Apram—Kompoakpen Koht

EHU wasa me aramas kan kohieila oh kousoan mwehrin nohliko adaneki Ur. Wasao wiahla kahnihmw kesempwal ehu me ihmw kasehlel tohto mi ie. Ahpw aramas kan me mi wasao kaudokiong koht likamw akan. Duwehte me irail wia nan Papel. Aramas kan me mi Ur oh Papel sohte duwehte Noah oh nah ohl Sem, me kin papahong Siohwa.

Eri, sounpahr 350 mwehrin nohliko, ohl lelepak Noah mehlahr. Sounpahrte riau mwuhri ohl me ke kilang nan kilel wet ipwidi. Ohl menet emen aramas kesempwal rehn Koht. Ede iei Apram. E kin iang ah peneinei kousoan nan kahnihmw en Ur.

Ehu rahn Siohwa padahkiong Apram: ‘Kohwei sang Ur iangahki ahmw peneinei, oh kohla nan ehu wehi me I pahn kasaleong uhk.’ Eri iaduen, Apram peikiong Koht oh pwilikihdi kainsenamwahu koaros nan Ur oh kohieisang wasao? Ei, e wiahda met. Pwehki Apram peikiong Koht, mwuhri aramas koaros ese me Apram wiahla kompoakpen Koht.

Ekei ahn Apram peneinei iang ih mweselwei sang Ur. Ah pahpa Derah iang. Pil emen ohl nain rie, Lod. Oh, pil iangahki ahn Apram pwoud Sarah. Ansou dower powe re leldo wasakis me adaneki Aran, iei wasa me Derah mehla. Wasao doh sang Ur.

Mwehrin ansoukis Apram oh tohn ah peneineio koaros pil mweselwei sang Aran oh kohdohng nan sahpw ehu me adaneki Kenaan. Wasao Siohwa mahsanih: ‘Met iei sahpw me I pahn kihong uhk oh noumw seri kan.’ Apram eri mi nan Kenaan oh koukousoan nan ihmw likou.

Koht tapiadahr sewese Apram, ih eri naineki ehu pwihn en sihpw laud iangahki mahn tohto oh ladu epwuiki kei. Ahpw ih oh Sarah sohte neira seri.

Ni ansou me Apram mahkiehr sounpahr 99, Siohwa mahsanih: ‘I inoukihdiehr me ke pahn wiahla pahpa en wehi tohto.’ Ahpw iaduen met kak wiawi, pwe Apram oh Sarah mahlahr oh sohlahr kak wiahda seri?