Siohwa Pahn Ketin Sapeng Ei Kapakap kan?

1-2. Dahme kahrehda kitail kakete medewe me Siohwa sohte kin ketin sapengala atail kapakap kan?

“RAPAHKI omw peren rehn KAUN-O; oh e ahpw pahn ketikihong uhk dahme ke keieu inengieng.” (Mel. 37:4) Ia uwen kaselel en inou wet! Ahpw ia duwe, kitail en kasik me Siohwa pahn ketikihong kitail soahng koaros me kitail peki ni ahnsowohte? Dahme kahrehda kitail idengki peideko? Medewehla karasaras pwukat. Sister kiripw men kapakapki en kak iang Sukuhl ong Sounkalohki Wehio kan. Ahpw sounpar kei mwuhr, e sohte alehdi luhk en iang sukuhlo. Brother pwulopwul men peki rehn Siohwa en ketin kamwahwihala eh soumwahu laudo pwe en kak kalaudehla eh papah nan mwomwohdiso. Ahpw eh soumwahwo sohte mwahula. Pahpa nohno kan kapakapki me neirail serio en mihmihte nan padahk mehlel. Ahpw neirail serio pilada en uhdihsang papah Siohwa.

² Ele ke pil peki mehkot rehn Siohwa, ahpw ke saikinte alehdi. Pwehki met, mwein ke medewe me Siohwa kin ketin sapengala ahn meteikan kapakap ahpw kaidehn ahmw. De mwein ke medewe me ke wiadahr mehkot sapwung. Sister me adaneki Janiceb ahneki pepehm wet. Ih oh eh pwoudo kapakapohng Siohwa pwehki ira uhdahn men papah nan Pedel. E koasoia: “I uhdahn kamehlele me ahnsou keren se pahn kohla Pedel.” Ahpw sounpar kei mwuri, pwopwoudo sohte alehdi luhk. Janice koasoia: “I nsensuwedla oh sohte wehwehki. I medewe dahme I wiadahr me kansensuwedihala Siohwa. I kin uhdahn kapakapki laud en kohla Pedel. Dahme kahrehda e sohte ketin sapeng ei kapakap?”

3. Dahme kitail pahn koasoiapene nan iren onop wet?

³ Ekei pak, ele kitail kin medewe ma Siohwa kin ketin karonge atail kapakap kan. Ekei ohl lelepek kan mahso pil kin peidengki met. (Sohp 30:20; Mel. 22:2; Apak. 1:2) Dahme kak kamehlelehiong uhk me Siohwa pahn ketin sapeng omw kapakap kan. (Mel. 65:2) Pwehn sewese sapengala met, keieu kitail anahne sapengala peidek pwukat: (1) Dahme kitail kak kasik sang rehn Siohwa? (2) Dahme Siohwa ketin kasik sang kitail? (3) Dahme kahrehda kitail anahne wekidala ekei atail pekipek kan?

DAHME KITAIL KAK KASIK SANG REHN SIOHWA?

4. Nin duwen me Seremaia 29:12 mahsanih, dahme Siohwa ketin inoukihda en wia?

⁴ Siohwa ketin inoukihda en karonge atail kapakap kan. (Wadek Seremaia 29:12.) Atail Kohto kin ketin poakohng sapwellime tohnkaudok lelepek kan, eri e pahn kin ahnsou koaros karonge atail kapakap kan. (Mel. 10:17; 37:28) Ahpw met sohte wehwehki me e pahn ketikihong kitail soahng koaros me kitail peki. Ele kitail anahne awih lao sampah kapwo leledo pwehn alehdi ekei soahng kan me kitail kin kapakapki.

5. Dahme Siohwa kin ketin medemedewe ni eh kin karonge atail kapakap kan? Menlau kawehwehda.

⁵ Siohwa kin ketin medewe ia duwen atail kapakap eh pidada kupwureo. (Ais. 55:​8, 9) Ehu me e ketin kupwurki iei me sampah pwon en direkihla aramas akan me pahn perenki wiahki ih arail Kaun oh peikiong. Ahpw Sehdan kose me aramas akan pahn peren ma re kaunda pein irail. (Sen. 3:​1-5) Pwehn kadehdehda me dahme Tepilo koasoia likamw pwoat, Siohwa ketin mweidohng aramas akan en kaunda pein irail. Ahpw arail kaunda kahredahr kahpwal tohto me kitail ahneki rahnwet. (Ekl. 8:9) Kitail wehwehki me Siohwa sohte pahn ketikihsang kahpwal pwukat koaros ahnsou wet. Ma e pahn ketin wia met, irail kan me sohte kin kamehlele Ih pahn medewe me aramas me kamwahwihala kahpwal ko. Re kakete medewe me aramas akan kak kaunda pein irail oh pweida.

6. Dahme kahrehda kitail anahne kamehlele me Siohwa pahn ahnsou koaros ketin wia soahng kan ni elen limpoak oh pwung?

⁶ Ele Siohwa pahn ketin sapengala kapakap kan me duwepenehte ahpw ni ahl me wekpeseng. Karasepe, ni ahnsou me Nanmwarki Esekaia uhdahn soumwahuda, e peki rehn Siohwa en ketin sewese pwehn mwahula. Siohwa ketin sapeng oh kamwahwihala. (2 Nan. 20:​1-6) Ahpw ni ahnsou me wahnpoaron Pohl kapakapki me Siohwa en ketikihsang “kisin tek kis” reh, kakete soangen soumwahu ehu, Siohwa sohte ketikihsang kahpwalo. (2 Kor. 12:​7-9) Pil medewehla dahme wiawihong wahnpoaron Seims oh Piter. Nanmwarki Erod men kemeirahla. Mwomwohdisou kapakapki Piter oh pil mweinele Seims. Ahpw, Seims kamakamala, a tohnleng men kapitala Piter. (Wiewia 12:​1-11) Ele kitail pahn medewe, ‘Dahme kahrehda Siohwa ketin kapitala Piter a kaidehn Seims?’ Paipel sohte kasalehda.c Dahme kitail kak kamehlele iei me sapwellimen Siohwa ahl akan sohte kin sapahrek. (Deud. 32:4) Kitail pil ese me Siohwa ketin poakohng Piter oh Seims. (Kaud. 21:14) Ekei pak, Siohwa ele sohte pahn ketin sapengala atail kapakap kan ni ahl me kitail kasik. Ahpw pwehki kitail uhdahn kamehlele me Siohwa kin ahnsou koaros ketin wia soahng kan ni elen limpoak oh pwung, kitail sohte kin kaulimki ia duwen eh kin ketin sapengala atail kapakap kan.—Sohp 33:13.

7. Dahme kitail kin song en dehr wia, oh dahme kahrehda?

⁷ Kitail kin song en dehr kapahrekiong atail irair kan ong ahn meteikan. Karasepe, ele kitail peki rehn Siohwa en ketin sewese kitail ni soangen irair ehu, ahpw e sohte ketin sapengala. Mwuhr, kitail esehda me mie me pil kapakapki soahngohte, oh Siohwa ketin sapengala. Ih met me wiawihong sister men me adaneki Anna. E kapakapkihong Siohwa me eh pwoudo, Matthew, en mwahudahsang eh soumwahu en kanser. Ni ahnsowo, mie sister mah riemen me pil ahneki soumwahu en kanser. Anna uhdahn kapakapki laud duwen Matthew oh pil sister ko. Sister ko mwahula, ahpw Matthew mehla. Nin tapio, Anna medewe ma sister ko mwahula pwehki Siohwa ketin sewese ira. Oh ma ih met me wiawi, dahme kahrehda Siohwa sohte ketin sapengala eh kapakapki eh pwoudo en mwahula? Mehlel, kitail sohte ese ia duwen sister ko ara mwahula. Dahme kitail ese iei me Siohwa pahn ketikihsang soangen lokolok koaros, oh ketin kupwurki kaiasada kompoakepah kan me mehla.—Sohp 14:15.

8. (a) Nin duwen me Aiseia 43:2 mahsanih, ia duwen Siohwa eh kin ketin sewese kitail? (b) Ia duwen kapakap eh kak sewese kitail ni atail lelohng kahpwal laud kan? (Menlau kilang kisin kasdou Prayer Helps Us to Cope.)

⁸ Siohwa pahn ahnsou koaros ketin sewese kitail. Nin duwen Samatail limpoak, Siohwa sohte ketin kupwurki kitail en kin lokolok. (Ais. 63:9) Ahpw, e sohte ketin kauhdi atail kahpwal kan koaros, me ele rasehng pillap kan de kisiniei. (Wadek Aiseia 43:2.) Ahpw e ketin inoukihda en ketin sewese kitail en ‘kotehla’ kahpwal kan. Oh e sohte pahn ketin mweidohng atail kahpwal kan en kauhkitaildihsang papah ih. Siohwa pil kin ketikihong kitail sapwellime manaman me uhdahn kehlail pwe kitail en kak dadaur. (Luk 11:13; Pil. 4:13) Pwehki met, kitail kak likih me ahnsou koaros kitail pahn alehdi dahme kitail anahne pwe kitail en kak dadaurete oh lelepekte ong ih.d

DAHME SIOHWA KETIN KASIK SANG KITAIL?

9. Nin duwen me Seims 1:​6, 7 kasalehda, dahme kahrehda kitail anahne likih me Siohwa pahn ketin sewese kitail?

⁹ Siohwa ketin kasik me kitail en likih ih. (Ipru 11:6) Ekei pak, ele kitail medewe me kitail sohla kakohng atail kahpwal kan. Mwein kitail tepida medewe ma Siohwa pahn ketin sewese kitail. Ahpw Paipel kamehlelehiong kitail me pwehki kehl sang rehn Koht, kitail kak ‘powehdi kelen mahwen kan.’ (Mel. 18:29) Eri kitail en dehr peikasal, ahpw kitail en kapakap ni pwoson, oh likih me Siohwa pahn ketin sapengala atail kapakap kan.—Wadek Seims 1:​6, 7.

10. Menlau kihda ehu karasaras duwen atail kak mwekid pahrekiong atail kapakap kan.

¹⁰ Siohwa ketin kasik me kitail en mwekid pahrekiong atail kapakap kan. Karasepe, ele brother men peki rehn Siohwa en ketin sewese pekihda en kommoal sang eh doadoahko pwehn kak iang towehda mihting tohrohr ehu. Ia duwen Siohwa eh kakete ketin sapengala eh kapakapo? Ele e pahn ketikihong brothero eimah me anahn pwehn koasoiong eh kaunen doadoahko. Ahpw brothero pil anahnehte en kohla rehn eh kauno oh peki. Mwein e anahne pwurupwurehng peki. Mwein e pil pahn peki rehn emen ienge tohndoadoahk ma ira kak weliali ara rahn en doadoahk kan. Oh ma uhdahn anahn, ele e kak peki ma e kak kommoal mehnda ma e sohte ale pweipwei.

11. Dahme kahrehda kitail anahne pwurupwurehng kapakapki atail iren kapwunod kan?

¹¹ Siohwa ketin kasik me kitail en pwurupwurehng kapakapki dahme kesempwal ong kitail. (1 Des. 5:17) Nin duwen me kitail kilang sang dahme Sises mahsanih, ekei atail pekipek kan ele sohte pahn mwadang pasapengla. (Luk 11:9) Eri, dehr uhdi! Pwurupwurehng kapakap ni ngidingid. (Luk 18:​1-7) Ni atail kin pousehlahte kapakapki soahng ehu, kitail kin kasalehiong Siohwa me atail pekipeko uhdahn kesempwal ong kitail. Kitail pil kin kasalehda me kitail pwoson me e kak ketin sewese kitail.

DAHME KAHREHDA KITAIL ANAHNE WEKIDALA EKEI ATAIL PEKIPEK KAN?

12. (a) Ia ehu peidek me kitail en pein idek rehtail duwen atail pekipek kan, oh dahme kahrehda? (b) Ia duwen atail kak tehk mwahu me atail kapakap kan kin kasalehda atail wauneki Siohwa? (Menlau kilang koakono “Ei Pekipek kan Kin Kasalehda Ei Wauneki Siohwa?”)

¹² Ma kitail sohte alehdi dahme kitail peki nan atail kapakap, ele kitail kak pein idek rehtail peidek siluh pwukat. Keieu, ‘E pwung dahme I kapakapkio?’ Kitail kin kalapw medewe me kitail ese dahme keieu mwahu ong kitail. Ahpw soahng kan me kitail peki ele sohte uhdahn mwahu ong kitail. Ma kitail kapakapki duwen kahpwal ehu, ele mie ehu ahl en kamwahwihala kahpwalo me mwahusang dahme kitail peki. Oh mwein ekei soahng kan me kitail peki sohte pahrekiong kupwuren Siohwa. (1 Sohn 5:14) Karasepe, medewehla karasaras en pahpa nohno kan me kitail koasoiapene mwoweo. Irail kapakapkihong Siohwa me neirail serio en mihmihte nan padahk mehlel. E mwomwen me arail kapakapo pwung. Ahpw Siohwa sohte pahn ketin idingkihong kitail en papah ih. E ketin kupwurki me kitail koaros, iangahki neitail seri kan, en pilada en kaudokiong ih. (Deud. 10:​12, 13; 30:​19, 20) Eri pahpa nohno kan kak peki rehn Siohwa en ketin sewese irail en sair mohngiong en neirail serio pwehn kamwakid ih en poakohng Siohwa oh wiahla kompoakepah.—Lep. Pad. 22:6; Ep. 6:4.

13. Nin duwen me Ipru 4:16 mahsanih, iahd me Siohwa pahn ketin sewese kitail? Menlau kawehwehda.

¹³ Keriaun peideko iei ‘Ih ahnsou me Siohwa pahn ketin sapengala ei kapakapo met?’ Ele kitail medewe me atail kapakap kan anahne pasapengla ni ahnsou mwadang. Ahpw, Siohwa ketin mwahngih ahnsou me keieu mwahu en ketikihda sawas. (Wadek Ipru 4:16.) Ni atail sohte kin mwadangete alehdi dahme kitail peki, ele kitail kin medewe me pasapengo sang Siohwa iei ‘Soh.’ Ahpw ni mehlel, ele sapwellime pasapengo iei ‘Saikinte.’ Karasepe, medewehla duwen brothero me kapakapki eh soumwahwo en mwahula. Ma Siohwa ketin kamwahwihala ih, Sehdan kakete akupwungki me brothero pousehlahte papah Siohwa ihte pwehki Siohwa ketin kamwahwihala ih. (Sohp 1:​9-11; 2:4) Pil ehu, Siohwa ketin koasoanedier iahd me e pahn ketin kamwahwihala soangen soumwahu koaros. (Ais. 33:24; Kaud. 21:​3, 4) Ahpw lao lel ahnsowo, kitail sohte kak kasik me Siohwa pahn ketin wiahda manaman kan pwehn kamwahwihala atail soumwahu. Eri, brothero kak peki rehn Siohwa en ketikihong ih kehl oh meleilei pwe en kak dadaur pahn eh soumwahwo oh pousehlahte papah Koht ni lelepek.—Mel. 29:11.

14. Dahme ke sukuhlkihsang dahme wiawihong Janice?

¹⁴ Medewehla dahme wiawihong Janice me kapakapki en iang papah nan Pedel. Mwurin sounpar limau, e wehwehkihda ia duwen Siohwa eh ketin sapengala eh kapakapo. E koasoia: “Siohwa ketin doadoahngki ahnsowo pwehn padahkihong ie soahng tohto oh sewese ie en wiahla Kristian mwahu men. I anahne kalaudehla ei kin likih ih. I anahne sukuhlki en kalaudehla ei kin onopki mwahu duwen Paipel. Oh I pil anahne sukuhlki me I kak ahneki peren sohte lipilipil ia wasa me I kin papah Siohwa.” Mwuhr, Janice oh eh pwoudo alehdi luhk en wia doadoahk en sounapwalih me kin seiloak. Ni eh kin tamanda ahnsowo, Janice koasoia: “Siohwa uhdahn ketin sapengala ei kapakap kan, ahpw kaidehn ni ahl me I kasik. I pwand en esehda uwen kaselel en sapwellime pasapengo. I uhdahn kalahnganki me I ahneki ahnsou mwahu en kilang duwen sapwellime limpoak oh kadek.”

15. Dahme kahrehda kitail anahne kapakapki mehkot tohrohr? (Pil kilang kilel kan.)

¹⁵ Kesiluh en peidek iei ‘I anahne kapakapki mehkot tohrohr?’ E mwahu en kin kapakapkihte dahme kesempwal ong kitail. Ahpw ekei pak, ele e pahn mwahu ma kitail kapakapki soahng teikan pwe kitail en kak esehda dahme Siohwa ketin kupwurki ong kitail. Medewehla karasaras en sister kiripwo me kapakapki en iang Sukuhl ong Sounkalohki Wehio kan. E men iang sukuhlo pwe en kak kohla papah wasa kan me anahn laud mie ong sounkalohk. Eri, ni eh kin pousehlahte kapakapki en alehdi luhk en iang sukuhlo, e pil kak peki rehn Siohwa en ketin sewese ih en esehda ahl teikan me e kak wia pwehn kalaudehla eh doadoahk en kalohk. (Wiewia 16:​9, 10) Mwurin eh kapakapki met, e kak peki rehn sounapwalih me kin seiloak ma mie mwomwohdiso ehu me karanih ih me pil anahne pioneer kan. De e kak ntinglahng ohpis en Sounkadehdehn Siohwa kan pwehn idek duwen wasa kan me anahn laud mie ong sounkalohki Wehio.e

16. Dahme kitail kak uhdahn kamehlele?

¹⁶ Nin duwen me kitail sukuhlkier, kitail kak uhdahn kamehlele me Siohwa pahn ketin sapengala atail kapakap kan ni elen limpoak oh pwung. (Mel. 4:3; Ais. 30:18) Ekei pak, ele kitail sohte kin alehdi dahme kitail kasik. Ahpw Siohwa sohte pahn ketin pohnsehsehla atail kapakap kan. E uhdahn ketin poakohng kitail. Oh e sohte pahn ketin likidmelieikitailla. (Mel. 9:10) Eri, doulahte “likih Koht ahnsou koaros,” oh kasalehiong ih audepen omw mohngiong ni kapakap.—Mel. 62:8.