Ia Duwen Siohwa Eh Kin Ketin Sapengala Atail Kapakap kan

1-2. Dahme kitail kakete medewe ni ahnsou me kitail kin kapakap?

MIE pak me ke medewe ma Siohwa kin ketin sapengala omw kapakap kan? Ma ei, kaidehn kowe kelehpw. Mie riatail Kristian tohto teikan me pil nda me irail kin medewe duwen met, ahpw mehlel ni arail kin lelohng kahpwal kan. Ma kitail kin lokolok, kitail pil kin apwalki en ese ia duwen Siohwa eh kin ketin sapengala atail kapakap kan.

² Kitail pahn koasoiapene dahme kahrehda kitail kak kamehlele me Siohwa kin ketin sapengala en sapwellime tohnkaudok kan kapakap kan. (1 Sohn 5:15) Kitail pil pahn koasoiapene peidek pwukat: Dahme kahrehda ekei pak e kin mwomwen me Siohwa sohte kin ketin sapengala atail kapakap kan? Ni ahl dah me Siohwa kin ketin sapengala atail kapakap kan rahnwet?

SIOHWA ELE SOHTE KIN SAPENG NI AHL EHU ME KITAIL KASIK

3. Dahme kahrehda Siohwa ketin kupwurki kitail en kapakapohng ih?

³ Paipel kamehlelehiong kitail me Siohwa kin uhdahn ketin poakohng oh kesempwalkin kitail. (Ak. 2:7; 1 Sohn 4:10) Ihme kahrehda e ketin luke kitail en kapakapohng ih oh peki sawas. (1 Pit. 5:6, 7) E kin ketin kupwurki sewese kitail en mihmi karanih ih oh dadaur pahn atail kahpwal kan.

4. Ia duwen atail ese me Siohwa kin ketin sapengala ahn sapwellime tohnkaudok kan kapakap? (Pil kilang kilel.)

⁴ Kitail kin kalapw wadek nan Paipel me Siohwa kin ketin sapengala en sapwellime tohnkaudok kan kapakap. Ke kak medewehla ehu karasepen met? Ia duwen Nanmwarki Depit? Erein eh mour mie eh imwintihti keper tohto, oh e kin kalapw kapakap oh peki sapwellimen Siohwa sawas. Ehu ahnsowo e peki: “Maing KAUN, komw ketin karonge ei kapakap! Komw ketin karonge ei pekipek ngidingid ni sapwellimomwi pwuhng; komw ketin sapeng ie ni loalopwoat!” (Mel. 143:1) Siohwa ketin sapengala ahn Depit kapakap en peksawaso. (1 Sam. 19:10, 18-20; 2 Sam. 5:17-25) Eri, Depit kak uhdahn nda me Siohwa “kin ketiket limwahn irail kan me kin likweriong.” Kitail pil kak kamehlele met.—Mel. 145:18.

5. Siohwa kin ahnsou koaros ketin sapengala en sapwellime tohnkaudok kan kapakap ni ahl me irail kasik? Menlau kihda ehu karasaras. (Pil kilang kilel.)

⁵ Siohwa ele sohte kin sapengala atail kapakap ni ahl me kitail kasik. Ih met me wiawihong wahnpoaron Pohl. E peki rehn Koht en ketikihsang “kisin tek” kis reh. Pak siluh Pohl kapakapki duwen kahpwal wet. Ia duwe, Siohwa ketin sapengala kapakap ko? Ei, ahpw kaidehn ni ahl me Pohl kasik. Siohwa sohte ketikihsang kahpwalo, ahpw e ketikihong ih kehl me e anahne pwehn pousehlahte papah ih ni lelepek.—2 Kor. 12:7-10.

6. Dahme kahrehda ekei pak e kin mwomwen me Siohwa sohte kin ketin sapengala atail kapakap?

⁶ Kitail pil kin ekei pak alehdi pasapeng me weksang dahme kitail kasik. Kitail kak kamehlele me Siohwa uhdahn ketin mwahngih ahl me keieu mwahu en sewese kitail. E kak pil ketin “wiahda mehkan me uhdahn siksang mehkoaros me kitail kin peki de medewehda.” (Ep. 3:20) Pwehki met, sapwellime pasapeng ong atail kapakap kan kak wiawi ni ahnsou de ni ahl ehu me kitail sohte kasik.

7. Dahme kahrehda kitail ele anahne wekidala dahme kitail kin kapakapki? Menlau kihda ehu karasaras.

⁷ Ele kitail anahne wekidala dahme kitail en kapakapki ni atail esehla mwahu kupwuren Siohwa. Medewehla mehn kahlemeng en Martin Poetzinger. Mwurinte e pwopwoudida, Brother Poetzinger selidi nan imweteng en Nazi. Nin tapio, e peki rehn Siohwa en ketin kasaledekihala sang nan imwetengo pwehn kak apwalih eh pwoudo oh pousehlahte nan eh doadoahk en kalohk. Ahpw mwurin wihk riau, e mwomwen me Siohwa sohte pahn ketin kasaledekihala ih. Ih eri tepida kapakap: “Siohwa, menlau kasalehiong ie dahme komw kupwurki ien wia.” Ih eri tepida medewe dahme brother teikan nan imwetengo kin dadaur pah. Me tohto rehrail pil kin uhdahn pwunodki arail pwoud kan oh neirail seri kan. Brother Poetzinger eri kapakap: “Siohwa, kalahnganki ei pwukoa kapw wet. Sewese ie en kakehlaka oh kangoange riei Kristian kan.” Erein sounpar duwau me e mihmihki nan imwetengo, ih met me e kin wia!

8. Soahng kesempwal dah kan me kitail anahne tamataman ni atail kin kapakap?

⁸ Kitail anahne tamataman me mie kahrepe ehu me Siohwa sapwellimanki, oh e pahn ketin kapwaiada met ni ahnsou me e ketin koasoanehdi. Kupwureo iei me iangahki en ketikihsang douluhl kahpwal kan koaros me kin kahrehda lokolok laud rahnwet, kahpwal kan me duwehte rerrer en sahpw, melimel ape, soumwahu, oh mehla. Siohwa pahn ketin kapwaiada kupwure sang ni eh pahn ketin doadoahngki sapwellime Wehi. (Dan. 2:44; Kaud. 21:3, 4) Ahpw lao lel ahnsowo, Siohwa ketin mweidohng Sehdan en kaunda sampah.b (Sohn 12:31; Kaud. 12:9) Ma Siohwa ketin kamwahwihala ahn aramas kahpwal koaros ahnsou wet, e pahn mwomwen me ahn Sehdan kaunda sampah uhdahn mwahu. Eri erein atail awiawih Siohwa en ketin kapwaiada ekei sapwellime inou kan, met sohte wehwehki me e sohte kin ketin sewese kitail. Kitail pahn koasoiapene soahng kei me Siohwa kin ketin wia pwehn sewese kitail.

AHL AKAN ME SIOHWA KIN KETIN SAPENGALA KAPAKAP KAN RAHNWET

9. Ia duwen Siohwa eh kak ketin sewese kitail ni atail anahne wiahda pilipil kan? Menlau kihda ehu karasaras.

⁹ E kin ketikihong kitail erpit. Siohwa ketin inoukihda en ketikihong kitail erpit me kitail anahne pwehn wiahda pilipil mwahu kan. Kitail uhdahn anahne erpit sang rehn Siohwa ni atail kin wiahda pilipil kan me kak wekidala atail mour. Karasepe, ni atail kin pilada ma kitail pahn pwopwoudida de soh. (Seims 1:5) Medewehla dahme wiawihong sister kiripw men me adaneki Maria.c E kin perenki eh doadoahk en pioneer ni ahnsou me e tuhwong brother men. E koasoia: “Ni at karanihala emenemen, at pepehm ong emenemen pil laudla. I ese me I anahne wiahda pilipil. I kin kapakapki laud duwen met. I anahne sapwellimen Siohwa kaweid, ahpw I pil ese me Siohwa sohte pahn ketin wiahda ei pilipil.” E pehm me Siohwa ketin sapengala eh kapakapki erpit. Ia duwen? E wia roporop oh diarada oaralap kan me sewese ih en sapengala eh peidek kan. E pil rong kaweid mwahu kan sang eh nohnou me kin lelepek. Kaweido sewese Maria en kasawih eh pepehm kan. Imwilahn met, e kakehr wiahda pilipil mwahu.

10. Nin duwen me Pilipai 4:13 mahsanih, dahme Siohwa pahn ketin wia pwehn sewese sapwellime tohnkaudok kan? Menlau kihda ehu karasaras. (Pil kilang kilel.)

¹⁰ E ketikihong kitail kehl pwehn dadaur. Duwehte me e ketin wiahiong wahnpoaron Pohl, Siohwa pil pahn ketikihong kitail kehl me kitail anahne pwehn dadaur pahn atail kahpwal kan. (Wadek Pilipai 4:13.) Medewehla ia duwen Siohwa eh ketin sewese brother men me adaneki Benjamin pwehn dadaur pahn irair apwal kan. Pali laud en eh pwulopwulo, Benjamin oh eh peneineio kin kousoan Aperika nan ehu wasahn kousoan ong irail kan me anahne tangasang sapwarail pwehki mahwen de kahpwal laud. Benjamin koasoia: “I kin kalapw kapakapohng Siohwa, oh peki en ketikihong ie kehl pwehn wia dahme kin kaperenda ih. Siohwa ketin sapengala ei kapakap kan sang ni eh ketikihong ie meleilei, eimah en pousehlahte kalohk, oh sawasepen Paipel kan me kin sewesei ie en mihmi karanih ih.” E pil koasoia: “En wadek koasoiepen riatail Kristian kan oh sukuhlki ia duwen Siohwa eh kin ketin sewese irail en dadaur kin kakehlakahda ei koasoanehdi teng en kolokolete ei lelepek.”

11-12. Ia duwen Siohwa eh kak ketin pilada en doadoahngki riatail Kristian kan pwehn kak sapengala atail kapakap kan? (Pil kilang kilel.)

¹¹ E kin ketin doadoahngki riatail Kristian kan. Pwohngo mwohnte eh ketin tounmeteikihla eh mour, Sises ketin kapakap ni ngidingid. E patohwan peki Siohwa en dehr ketin mweidohng meteikan en medewe me ih sounlahlahwe men oh kadeikada. Siohwa sohte ketin wia met, ahpw e ketin sewese Sises sang ni eh ketin poaronehdo emen rien Sises tohnleng ko pwehn kakehlakahda. (Luk 22:42, 43) Siohwa ele pil pahn ketin sewese kitail sang ni eh pahn ketin doadoahngki emen riatail Kristian kan en call de mwemweitdo rehtail pwehn kangoange kitail. Kitail koaros kak isaneki ahnsou mwahu koaros en “lokaia kadek” ong riatail Kristian kan.—Lep. Pad. 12:25.

¹² Medewehla dahme wiawihong sister men me adaneki Miriam. Wihk kei mwurin eh pwoudo mehla, Miriam kelekelehpw ni imweo, uhdahn nsensuwed. E sohte kak uhdihsang sengiseng oh e anahne koasoiong emen. E koasoia: “Sohte ei kehl en call emen, eri I kapakapohng Siohwa. Nindoken ei wie sengiseng oh kapakap, nei delepwohno rihng. Elder men me wia emen kompoakepahi mwahu iei me calldo.” Eldero oh eh pwoudo kansenamwahwihala Miriam. Miriam uhdahn kamehlele me Siohwa ketin kamwakid brothero en call ih.

13. Menlau kihda ehu karasepen Siohwa eh kak ketin doadoahngki irail kan me sohte kin kaudokiong ih pwehn sapengala atail kapakap kan.

¹³ E kak ketin doadoahngki irail kan me sohte kin kaudokiong ih. (Lep. Pad. 21:1) Ekei pak, Siohwa kin ketin sapengala kapakap en sapwellime aramas akan sang ni eh ketin doadoahngki irail kan me sohte kin kaudokiong ih pwehn sewese irail. Karasepe, e ketin kamwakid Nanmwarki Ardaserksihs en kapwaiada en Nehmaia pekipeko en pwurala Serusalem pwehn kak sewese onohnsapahldahn kahnimwo. (Neh. 2:3-6) Rahnwet, Siohwa pil kak ketin kamwakid irail kan me sohte kin kaudokiong ih pwehn sewese kitail ni ahnsou me kitail anahne.

14. Ia duwen koasoiepen Soo Hing eh kangoangeiuk? (Pil kilang kilel.)

¹⁴ Sister men me adaneki Soo Hing pehm me Siohwa ketin sewese ih sang ni e ketin doadoahngki eh toahkteo. Nah pwutako ahneki soangen kahpwal en soumwahu en madamadau. Ni nah pwutako eh lelohng aksident laud ehu, Soo Hing oh eh pwoudo uhdihsang ara doadoahko pwehn apwalih ih. Pwehki met, mie arail kahpwal en mwohni. Soo Hing nda me e pehm me e solahr kak dadaur pahn kahpwal kan. E wehkohng Siohwa dahme mi nan eh mohngiong oh peki sawas. Eh toahkteo eri koasoanehdi en diarada ahl ehu me pahn sewese ih oh eh peneineio. Imwilahn met, irail alehdi sawas sang arail koperment oh wasahn kousoan ehu me irail kak pwain. Mwurin mwo, Soo Hing koasoia: “Se kilang duwen Siohwa eh ketin sewese kiht. Uhdahn ih ‘Sounkaronge kapakap’” men.—Mel. 65:2, NW.

KITAIL ANAHNE PWOSON PWEHN RAPAHKI OH PWUNGKI PASAPENG KAN SANG SIOHWA

15. Dahme sewese sister men en esehda me eh kapakap kan pasapengla?

¹⁵ Atail kapakap sohte kin kalapw pasapengla ni ahl kapwuriamwei kan. Ahpw pasapeng kan me kitail alehdi ih me kitail uhdahn anahne pwehn loalopwoatohngete Samatailo nanleng. Eri kitail en kin tetehk ia duwen Siohwa eh ketin sapengala atail kapakap kan. Sister men me adaneki Yoko pehm me Siohwa sohte kin ketin sapengala eh kapakap kan. Ih eri tepida ntingihedi dahme e kin peki rehn Siohwa. Mwurin ahnsou werei, e kilang nan nah pwuhko oh esehda me Siohwa ketin sapengala pali laud en eh kapakap kan, pil eh kapakap kan me e manokehla. Kitail anahne kalapw uhdi oh medemedewe duwen Siohwa eh kin ketin sapengala atail kapakap kan.—Mel. 66:19, 20.

16. Ia duwen atail kak kasalehda atail pwoson dahme kitail kapakapki? (Ipru 11:6)

¹⁶ Kitail kin kasalehda pwoson kaidehn sang atail kin kapakapohngete Siohwa, ahpw pil sang atail kin pwungki sapwellime pasapeng, sohte lipilipil ni ahl dah. (Wadek Ipru 11:6.) Medewehla dahme wiawihong Mike oh eh pwoudo Chrissy. Ira akadeiong en papah nan Pedel. Mike koasoia: “Se audehda nait doaropwe pak tohto oh pwurupwurehng kapakapkihong Siohwa duwen mehn akadei wet, ahpw se sohte alehdi luhk.” Mike oh Chrissy kamehlelehte me Siohwa ketin mwahngih ahl me keieu mwahu en ketin doadoahngki ira nan sapwellime doadoahk. Ira pousehlahte wia uwen me ira kak ni ara wia pioneer kei nan wasa kan me anahn laud mie ong sounkalohk, oh pil iang kauwada wasahn kaudok kan en sapwellimen Siohwa pwihn. Met ira kin wia doadoahk en sounapwalih me kin seiloak. Mike koasoia: “Siohwa sohte kin ketin ahnsou koaros sapengala atail kapakap ni ahl me kitail kasik, ahpw e kin ketin sapengala ni ahl me mwahusang dahme kitail kak medewehda.”

17-18. Nin duwen me Melkahka 86:6, 7 mahsanih, dahme kitail kak kamehlele?

¹⁷ Wadek Melkahka 86:6, 7. Sounmelkahkao Depit uhdahn kamehlele me Siohwa kin ketin karonge oh sapengala eh kapakap kan. Ke pil kak kamehlele soahngohte. Mehn kahlemeng kan me kitail koasoiapene nan iren onop wet kamehlelehiong kitail me Siohwa kak ketikihong kitail erpit oh kehl me kitail anahne pwehn dadaur. E kak ketin doadoahngki riatail Kristian kan de pil irail kan me sohte kin kaudokiong ih met en sewese kitail.

¹⁸ Mendahki Siohwa sohte kin ketin ahnsou koaros sapengala atail kapakap kan ni ahl me kitail kasik, kitail ese me e pahn ketin sapengala. E pahn ketikihda dahme kitail anahne oh pil ni ahnsou me kitail anahne. Eri, kapakap oh kamehlele me Siohwa pahn ketin karongeiuk. Likih me Siohwa pahn ketin apwalihiuk ahnsou wet oh me e pahn ketin ‘kaitarala anahn akan koaros’ nan sampah kapwo me kohkohdo.—Mel. 145:16.