (Wiewia 7:2-4) Tera peikiong kupwuren Siohwa pwehki Eipraam ni ah kosoula ah peneinei nan Aran.
5. Iawasa Eipraam kohla ie mwurin ah pahpa mehla? Dahme kahrehda?
5 En Tera peneinei kousoandi nan arail kahnimw kapwo. Sounpahr kan mwuri ni ahnsou me Eipraam koasoia duwen “uhdakeio,” e kin koasoakoasoia sapwen Aran, kaidehn Ur. (Senesis 24:4) Mendahki met, Aran sohte wia wasa me Eipraam kousoanla ie poatopoat. Nin duwen me Stipen koasoia, “mwurin semeo eh melahr, Koht ahpw mahsanihong Eipraam en kodohng nan wehi wet me kumwail koukousoan ie met.” (Wiewia 7:4) Eipraam, pwehki e peikiong kaweid en Siohwa, kahrehda Lohd, oh kotehla Iupreitis ong nan sapwen Kenan.a
6. Inou dahieu Siohwa ketin mahsanihong Eipraam?
6 Dahme karehda Siohwa kamwekid Eipraam en kosoulahng Kenan? Kahrepeo kin pidada kupwuren Koht ong ohl lelepek menet. Siohwa mahsanihongehr Eipraam: “Kohkohla sang nan sapwomwen, rehn kisehmw kan, sang ni imwen semwomwen, kowe eri kohla nan sahpw ehu me I pahn kasalehiong uhk. I pahn kihong uhk kadaudok ngedehrie, me pahn wiahla wehi lapalap ehu. I pahn kapaiaiukada oh kalinganahla edomw pwe en wiahla mehn kapai. I pahn kapaiahda irail kan me kin kapaiaiukala. Ahpw I pahn keriahla irail kan me kin keriaiukala. Wehi koaros en sampah pahn peki rehi I en kapaiairailda duwehte ei kapaiaiukadahr.” (Senesis 12:1-3) Eipraam kak wiahla semen wehi lapalap ehu me pahn paiekihda sapwellimen Siohwa pereper oh me kak sapwenikihla sapwen Kenan. Met kin wia inou kaselel ehu! Ahpw Eipraam anahne wiahda wekidekla laud kan nan ah mour pwehn kak sohsohkihla sahpwo.
7. Wekidekla dah kei Eipraam anahne kaunopada en wiahda pwehn sohsohkihla inou en Siohwa?
7 Ni ahnsou me Eipraam mweselsang Ur, e lipasang kahnimw ehu me diren kepwe kan oh ele kisehn peneinei en semeo—me kin wia utupen mour pweida mwahu nan ahnsou pwuko. Ni ahnsou me e mweselsang Aran, e katohrohr pein ih sang tohnpeneinei en semeo, iangahki peneinei en rie ohlo Nahor, oh kosoulahng sahpw ehu me e sehse. Nan Kenan e sohte kin rapahki doarepe nan kelen kahnimwo. Dahme sohki? Mwurinte en Eipraam pedolong nan sahpwo, Siohwa mahsanihong: “Eri, met onopada oh kohwei wasa koaros nan sahpwet pwon, pwe I pahn ketikihong uhk koaros.” (Senesis 13:17) Eipraam me mahki sounpar 75 oh ah pwoudo, Sara, me mahki sounpar 65, idawehnla kaweid pwukat. “Pwoson me e koukousoanki nan sahpw me Koht ketin inoukihong, nin duwen aramas en liki men. E kin mihmi nan impwal likou kei.”—Ipru 11:9; Senesis 12:4.
Pwoson Me Duwehte En Eipraam Nan Rahnwet
8. Pwehki kalimeng en Eipraam oh sounkadehde teikan en mahsie, kitail anahne en kekeirada irair dahieu?
8 Eipraam oh ah peneinei kin iang kisehn “depwek kalaimwun en sounkadehde kan” [mwohn ni mwehin Kristian kan] me Ipru irelaud 11 koasoia. Pwehki pwoson en laduhn Koht pwukat en mahsie, Pohl kangoangehki Kristian kan en “kesehsang kitail mehkoaros me kerempwai kitail, oh dihp [seupwoson] me kin salihkitaildi.” (Ipru 12:1) Ehi, seupwoson kak ‘salihkitaildi.’ Ahpw ni mwehin Pohl oh nan atail ahnsou, Kristian mehlel kan kin kak kekeirada pwoson kehlail me duwehte en Eipraam pwoson oh pwoson en irail kan mwohn ni mwehin Kristian kan. Ni ah koasoia duwen pein ih oh ienge Kristian kan, Pohl mahsanih: “Eri, kaidehk kitail kisehn irail kan me kin kesehla ar pwoson, re ahpw kin lekdekla. Pwe mie atail pwoson oh kitail aleiehr komourpatail.”—Ipru 10:39.
9, 10. Mehn kadehde dahieu me kasalehda me aramas tohto nan rahnwet ahneki pwoson me duwehte en Eipraam?
9 Mehlel, sampah wekilahr sangete ni mwehin Eipraam. Mendahki met, kitail kin papah “Koht en Eipraam” ohte, oh e sohte kin ketin wekila. (Wiewia 3:13; Malakai 3:6) Siohwa warohng ale kaudok rahnwet duwehte ah kin ale kaudok mahso ni mwehin Eipraam. (Kaudiahl 4:11) Me tohto kin inoukihda pein irail ni unsek ong Siohwa oh, duwehte Eipraam, kin wiahda soahngen wekidekla kan me konehng nan arail mour pwe ren kak wia kupwuren Koht. Nan pahr samwalahro, aramas 316,092 kasalehong wehipokon arail inou ni arail papidaisla nan pihl ni “mwaren Sahm oh Sapwellime oh ngehn sarawi.”—Madiu 28:19.
10 Pali moron en Kristian kapw pwukat sohte anahne seiloakla nan ehu sahpw tohrohr me doh pwehn kapwaiada arail inou. Ahpw, tohtohn irail kin seiloak ni pali ngehn. Karasepe ehu, nan Mauritius, Elsie mahso kin wia lihen wunahni men. Aramas kin masak ih. Emen special pioneer koasoanehdi en onop Paipel rehn nein Elsie serepeino, oh met ritingada ahl ong Elsie ‘en kohsang nan rotorot ong nan marain.’ (Wiewia 26:18) Pwehki nah serepeino perenki onop, Elsie pwungkihda en onopki pwuhko Nei Pwuhk En Poadoapoad Kan En Paipel. E kin onop pahn pak siluh nan wihk ehu pwehki e anahne kangoang kaukaule. Ah wiewiahn wunahni sohte kin wadohng ih nsenamwahu, oh mie pein ah kahpwal tohto. Ahpw, kedekedeo, e kakehr kanekehla ah seiloak en pali ngehn sang wunahni ong kaudok mehlel. Ni ahnsou me aramas kan kin kohdo pwehn rapahki ah sawas, e kin kawehwe me Siohwa kelehpw me kak pere irail sang me suwedo. Elsie kin ahnsouwet wia emen Sounkadehde papidais, oh aramas 14 sang nanpwungen ah peneinei oh irail kan me e kin ese pwungkihlahr padahk mehlel.
11. Wekidekala dah kei me irail ko me inoukihda pein irail ong Siohwa men wiahda?
11 Pali moron en irail ko me nan pahr samwalahro inoukihda pein irail en papah Siohwa sohte anahne en wiahda soahngen wekidekla laud pwukat. Ahpw koaros wekisang nan arail irair en mehla ni pali ngehn oh wekiong arail mourda ni pali ngehn. (Episos 2:1) Mendahki irail kin mihmi nan sampah, re solahr wia kisehn sampah. (Sohn 17:15, 16) Me rasehng Kristian keidi kan, me “uhdahn tohn nanleng mehlel,” re wia mwomwen “mehn liki kei oh mehn keiru kei.” (Pilipai 3:20; 1 Piter 2:11) Re wekidala arail mour kan en pahrekiong kosonned en Koht, ni arail kin mwekidiki mwohn mehkoaros arail limpoak ong Koht oh limpoak ong mehn mperail kan. (Madiu 22:37-39) Re sohte kin rapahki mehn akadei kan me roporop, oh men kepwehpwehla de pehm me re anahne alehdi kaitar kan koaros ong pein irail nan sampah wet. Ahpw, re kin kilikilangwohng ‘lahng kapw oh sampah kapw, wasa me pwungen kalahngan en Koht pahn poadada ie poatopoat, duwen eh ketin inoukidahr.’—2 Piter 3:13; 2 Korint 4:18.
12. Wiewia dahieu me ripohtpe sansalda nan pahr samwalahro me kadehdehda me Sises erein ah ketier diaradahr “pwoson nin sampah”?
12 Ni ahnsou me Eipraam kosoula nan Kenan, ih oh ah peneinei kin kelekelehpw wasao oh Siohwa kelehpw me kin utung oh pere irail. Ahpw, irail Kristian papidais kapw 316,092 ko sohte kin kelehpw. Mehlel, Siohwa kin ketin utung oh pere irail ni ah kin ketin doadoahngki sapwellime ngehn sarawi, duwehte me e kin ketin wiahiong Eipraam. (Lepin Padahk 18:10) Ahpw, patohngete met, e kin utung irail sang ni sawas en “wehi” ehu nan sampah pwon me towe kan tohtohsang ekei wehi kan nan rahnwet. (Aiseia 66:8) Nan pahr samwalahro, uwen tohtohn tohn wehi wet me mihmi ni uwen aramas 5,888,650 kin kihda mehn kadehdepen arail pwoson ni arail kin koasoiaiong mehn mperail kan duwen inou kan en Siohwa. (Mark 13:10) Re kin doadoahngkihla awa 1,186,666,708 nan doadoahk wet, ni arail kin raparapahki irail kan me perenki rong. Pwehki met, mie onop en Paipel 4,302,852 me kin wiawihda rehn mehteikan me men kekeirada arail pwoson. Nin duwen pil ehu mehn kadehdehpen arail idipek, aramas 698,781 nan “wehi” wet kin iang kisehn doadoahk en pioneer, ma kaidehn kaukaule de ong erein sounpwong ehu de tohtohsang. (Oaretikpen doadoahk en Sounkadehde kan en Siohwa nan pahr samwalahro kin diarekda ni pali 12 lel 15.) Rekord kapwuriamwei wet kin wia pasapeng momour ehu ong sapwellimen Sises peidek, “Nein-Aramas pahn ketin diar pwoson nin sampah ni eh pahn ketido?”
Lelepek Mendahki Kasongosong Kan
13, 14. Kasalehda ekei kahpwal akan me Eipraam oh ah peneinei lelohng nan Kenan.
13 Soahng kan kin kalapw apwal ong Eipraam oh ah peneinei nan Kenan. Nan ehu ahnsou, mie lehk lapalap ehu me karehong ih en mweselsang nan Kenan oh kosoulahng nan Isip. Me pil laud sang met, kaun kan koaros en Isip oh Kerar (limwahn Kasa) kin songosong en adihasang en Eipraam pwoudo, Sara, pwe ren pwoudkihda. (Senesis 12:10-20; 20:1-18) Pil mie uhpene kan nanpwungen silepen mahn akan en Eipraam oh silepen mahn kan en Lohd, oh met kin kahrehda peneinei riau pwukat en tohrohrpeseng. Ni soh roporop, Eipraam mweidohng Lohd en pilada mahs mehnia sahpw me e mwahuki, oh Lohd pilada en kousoanla nan Wehin Sordan, me likamwete mwetuwel en Ihden pwehki ah pwelmwahu oh kaselel.—Senesis 13:5-13.
14 Eri, Lohd iang pidada mahwen ehu me wiawi nanpwungen nanmwarkien Elam oh ienge nanmwarki kan oh nanmwarkien kahnimw limau nan Wahun Siddim. Nanmwarki en mehn liki pahmen ko eri kalowehdi nanmwarki limmen en wasao oh wahsang kepwe tohto, iangahki Lohd oh mehkoaros me e ahneki. Ni ahnsou me Eipraam rongada dahme wiawi, ni soh masak, e pwakih nanmwarki en liki ko oh kapwurehdo Lohd oh ah peneinei, oh iangahki en nanmwarkien wasao arail kepwe kan. (Senesis 14:1-16) Ahpw, wiewia wet kaidehn ih me keieu suwed me wiawihong Lohd nan Kenan. Pwehki kahrepe kei e kousoanla nan Sodom, mendahki e ese duwen mour suwed en tohn kahnimw wet.b (2 Piter 2:6-8) Ni ahnsou me tohnleng riemen panawihkin ih me kahnimwo pahn kamomwmwala, Lohd iangahki ah pwoud oh nah serepein kan tangasang nan kahnimwo. Ahpw, en Lohd eh pwoudo soikala kaweid en tohnleng kan oh, imwilahn met, e wiahla uhren soahl ehu. Lohd uhd kin kousoanla nan pwoar ehu nan Soar iangahki nah serepein riemeno. (Senesis 19:1-30) Mehpwukat ele kin kansensuwedihla Eipraam, keieu pwehki Lohd iang kosoudo nan Kenan nin duwen kisehn en Eipraam peneinei.
15. Mendahki kahpwal akan me Eipraam kin lelohng nindoken ah kin koukousoan nan impwal kan nan sahpw en liki ehu, lamalam sapwung dah kei me ni sansal e kin liksang?
15 Mie pak me Eipraam kin medemedewe me ih oh Lohd anahne en mihmihte nan kahnimw meleilei en Ur rehn kisehn peneinei en ah pahpa de nan Aran rehn rie ohlo Nahor? Mie pak e kin medewehda me e mentehno kousoan nan kahnimw ehu me mie kehlepe ahpw kaidehn kousoan nan impwal kan? Ele, e kin peidengki erpit en meirong kan me e kin wiahda ni ah kin seiseiloakseli nan sapwen liki? Ni ah koasoia duwen Eipraam oh ah peneinei, wahnpoaron Pohl mahsanih: “Re sohte kin tamataman sahpw me re mweselsang ie; pwe ma re wia met, e uhdahn pahn mie ahnsoun sapahllahng wasao.” (Ipru 11:15) Ahpw, re sohte sapahlla. Mendahkihla kahpwal akan, re mihmihte wasao me Siohwa kupwurki ren mie.
Kanengamah Rahnwet
16, 17. (a) Apwal dah kei Kristian tohto kin lelohng nan rahnwet? (b) Lamalam pwung dah kei Kristian kan kin ahneki? Dahme kahrehda?
16 Soahngen kanengamahohte kin pil sansal rehn Kristian kan nan rahnwet. Mendahki papah Koht kin wia utupen peren ong irail, mour sohte kin mengei ong Kristian mehlel kan nan imwin rahnpwukat. Mendahki re kin koukousoan nan paradais en pali ngehn ehu, re kin lelohng kahpwal en mwohni duwehte mehn mperail kan. (Aiseia 11:6-9) Me tohto kin apwalkihla mahwen en wehi kan me re sohte kin iang pidada, oh ekei kin uhd semwehmwehla ahpw kaidehn pwehki arail sapwung. Oh likin met, re kin kanengamahiong kahpwal en arail wia kisin pwihn ehu me sekeniken pahn mehteikan. Nan sahpw tohto re kin kalohkiseli rongamwahuwo mendahki ma me tohto sohte kin nsenohkin irail. Rehn mehteikan re kin mihla pahn uhwong en irail ko me ‘kin kamanahla kosonned sapahrek’ oh “pangalahng mehla aramas akan me sohte diparail.” (Melkahka 94:20, 21) Pil nan sahpw akan me Kristian akan sohte kin mihla pahn uhwong oh wasa me ekei kin kapingahkin irail arail tiahk mwahu, re kin pehm me re weksang iengerail tohnsukuhl kan oh tohndoadoahk kan—duwehte Eipraam, me kin kousoan nan impwal nindoken pali moron en aramas kan limwa kin kousoan nan kahnimw kan. Ehi, e sohte mengei en kousoan nan sampah ahpw “sohte iang kisehn” sampah.—Sohn 17:14.
17 Eri, kitail kin koluhkihla atail wiahda inou ong Koht? Kitail kin mentehno iangete wia kisehn sampah, duwehte aramas koaros? Kitail kin kaulimkihla tohnmetei kan me kitail wiahda nan atail papah Siohwa? Uhdahn soh! Kitail endehr soupeila mwuritail, ahpw, kitail en pohnese me soahng koaros me kitail tohnmeteikihla sohte kin kesempwal ni ah kin kapahrekiong kapai kan me kitail kin paiekihda ahnsouwet oh kapai ko me kitail pahn paiekihda nan ahnsou kohkohdo. (Luk 9:62; Pilipai 3:8) Pwe, aramas kan nan sampah kin uhdahn peren? Ni mehlel, tohtohn irail kin raparapahki pasapeng kan me kitail eseiehr. Re kin lelohng apwal pwehki arail sohte kin idawehn kaweid kan me kitail kin idawehn sang rehn Koht me pwildo sang nan Paipel. (Melkahka 119:105) Oh me tohto rehrail kin inengieng soahngen ehupene en Kristian oh werek kaperen kan me kitail kin paiekihda rehn iengetail me pwoson kan.—Melkahka 133:1; Kolose 3:14.
18. Dahme kin imwikihla ma Kristian kan kin kasalehda eimah me duwehte en Eipraam?
18 Mehlel, ekei pak kitail anahne en eimah duwehte Eipraam ni ahnsou me e pwakihala irail kan me koledi Lohd. Ahpw ni ahnsou me kitail kin kasalehda eimah, Siohwa kin kapaiada imwilahn met. Karasepe ehu, kailok tengalahr ni Paliepeng en Ireland pwehki wiewia mwersuwed en soangsoangen pwihn kan, oh emen anahne en eimah pwehn sohpoupali. Eri, Kristian lelepek kan kin idawehnla mahsan en Siohwa ong Sosua: “Tamatamante me I ndahnguhkehr ke en kehlail oh kommwad! Ke dehr masak de lamalam tikitik, pwehki Ngehi, Kauno [Siohwa], omw Koht, me kin ieiang uhk wasa koaros me ke pahn kin kohla ie.” (Sosua 1:9; Melkahka 27:14) Erein sounpar kan me dower powe arail lamalam en soh masak kin kahrehong mehteikan en waunekin irail, oh rahnwet re kakehr kalohk ni saledek nan kousapw kan koaros en sahpwo.
19. Iawasa me Kristian kan kin perenki mihmi, oh imwila dahieu me re kin koapworopworki ni ahnsou me re kin idawehnla kaweid en Siohwa?
19 Kitail endehpa peikasalki me mendahki soahngen irair dah kan me kitail lelohng, ma kitail pahn idawehnla kaweid en Siohwa, imwilahn met pahn wahdohng ih lingan oh wahdohng kitail kapai poatopoat. Mendahki kahpwal akan oh tohnmetei kan, sohte wasakis me kitail men mihmi me mwahusang mihmi nan doadoahk en Siohwa, ni atail pahn ale kapai en werekiong riatail Kristian kan oh kilikilangwohng koapworopwor en kapai soutuk me Koht ketin inoukihda.
[Nting tikitik kan me mi pah]
a Ele mwein, Eipraam pwekada nein rie ohlo pwutak Lohd ni ahnsou me semen Lohd, rien Eipraam, mehla.—Senesis 11:27, 28; 12:5.
b Ekei kin lemeleme me Lohd kousoanla nan kahnimw wet pwehn kak ale perepe laud mwurin nanmwarki pahmeno koledi ih nan mahweno.
Komw Tamataman?
◻ Dahme kahrehda pwoson kehlail me kesempwal?
◻ Iaduwen Eipraam kasalehda me e ahneki pwoson kehlail?
◻ Iaduwen inouda kin iangete wekidekla kan nan en emen mour?
◻ Dahme kahrehda kitail kin perenki papah Koht mendahki kahpwal akan me kitail kak lelohng?
[Kilel kan nan pali 7]
Eipraam men wiahda wekidekala laud kan nan ah mour pwe en kak sohsohkihla inouwo
[Kilel kan nan pali 9]
Mehn kadehdeo kasalehda me Sises diaradahr “pwoson nin sampah” erein ah ketier